20/05/2024
Nobe kumetima siyetama kuyincenga lemphilo
Kepha kubuye kube metima kakhulu nasitawutsi sisayincenga lemphilo phindze kumele sincenge kuphila nebantfu labangasitsandzi, labangatsandzi kusibona sinelutfo
Tsine safulatselwa ngumhlaba nemagugu awo, salahlwa ngunanaba lebesibetsembile kutsi bataselapha kuletilondza letavela mhla silahlekelwa batali betfu
Ngani nalaba lebesiphila nabo konkhe ngakitsi kusahamba kahle sebasikhiphe inyumbazane
sate sahlanekelwa ngisho labayingati yinye natsi
Sesesaba ngisho nekutisondzeta kibo ngenca yetifungo labatisho nase basibalisela ngemphilo lesiyiphilako nayo lengatseni ngobe ngiko kwetama
Sinato tifiso tekuyivusa lemiti yebatali
Ngiko kutsi nato letindzala letasala setigebhuke tindvonga taveta emawa langenamkhawulo
Ngisho nawo lamaliba abo sagebhulwa tikhukhula kwasala linye litje nalo lelabekwa ngulobekangekho mhla babekwa endlini yabo yekugcina
Kepha nayo lemiti sitatsi siyivusela bobani ngoba labayigodlile abafuni nekubona lasinyatsele khona
Nekuphila kwetfwe kubavusela bonembeza netinhliyo letimbi
Kuvele kutigcamele kutsi lokufa kwebatali betfu kwaba nesandla semfene ngobe kubangwa emafa
Lokubuhlungu kutsi nawo lamafa labebangwa nawo avele asatifele ngani phela emafa ayakwati kufa wena usaphila
Emagugu alomhlaba asele emalibeni, emaliba sahambe netikhukhulu kantsi nalamafa labebangwa savele atifele bona basaphila.
Tsine satalelwa emhlabe wetitsa, lesitsi nasihamba kiwo sibe sicalata
Ngobe sesahlale sitingelwa kuhle kwetinyamatane
Kuvele kwetfu kuyabatfukutselisa labanye, kubagucule tilwane tasendle basho kusicedza sife kube kanye
Ngani betamile kusimbela siphila kepha sabuye sahluma sesikulesinye sigaba semphilo yekutilwela ngemphumelelo lelabangiyifuni kusibona sikiyo
Batsi setamelani
Kube kuya ngabo ngabe konkhe lelesinako kutfolwa tintsandvokati tabo, ngani seyadla ngemabala iyigoce yini
Nalabatsi bayakujabulela uva ngemavi laphumako emlomeni wabo kutsi awaphumi enhhlitiyweni
Longatentisi ugcina sakhipha emavi lahlabako netifungo letihamba neticalekiso
Letfo seyihambe yate yefika nasemisebentini lapho setama khona
Kubangwa tikhundla sitondzelwa kukhushulwa ngenca yekutikhandla kwetfu.....
Emagugu alomhlaba asele emalibeni emaliba sahambe netikhukhulu kantsi nalamafa labebangwa savele atifele bona basaphila ...
Buhle Imbongi Yabantu
