08/05/2026
Yolandi-Mari van den Berg, gebore Beyers, het op 10 Junie 1982 in Pretoria die lewe betree. Sy het grootgeword in ’n huisgesin van drie kinders waar harde werk en ondernemingsgees deel van die alledaagse lewe was. Haar pa, Jan Beyers, was ’n entrepreneur en haar ma, Claudia Beyers, ’n rekenmeester — ’n kombinasie van kreatiwiteit en gestruktureerdheid wat dalk reeds vroeg ’n invloed op haar lewe gehad het.
Van kleins af was Yolandi-Mari gefassineer deur kuns. Sy onthou hoe sy ure lank deur haar ouma se kunsboeke geblaai het en met bewondering na die skilderye gekyk het. Haar tannie, wat self geskilder het, het ’n groot inspirasie geword, en sy het altyd gedroom om eendag ook sulke mooi kunswerke te kan skep.
Vandag is sy gelukkig getroud met Carel van den Berg, ’n vennoot in hul besigheid. Vir hulle saamgestelde gesin is hulle die ouers van 5 seuns: Sarel, Dawid, Henry en Christiaan Roets, die nuutste klein Gabriël vd Berg is nou 16 maande.. Ondanks ’n besige gesinslewe bly kuns haar groot passie en selfs haar geliefkoosde tydverdryf. “Skilder,” lag sy wanneer sy gevra word wat sy graag doen om te ontspan.
Yolandi-Mari werk hoofsaaklik met olieverf en haar gunsteling kleur is oker-geel. Sy bewonder die kunstenaar Cornelia Holm en geniet dit veral om portrette te skilder. Toe sy deelgeneem het aan die Orareeks-kompetisie, was die lekkerste deel vir haar die begin van die proses — daardie oomblik wanneer inspirasie tref en ’n visie begin vorm aanneem. Die moeilikste deel, sê sy, is om afskeid te neem van ’n skildery, want vir haar voel ’n kunswerk nooit heeltemal klaar nie.
Aan jong en opkomende kunstenaars gee sy eenvoudige maar waardevolle raad: “Hou aan om kwantiteit te lewer. Kwaliteit volg eers as jy genoeg skilder.”
