12/08/2023
UBUYE YEDVWA
Bahambe ekuseni ngeluvivi
Betihamba totimbili titsandzani
Simanga, babe bekakadze ahamba embili
Abelele, asangadvwalanga nekadzeni
Abecengetela nje, akakhulumi nalelilodwa nje
Abesitfupha lamadvodza ahlengetela tinyembeti
Make Ubuye Yedvwa
Uluhambeni lwabo beyingekho injabulo
Noma babe abegcoke yakanokusho isudu
Timphahla tamake atikangichazi nani
Ngive kucucumuka kwetibindzi
Ngisolile angeke babuye bonke
Ngish*to angeke basaphelela
Simanga kushoda munye nje vo !
Babe akekho, make ubuye Yedvwa Uluhambeni lwabo
Liningi labo licondze emabhodweni
Phela sikhulumi sikhulumi sivakele
Sitsite indlela indlula ngasekhaya
Noma inkhulumo yaso ingakacaci
EmaSwati ayifundze ivaliwe
Simanga akubashayi mkhuba kubuya bangasaphelelanga
Uphi babe? Kuzula imicabango engcondvweni yami
Utsite nakaselutsentseni nelibala
Wakhala kabuhlungu.......
Cha! Ukhale kalusizi impela
Kute kwatsintseka lebebambonye bamfihle buso
Ngibeve badzindza sililo ngalokungakatayeleki
Pho ke ...ligama linye nje
"Alwehlanga lolungehlanga "
Tidvumisiwe tadvuma tonkhe tahamba
Ayikabi khona inkinga nakancane
Idvumile yamalume ngelikadze
Sacalela phansi sililo ekhaya
Ngive make akhuluma ngalelichachatelako
"Mnaketfu nawe uyangishiya ubonile ngibuye ngedwa? "
Batsi Indvodza ayikhali
Kepha malume ubhonsise kwenkhomo igwazwa
Phela dzadzewabo ubuye Yedvwa
Labancane badvumisa umbhedze wababe lomusha lomuhle
Kepha bakhala ngekutsi muncane
Angeke benele bobabili bobabe namake
Lokubuhlungu abati kutsi ngumbhedze wetinhlungu
Batsite batawubona kahle nasekavukile babe
Banesiciniseko lombhedze wababe yedvwa njengoba alele yedvwa
Make ubuye Yedvwa
Babe yena yedvwa uhambile
Make umpheketele libanga lelifisha noko
Phela Kufanele ngobe luhambo lababe belivele lilifisha
Luphelele khona lapha phansi kwesihlahla etaleni
Uhambile impela
Uhambe yedvwa
Ushiye make yedvwa
Ngu: Honarable PN Sihlongonyane
Yacwaningwa ngu: Poet Benele M Sihlongonyane
Siyabonga!!!
