06/20/2026
រងឥទ្ធិពលពីព្យុះមេខឡា!កម្ពុជាអាចមានភ្លៀងធ្លាក់ជាមួយខ្យល់កន្ដ្រាក់ពីថ្ងៃទី២១-២៦មិថុនា...
កម្ពុជាអាចនឹងមានភ្លៀងធ្លាក់ជាមួយខ្យល់កន្ដ្រាក់និងផ្គររន្ទះ ចាប់ពីថ្ងៃទី២១ដល់ថ្ងៃទី២៦ ខែមិថុនា ឆ្នាំ២០២៦ ដោយសាររងឥទ្ធិពលពីព្យុះទី៧ ឈ្មោះ មេខឡា (Mekkhala) T2607។ នេះបើតាមសេចក្ដីជូនដំណឹងរបស់ក្រសួងធនធានទឹកនិងឧតុនិយមនាថ្ងៃទី២០ ខែមិថុនា ឆ្នាំ២០២៦ ដោយយោងលើការព្យាករ។
នៅក្នុងនោះតំបន់វាលទំនាប មានខេត្ដបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្ដាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ជាមួយខ្យល់កន្ដ្រាក់ និងផ្គររន្ទះ គ្រប់ដណ្ដប់លើផ្ទៃដី៣០ភាគរយ។
តំបន់ខ្ពង់រាប មានខេត្ដកំពង់ស្ពឺ ប៉ៃលិន ឧត្ដរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ជាមួយខ្យល់កន្ដ្រាក់ និងផ្គររន្ទះ គ្រប់ដណ្ដប់លើផ្ទៃដី២០ភាគរយ។
តំបន់មាត់សមុទ្រ មានខេត្ដកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយខ្យល់កន្ដ្រាក់ និងផ្គររន្ទះ គ្រប់ដណ្ដប់លើផ្ទៃដី៤០ភាគរយ។ រលកសមុទ្របោកបក់ខ្លាំងដែលមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,៧៥ម៉ែត្រ។
ជាមួយគ្នា ក្រសួងធនធានទឹកអំពាវនាវឱ្យសាធារណជនប្រុងប្រយ័ត្នខ្ពស់ចំពោះបាតុភូតភ្លៀង ផ្គររន្ទះ និងខ្យល់កន្ដ្រាក់ ជាពិសេសអ្នកដែលធ្វើដំណើរតាមផ្លូវគោកនិងផ្លូវទឹក។ ក្រសួងនឹងបន្ដតាមដាននិងវិភាគអំពីស្ថានភាពធាតុអាកាសដើម្បីជម្រាបជូនជាបន្ដបន្ទាប់ក្នុងករណីមានការប្រែប្រួល៕
#ក្រសួងធនធានទឹក #ព្យុះមេខឡា #វិទ្យុវាយោ
