10/19/2025
د پاکستان د دفاع وزير خواجه اصف پر اېکس خپاره کړي يوه پيغام کې ويلي چې په افغانستان کې د طالبانو له حکومت سره یې د اوربند هوکړه وشوه.
نوموړي ويلي، "دواړه ګاونډي هېوادونه به د يوه او بل د خاورې درناوی کوي." او زياته کړې یې ده چې "په پاکستان کې به د افغانستان له خاورې د ترهګرۍ سلسله سملاسي بنده شي".
په افغانستان کې د طالبانو حکومت تراوسه د اوربند تازه هوکړې او د خواجه اصف د څرګندونو په اړه څه نه دي ويلي خو وړاندې یې په پاکستان کې امنيتي پېښې د دوی کورنۍ مسئله بللې او په وار وار یې ويلي، هېچا ته اجازه نه ورکوي چې د افغانستان خاوره د بل چا پر ضد وکاروي.
ښاغلي اصف زیاته کړې چې دواړه لوري به د اکټوبر پر ۲۵مه د ترکيې په استانبول کې بيا سره کېني.
د دواړو خواو تر منځ وروسته له هغه تاوتریخوالی ډېر شو چې په افغانستان کې د طالبانو حکومت وويل، پاکستان د افغانستان "حریم نقض" کړی او په ځواب کې یې د ډېورنډ کرښې په اوږدو کې پر پاکستاني پوستو بريدونه وکړل.
له دې وروسته د دواړو لوريو تر منځ نښتې او بريدونه وشول چې د طالب چارواکو په وینا په وروستي هغه کې د جمعې مازديګر (۱۷ اکټوبر) د "پکتيکا په اورګون ولسوالۍ کې د دريو کرېکټ لوبغاړو په ګډون ۱۷ تنه ولسي وګړي د پاکستان په هوايي بريدونو کې ووژل شول." د پاکستان حکومت د دې ځانګړې پېښې په اړه څه نه دي ویلي.
