Mërgata e Pozheranit

22/10/2026

Aty ku morëm hapat e parë të dijës, Mërgata e Pozheranit po kthen mirënjohjen dhe angazhimin për Pozheranasit.
Në bashkëpunim me njerëz të vullnetit të mire sot u ekzekutua projekti i shtrimit të zhavorit financim i z. Menderez Halabaku. Kjo është një punë e mirëpritur nga komuniteti të cilët qdo ditë e më shumë po shprehin mbështetjen dhe krahas Mërgatës po kontribuojnë për fshatin tonë!

Ju faleminderit!

21/10/2026

18/10/2026

MËRGATA E POZHERANIT PËR POZHERANASIT!

Sot, në Pozheran, u bë edhe një hap konkret drejt realizimit të një nisme me vlerë për komunitetin tonë: u instalua pika e stacionit, falë angazhimit, solidaritetit dhe kontributit të njerëzve tanë.

Ky realizim është dëshmi se kur bashkohemi rreth një qëllimi të përbashkët, idetë shndërrohen në vepra konkrete.

Një falënderim i veçantë për të gjithë bashkatdhetarët tanë në mërgatë, për të gjithë kontribuuesit dhe secilin person që, në forma të ndryshme, u bë pjesë e kësaj nisme.

Pozherani nuk është vetëm vendi ku kemi lindur dhe jemi rritur. Është vendi që na bashkon, pavarësisht se ku jetojmë.

Le ta vazhdojmë këtë frymë bashkëpunimi! Le ta dëshmojmë se dashuria për vendlindjen nuk matet me fjalë, por me vepra.

Sepse kur mërgata dhe vendlindja bëhen bashkë, përfiton i gjithë komuniteti.

Faleminderit të gjithëve!

17/10/2026

POZHERANI YNË KA NEVOJË PËR NE! SË BASHKU MUND TË BËJMË MË SHUMË!

Të dashur bashkëfshatarë, bashkëvendës dhe gjithë ju që keni lidhje shpirtërore me Pozheranin,

Një fshat nuk zhvillohet vetëm duke pritur që të tjerët të bëjnë diçka për të. Një fshat zhvillohet kur njerëzit e tij bashkohen, kur secili jep kontributin e vet dhe kur përgjegjësinë për të ardhmen e vendlindjes e ndiejmë të gjithë.

Pozharani është vendi ku kemi lindur, jemi rritur, ku kemi kujtimet tona dhe ku rrënjët tona mbeten gjithmonë. Prandaj, është koha që këtë dashuri për vendlindjen ta kthejmë në vepra konkrete.

Ju bëjmë thirrje të gjithëve, brenda dhe jashtë vendit, që të na bashkëngjiten në financimin dhe realizimin e projekteve me interes të përbashkët për fshatin tonë.

Nuk ka rëndësi sa mund të kontribuojë secili. Rëndësi ka vullneti, solidariteti dhe dëshira për të lënë pas diçka të mirë.

* Një kontribut i vogël nga shumë njerëz bëhet një projekt i madh.
* Një ide e përbashkët mund të kthehet në realitet.
* Një investim sot është një e mirë për brezat që vijnë.

Ne nuk po kërkojmë vetëm mbështetje financiare. Po kërkojmë bashkim, përgjegjësi dhe pjesëmarrje qytetare.

Le të mos mbetemi vetëm spektatorë të zhvillimit të Pozheranit, por të bëhemi pjesë e tij!

Le t’u tregojmë brezave të ardhshëm se kemi ditur të bashkohemi për vendin tonë, pavarësisht ku jetojmë.

POZHERANI ËSHTË I YNI – ZHVILLIMI I TIJ ËSHTË PËRGJEGJËSI E PËRBASHKËT!

Së bashku kemi më shumë mundësi. Së bashku mund t’ia dalim!

15/10/2026

Mërgata e Pozheranit – nga zotimi në vepër!

Kanë filluar punimet për projektin e pritoreve të autobusëve në Pozheran, sipas planit dinamik, vendimeve të Kryesisë dhe buxhetit të siguruar nga pagesat vjetore të mërgimtarëve tanë.

Kontributi i mërgatës, planifikimi dhe përgjegjësia po shndërrohen në projekte konkrete për vendlindjen.

Bashkë për Pozheranin, me punë dhe përkushtim!

09/10/2026

POZHERANI DHE TË GJITHË BASHKËATËDHETARËT NË MËRGIM SOT JANË NË VAJ…

Me zemër të thyer dhe dhimbje të thellë morëm lajmin tragjik për humbjen e dy jetëve njerëzore dhe plagosjen e një bashkëfshatari tonë. Një tragjedi e rëndë që ka prekur thellë zemrat e të gjithëve kudo që ndodhemi.

Shoqata “Mërgata e Pozheranit”, në emër të të gjithë bashkatdhetarëve tanë në mërgatë, shpreh ngushëllimet më të sinqerta për familjen Bogujevci, të afërmit dhe gjithë ata që po përjetojnë këtë dhimbje të madhe.

Edhe pse larg vendlindjes, zemrat tona sot janë pranë jush. Pozherani është shtëpia dhe rrënja jonë e përbashkët, prandaj dhimbja që ka prekur një familje të fshatit tonë është dhimbje e të gjithë komunitetit tonë. Në këto çaste të rënda, fjalët janë të pakta, por lutjet, solidariteti dhe mbështetja jonë janë me familjen e viktimave.

Zoti ju dhëntë forcë, durim dhe qëndresë për ta përballuar këtë humbje të rëndë. Të plagosurit i urojmë shërim të shpejtë dhe të plotë.

U prehshin në paqe të ndjerët! Ngushëllime të sinqerta familjes Bogujevci dhe gjithë Pozheranit tonë të dashur.

Me dhimbje të thellë dhe solidaritet,
Shoqata “Mërgata e Pozheranit”
Në emër të të gjithë bashkatdhetarëve në mërgatë.

05/10/2026

Nga Gjeneva drejt vizioneve të reja për Pozheranin

Sot, në Gjenevë, Kryesia e Shoqatës “Mërgata e Pozheranit” zhvilloi punimet e radhës, në përputhje me planin vjetor të punës, me fokus në projektet që janë aktualisht në zhvillim dhe në angazhimet e planifikuara për vitin.

Gjatë takimit u diskutuan edhe projekte të reja për fshatin. Tri prej tyre kaluan në fazën e fizibilitetit, ndërsa u caktuan grupet punuese dhe koordinatorët përgjegjës për secilin projekt.

Ndërkohë, për dy projekte të rëndësishme – ndërtimin e pritoreve të autobusëve dhe rregullimin e zonës së parkingut prapa Shkollës Fillore – u procedua drejt fazës së planifikimit financiar për realizimin e tyre.

Fryma e bashkëpunimit dhe mbështetja e vazhdueshme e mërgatës sonë po na hapin rrugën drejt vizioneve të reja për Pozheranin. Në ditët në vijim, pas përfundimit të planifikimeve financiare, do t’i bëjmë publike më në detaje projektet dhe hapat konkretë drejt realizimit të tyre.

Shoqata “Mërgata e Pozheranit” mbetet e përkushtuar që çdo euro e dhënë nga bashkatdhetarët, si nga diaspora ashtu edhe nga bashkëfshatarët tanë në vendlindje, të orientohet me përgjegjësi dhe transparencë për krijimin e një ambienti dhe një rrethi më të mirë për Pozheranin.

Andaj, u bëjmë thirrje të gjithë bashkatdhetarëve të cilët, për arsye subjektive, ende nuk e kanë përfunduar mbështetjen e tyre vjetore sipas planit, që ta realizojnë atë. Kjo është shumë e rëndësishme për një planifikim më të saktë financiar dhe një realizim më të sigurt të projekteve tona.

Një falënderim i veçantë për çdo bashkatdhetar që ndau nga koha, mundi dhe buxheti i tij për të mbështetur zhvillimin e fshatit tonë.

Bashkë për Pozheranin – nga mërgata, për vendlindjen!

21/09/2026

Një urë miqësie mes Vitisë dhe Saint-Julien-en-Genevois!

Kryesia e Shoqatës “Mërgata e Pozheranit” mori pjesë me kënaqësi në aktivitetin e organizuar nga Shoqata “Iliria”, me rastin e binjakëzimit të Vitisë me Saint-Julien-en-Genevois.

Një moment i veçantë miqësie, bashkëpunimi dhe krenarie shqiptare.

Falënderojmë Shoqatën “Iliria” për mikpritjen dhe këtë organizim të rëndësishëm.

20/09/2026

Të dashur bashkëvendas dhe mërgimtarë të Pozheranit, kudo që jeni!

Ndoshta nuk jemi të gjithë aktivë çdo ditë. Dikush shkruan, dikush vetëm lexon, dikush merr pjesë në aktivitete, ndërsa dikush tjetër është më i heshtur. Por heshtja nuk do të thotë indiferencë.

Ajo që na bashkon është vendlindja jonë – Pozherani.

Sot kemi nevojë që mërgata jonë të jetë më e organizuar dhe më aktive. Shoqata “Mërgata e Pozheranit” është mundësia jonë për të qenë bashkë, për të ndihmuar njëri-tjetrin dhe për të mbështetur projekte e iniciativa për komunitetin tonë.

Anëtarësia vjetore është 120 € – vetëm 10 € në muaj.

Mos ta shohim vetëm si pagesë, por si kontribut dhe përkushtim ndaj vendlindjes sonë.

Nëse secili prej nesh jep pak, së bashku mund të bëjmë shumë.

Mos të presim që dikush tjetër ta bëjë. Le ta bëjmë së bashku!

Bëhu anëtar. Aktivizohu. Fto edhe një bashkëvendas.

Sepse Pozherani nuk mbahet gjallë vetëm me kujtime, por me njerëzit e tij.

Mërgata e Pozheranit – të bashkuar edhe larg vendlindjes!

03/09/2026

ARON PIRA — NJË JETË E RE E SHUAR, NJË DHIMBJE E PAKUFISHME

Ka lajme që të tronditin shpirtin dhe të lënë pa fjalë.

Me dhimbje të thellë morëm lajmin e kobshëm për ndarjen nga jeta të bashkëvendasit tonë, Shoqata Mërgata e Pozheranit shpreh ngushëllimet më të sinqerta për ndarjen tragjike nga jeta të mërgimtarit tonë të ri, Aron Pira.

Aroni, në moshën vetëm 18–19 vjeç, u nda nga jeta aksidentalisht, duke lënë pas një familje të pikëlluar, të afërm, miq dhe një komunitet të tërë që sot e ndien rëndë këtë humbje.

Në një moshë kur jeta sapo kishte nisur të hapte dyert e saj, kur ëndrrat ishin përpara dhe e ardhmja pritej me shpresë, kjo jetë u ndërpre tragjikisht.

Malli për Kosovën dhe dëshira për t’u kthyer në vendlindje janë ndjenja që i njeh çdo mërgimtar. Por askush nuk e mendon se një kthim i dëshiruar mund të shndërrohet në një lamtumirë të përjetshme.

Aron, u ktheve në vendlindje, por jo ashtu siç e kishim dëshiruar të gjithë.

Sot, dhimbja e familjes Pira është dhimbje e të gjithë Pozheranit. Është dhimbje e mërgatës sonë, kudo që ndodhet.

Në emër të Shoqatës Mërgata e Pozheranit, bashkëndjejmë thellë me familjen Pira, të afërmit, miqtë dhe të gjithë bashkëvendasit tanë në këtë humbje të rëndë.

Zoti i dhëntë familjes forcë e durim për ta përballuar këtë dhimbje të madhe.

U prehtë në paqe shpirti i Aronit.
Kujtimi për të qoftë i përjetshëm.

Ngushëllime të sinqerta familjes Pira dhe gjithë Pozheranasve.