25/02/2024
IMBALI
Ahh Sizwe esimdaka!!
Ngcamb'ezek'indlela ka Khawuta
Ndiyanibhotisa mathole eduna lomthonyama
Ngalonyaka Wamawaka amashumi amabini onamashumi amabini anesine(2024)
Ndithi mandithath'inkquleqhu ndiqule Kumba wokuba sizazini ukuba singobanina!
Thina siyimidak'omgquba ka Xhosa Oomafel'emfazwen'iminyak'emakhulu(100 yrs)
Ndibambe ngazibini kwingqonyela yegorha lomXhosa uSandile Mgolombane ngokudlala indima enkulu kwelemidaka kaXhosa
Kaloku lendoda ibiyeyokugqibela ukusombulula amasondo esolotya lemfazwe yamaXhosa nabasentshona(Europeans)
Yiyo lonto ndigxila ndigxininisa ndingxola ndixakiwe, ndikhwankqiswa yingqondo yemidak'omXhos'oqhiniweyo
Ndithi qhaqhan'ezongqondo niqiqe niqonde niqalekise niqeqesh'amantshontsho ngembali
Zidwesha Nani zinjinga,nani zingcali Nani bafundisi ntsapho, kwakunye nani zisele zenyathi zakwaXhosa
Amehlo ajonge Kuni neminwe ikhombe kuni kule nkinge mthumeni
Ndikhe ndabek'inyawo namehlo emaphondwen'amabini ndabon'umhlol'omhluz'wamanqina
Ndabek'isandl'esidleleni ndema ndenqwelem
Ndabona nolwimi lulahleka nenckubekho ibhang'itshabalala ixel'amanz'omlamb'esitsha
Yiyo lonto ndibharhumla ndizibhija-bhija ndirhubuluza ngesinqe ndixel'inyok'enyundubay'inyokosa ixakwe yeyokosa
Lengxak'indi jac'umxhelo ngomkhonto
Buyelan'embo midak'akowethu
Ninkcazel'amantshontsho ngoncuthu lwencindi yencasa yobusi lwembali,amasiko,uLwimi nezithethe zakwaXhosa
Ngcingcilili!!!
By B.Msebi🖋️❤️
