05/08/2025
چاکر
( یک جنوری ۱۹۷۹ ءَ میر چاکر ءِ قبر ءِ زیارت ءَ رند ماں ستگرہ ءَ )
مرچی دہلی چہ تئی دست ءَ در اتکہ چاکر
تئی ہما چاکری اولاد نہ منتہ چاکر
زئیراں تئی چارگ ءِ ہچ کس ءَ نہ زُرتہ چاکر
پہ تئی گاری ءَ دل کسّی نہ سُتکہ چاکر
کبر مُنجارانی دست ءَ مں دِراں بوتہ شُتہ
ما تئی عہد ءِ کتاب ءَرا نہ ونتہ چاکر
جانگلی ۲؎ مرچی تئی نام اِنت کہ تاریخ ءَ ترا
تئی نزوری ءُ نزانتکاری ءِ فامے داتگ
ناتپاکی ءُ ہمے وت مں وت ءِ جنگ ءِ سرا
وہد ءِ دستاں ترا چوں کُچلیں تامے داتگ
اے کہ جوڈ یننت ہڑپّہ پہ سنگ ءِ دیوال
اے تئی “ ستگرہ “ ءَ پْروشنت ءُ لنگار کننت
پش نہ گیج اَنت پہ تو نام ءُ نشان ءُ بُنمال
اے ہما تاکاں تئی نام پر اِنت ، گار کننت
کس نہ بیت مرچی پہ تو اکبر ءُرنجیت ءُ قمر ۳؎
پادا یک رندے پدا پرچہ کہ چاکر تئی شہر
ستگرہ پْرشتگ ءُگار اِنت بلوچستان ہم
بیا! اے سرمستاں پدا گوہر ءِ کن جُستاں ہم”
——————————————————
۱؎ کبر مُنجار ءِ کرّ ءَ ایریں تاریخ ءِ کتاب
۲؎ پنجاب ءِ بلوچ “ جانگلی “ ( بزاں جنگلی )
۳؎ جلال الدین اکبر ، رنجیت سنگھ ءُ قمر سنگھ
۴؎ بگانی بانُک “ گوہر “
خان صابٓر
