04/21/2026
“A Nopna Munah Tuktuk Lai”
Jeremiah 12:5
By Pastor Paa Khai
***************
Hun nunung ih cih pen bang hun pan kipan hiam? Mihing khat leh khat ih hun nunung bel kibang hetlo mah ding hi. Ih sihma nuntakna hunsan theih lai teng ei adingin hun nunung ahihi. Thuhilhsia 9:12 ah “Mihing in ama hun ding thei ngeilo hi. Thangah a awk vasate le ngen-ah a awk ngasate tawh i kibang hi” na ci ahih manin ih damlai tak mah hun nunung kici thei hi.
Kawlgam hoihlohna leh Zogam buaina, Leitung gamvai tuamtuam hangin gal kidona hangin hunsia ih citek hi. Ahih hangin 2 Timothy 4:2 na ah hunhoih hunsia cih khen tuan loin Pasian thu hilh ding na kin ngaihsut nading, lungduaina tawh mite’ lungsim zo-in, mite taai-in, hanthawnin na hilh nadingin thu a hong pia ka hi hi na ci ahih manin thutawm khat kong hilh kong tai ding hi. Hih LST mun tungtawn in, ei ih hoihnak leh hunsia hun hoih omtuan saklo in lungdamna thu ih gen ding sawlna mawhpuak hong kipia ciat hi.
2 Timothy 4:3 na ah agen sa mah bangin: Mite in kihilh kitai khawng a zaknop loh hun angaih nop loh hun, amaute deihna bek a zuihnop hun hong tung ding hi ci agensa ahihi. Hong hilh hong tai ding mi a omlaiteng ahampha ih hizaw hi. Hong kikin nawnloh ciang asuak nuam suak henla, a utvua leh Hell gam tung hen hong kicih ciang hong ki awlmawh nawn vetlo cihna hi in, dah huai mahmah ta hi.
Den a dotna ah lutkik leng hun nunung bang hun pan kipan hiam? Adventist te ih sandan ah Mangmuhna 13 leh Daniel 7 na ih genkholhna tungtawn in Sapi liamna ngah in adamta hi cih genkholhna tungtawn in 1798 AD khit akipan Zeisu nih veina hong k*mkik d**g hun nunung ci in ki ciamteh hi. Hun nunung ciang a hong piang ding genkholhna teng ih neutung pan ih zak sasa ahihi. Tua lak ah nih khawng tunai diak in kisam sadeuh ka hih manin kong gen nuam hi.
Khatna ah Sabbath vai: Matthew 24:20 ah T**a Zeisu in Daniel genkholhna atun na ding agenna ah na galtai hun ding uh Sabbath ni leh Phalbi tawh akituah loh nadingin thu nangen un ci hi. Zeisu in van akah khit nangawn ciangin zong, Sabbath hoihtak akitan lai na ding thu na gen hi. Tun Vatican pan hita leh, US k*mpi pan hitaleh Sunday law out nai hetlo napi in, ei Sabbath thumaan pom teng mah in sum deihluatna tawh sum sila kisuak in Sushi sem, company ah OT kuan in Sabbath ni ih palsat ziahziah ta hi. Hatsatna hunsia tung nai hetlo napi in, anopna muh ah ih tuktuk lai hi. Satan khemma in na muktu khin ta hihang.
Nihna ah kikkhop vai: Hunkhat ciang ih innte ah biakpiakna ih bawl theih nawnloh hun hong tung ding hi. Bang hunciang veng hausa leh city thunei ten hong phuang khia ding kithei nailo hi. Tua te a omma nangawn in, ei mahmah in ih pawlpi sung mahmah ah paulap tuamtuam nei a, homecell leh kikhop ih sang nawnloh khak ding ka dah mahmah hi. Pasian hong piaksa ih inn ih lo te amah biakpiak nading in, ih phalnawn loh khak ding ka maizum lua hi. Ih innte ah Pasian kiphat nawn kei in, thu kingen nawn kei leh Pasian alungkim mah diam? Inn neulua, parking kicing lo cih paulap tuamtuam om thei kha ding hi. Hihte pen ong pai ding hong kikhawm ding ten na inn uh neulua parking neikei uhteh ci a hongpailo ahih kei nak leh innteek te paulap ding hi masa lo hi. Inn ah hong kipai nop laiteng lungdam ding hizaw a, hong kipai noploh hun hong tung leh khasia mahmah ding hihang.
Ih paulap te lah dahna sihna ih tuah ciang ih paulap ngam nawn tuan kei ding hi. T**a aw nong piaksa inn leh lo, cidamna nong piak manin innbill ka piakzawh lungdam lua ung e ci a, ih innte Pasian biakpiak nading a, ih zat sak ziahziah ding ahihi. T**a in inn lam kei leh, a lam mite’ nasepna in a mawkna ahi hi. T**a in khuapi hu kei leh, khuapi cingte’ cin’na in a mawkna ahi hi. Late 127:1.
Ama neihsa inn leh lo neih leh lam sum leh pai Pasian aa ding zat aphal lo ten, ama pumpi ngiat zong Khasiangtho tenna dingin phallo lua ding ahih manin Khasingtho tawh akilem lo mi ahihi.
"Those who are unwilling to use their possessions—such as their houses, land, and wealth—for God's purposes will also be hesitant to allow their own bodies to be a dwelling place for the Holy Spirit. Consequently, these individuals, whether men or women, are not in harmony with the Holy Spirit." Source: I Corinthians 6:19-20
T**a in, “put your name here” aw, mite tawh tai kidem a, nang hong gimsak zo uh ahih leh, sakol bangci dem zawh ding na hi hiam? A nopna munah tuk lailai na hih leh Jordan gungei singkawm lakah bang cih ding na hi hiam? Jeremiah 12:5
Ze etna hong pai ma in, kei a puk khin maw?
Haksatna hong tun ma in, kei abah khin maw?
Buaina hong tun ma in, kei ana buai khin maw?
Thunei ten inn ah kikhop ding akhaktan ma in, ken aphallo khin maw?
Zawhthawh thutawh Sabbath ni nasep ding hong kisawl ma, kei akuan khin maw?
“Thu neute tungah a diktat mi in, thu liante tungah a diktat ding hi. Thu neute tungah a diktat lo mi in thu liante tungah a diktat kei ding hi.” Luka 16:10
Genkhialh a om leh T**a’n hong maisak tahen
Veina takpi tawh
Christ sungah
Sia Paakhai
