15/06/2026
Teatri “Avdush Hasani” ka filluar provat për shfaqjen e re, komedinë “Shfaqja që shkon keq”, me regji të Bashkim Ramadanit.
Autorë: Henry Lewis, Jonathan Sayer dhe Henry Shields
Regjia: Bashkim Ramadani
Luajnë: Besart Zeneli, Ryva Kajtani, Drin Berisha, Gani Morina, Muhamet Zeka, Valire Haxhijaj Zeneli, Arbit Zymeri
Kostumografe: Njomëza Luci
Skenograf: Artan Hasani
Dizajner i ndriçimit: Skender Latifi
Mjeshtër i ndriçimit: Jeton Berisha
Punëtor skene: Arton Mustafa
Komedia zhvillohet gjatë premierës së dramës misterioze “Vrasje në Shtëpinë e Havershamëve”, e shkruar nga Suzi H.K. Braidswell dhe e vënë në skenë nga Shoqata Dramatike e Universitetit Politeknik të Kornleit.
Një trupë amatore, e cila së fundmi ka hasur në një vepër që përmban po aq personazhe sa ka edhe vetë trupa aktorësh, e konsideron këtë si mundësinë ideale për të realizuar një shfaqje nga e cila pritet sukses i madh.
Një njeri i vdekur në dhomën e tij të gjumit, në mbrëmjen e fejesës së tij, i bën të gjithë të dyshuar. Dyshimet, padyshim, bien mbi ata që e “donin”. Dashuria e fshehtë, tradhtia dhe intrigat janë ndër temat kryesore që kjo shfaqje i sjell para publikut.
Dritat që ndalen e ndizen pa arsye, rekuizitat dhe skenografia që mungojnë ose prishen, personazhet që harrojnë tekstin apo u bie të fikët, janë vetëm disa nga problemet me të cilat përballet kjo trupë aktorësh, e cila di vetëm një gjë:
“Shfaqja duhet të shkojë deri në fund, PATJETËR!”
Shfaqja është mbështetur nga Komuna e Podujevës, ndërsa premiera do të mbahet në shtator të këtij viti.
❤️🎭
