15/09/2022
STARSAT STOP MYTV EN ONSETV OP HUL DEKODEERDER
15 September 2022
Vir onmiddellike vrystelling.
StarSat stop Afrikaans, na 13 jaar.
StarSat wat die Suid-Afrikaanse tak van StarTimes Media is, het ‘n einde aan Afrikaans gebring op die StarSat dekodeerder. StarTimes Media het TopTV in 2013 oorgeneem en is in vele Afrika-lande beskikbaar. MYtv (voorheen ASTV) en OnseTV, ‘n kanaal uitsluitlik bedoel vir die bruin gemeenskap, sal vanaf 1 Oktober 2022 nie meer op StarSat te siene wees nie.
OnseTV se uitsending het op 29 September 2017, op StarSat begin.
Omdat die bestuur van OnseTV daagliks met ‘n wye verskeidenheid mense in die bedryf werk en dit duidelik was dat daar nie ‘n gefokusde kanaal was om na die grootste Afrikaanssprekende gemeenskap om te sien nie, is daar besluit om ‘n TV-kanaal te skep, spesifiek vir die bruin Afrikaanstaliges. OnseTV is al vir 5 jaar suksesvol op die lug. Alhoewel die reaksie uit ons onmiddellike gekleurde gemeenskappe ongelooflik was en steeds is, het StarSat die nuus aan die bestuur van beide OnseTV en MYtv gebreek dat hul kontrakte nie hernu gaan word nie. Geen rede vir die besluit is verskaf nie.
Die bestuur van OnseTV voel dat alle groepe binne die bruin gemeenskap ‘n stem gekry het, maar dat daardie stem nou stilgemaak is.
OnseTV het ‘n tuiste vir die bruin gemeenskap geword. Om hul kultuur en taal voluit uit te leef en sodoende kulturele gapings te oorbrug. Die ongetapte talent en talentvolle mense wat teenwoordig is in hierdie gemeenskap, was voorheen weggewys by hoofstroom media.
OnseTV se leuse is VIR ONSE MENSE DEUR ONSE MENSE, wat beteken dat ‘n hele nuwe wêreld van geleenthede, werkskepping en betrokkenheid by die kanaal oopgegaan het, vir mense wat nooit vantevore hierdie geleenthede gehad het nie.
MYtv, die Afrikaanse kanaal wat voorheen as ASTV bekendgestaan het, was in en uit Rustenburg bedryf. Hierdie kanaal het eers op die VIVID platform begin uitsaai en is later in Oktober 2009 op TOPTV as enigste Afrikaanse kanaal aanvaar.
Gedurende 2013 is die Besturende Direkteur, Jaco Ferreira, deur e.tv genader en ‘n transaksie tussen Sabido Investments en ASTV is beklink, waar ASTV op die Openview HD dekodeerder ook begin uitsaai het. Na hierdie kontrak verstryk het, is ASTV se uitsending op OVHD gestaak. Maar steeds het ASTV voortgegaan met uitsending op die StarSat dekodeerder. ASTV se naam is toe verander na MYtv om by die OnseTV-gesin te pas. InPasTV (‘n Christelike kanaal) is ook saam met OnseTV deur StarSat aanvaar, maar na ‘n wyle verwyder.
Ons groet StarSat met ‘n swaar hart, maar is baie dankbaar vir die 13 jaar wat ons gegun is om daar te kon uitsaai. Ons sal ewig dankbaar wees vir die tyd wat ons saam met die StarSat-span kon spandeer. “Dalk het ons ons tienerskoene nou uitgegroei en is dit tyd om die “grootmens-wêreld” aan te durf” sê die MYtv/OnseTV bestuurspan.
Aangesien tegnologie daagliks meer en meer vorder, sit hierdie span nie stil nie en is reeds besig om hul vlerke te sprei. Kykers kan die volgende webtuistes besoek om gratis na beide kanale se programme te kyk. Ons sien jou op www.mytv.co.za en www.onsetv.co.za.
SOSIALEMEDIASKAKELS:
MYtv: www.facebook.com/MYtvAanlynSosiaal
Webwerf: www.mytv.co.za/
OnseTV: www.facebook.com/onsetv
Webwerf: www.onsetv.co.za/
PUBLISITEIT EN BEMARKING:
Hilda Ferreira
Sel: 082 383 6364
E-pos: [email protected] / [email protected]
