10/24/2025
ძვირფასო viva opera-ელებო, ჩვენი არაჩვეულებრივი გვერდი 15 წლის წინ დაარსდა და აგერ უკვე 4213 წევრს აერთიანებს. გვერდის წევრები პროფესიონალები და მოყვარულები არიან. მისი დამაარსებელი კი ოპერის უდიდესი მოყვარული და მცოდნე, პროფესიით ბიოლოგი (ბიოტექნოლოგი, გენეტიკოსი, მოლეკულური ბიოლოგი) ცოტნე ჯავახიშვილი იყო. ცოტნე იყო მთასვლელიც, მფრინავიც, … უკიდეგანოდ საინტერესო და მრავალმხრივი ადამიანი … მიჭირს ზმნის “იყო” ცოტნესთან დაკავშირებით გამოყენება, ჯერ კიდევ ვერ ვეგუებით მის ამ ქვეყნიდან გაფრენას პირდაპირი და გადატანითი მნიშვნელობით. მძიმე, დაუჯერებელი და მოულოდნელი ტკივილის საბედისწერო დღე 13 ივლისი აღმოჩნდა …13 ივლისიდან 3 თვეზე მეტი გავიდა და ამ სევდიანი სტატუსის დაწერა გვერდის სამმა ადმინისტრატორმა დღეს მოვახერხეთ მხოლოდ, ისიც ყელში გაჩხერილი ბურთით.../ თამრიკო თურმანიძე / Tourmanidze
« ცოტნეზე, როგორც მეცნიერზე, კონკრეტულს ვერაფერს ვიტყვი, არაა მოლეკულური ბიოლოგია ჩემი სფერო. 70-ანი წლების ბოლოს გავიცანი როგორც მთამსვლელი და მელომანი. ლამის ყოველ დღე ოპერის თეატრში ვიყავით. მაშინ ასაკში 4 წლიანი სხვაობა ძალიან საგრძნობი იყო და მეც, 16-17 წლის ბავშვი თვალებდაჭყეტილი ვუსმენდი უფროს მეგობარს. ვერ ვიტყვი, რომ ცოტნემ უფრო შემაყვარა ოპერა, მაგრამ იმის თქმა კი თამამად შემიუძლია, რომ მისი წყალობით ბევრად უკეთ გავიგე ეს საოცარი სამყარო. ცოტნეს ყოველი რეპლიკა, სერიოზულად თუ ხუმრობით ნათქვამი, ჩემს გონებაში ილექებოდა და ჩემში ოპეროფილს ზრდიდა. მე თუ დღეს ოპერაზე რადიოგადაცემებს ვაკეთებ და ეს გადაცემები ვინმეს თუ მოსწონს, ეს ცოტნეს დამსახურებაც არის. და კიდევ, ცოტნე ერთერთი ყველაზე თავისუფალი ადამიანია, ვინც ოდესმე შემხვედრია. მთა, ცა, ოკეანე, ოპერა - ეს იყო მისი სული.... “ /შავლეგ გეგეჭკორი / Shavlego Gegechkori
“არიან ადამიანები, რომლებიც ბედნიერებისა და აღფრთოვანების განსაკუთრებული უნარით გხიბლავენ და გიზიდავენ, ოღონდ ცოტნეს ეს გრძნობები შეეძლო უსიტყვოდ და უემოციოდ გამოეხატა. შემიძლია ვთქვა, რომ მიუხედავად შოთა რუსთაველის მრავალი თაყვანისმცემლისა, ცოტნეს გარეშე ვეფხისტყაოსანი ყველაზე უერთგულესი და მასში უსაზღვროდ შეყვარებული ადამიანის გარეშე გააგრძელებს არსებობას …” ბაო ყიფიანი/ Bao Kipiani
მთა, ცა,ოკეანე, ვეფხისტყაოსანი, ჩარლზ დარვინი, დათიკო გამრეკელი, არტურო ტოსკანინი, ჯესი ნორმანი, აიდა, ნაბუკო, ტრუბადური, ტრავიატა... ჯუზეპე ვერდი ...ყველას და ყველაფრის ჩამოთვლა შ ე უ ძ ლ ე ბ ე ლ ი ა ...🌹 x 4212 , ...
🔴 საქართველოს უნივერსიტეტში ცოტნე ჯავახიშვილის სახელობის სინთეტური ბიოლოგიის ინსტიტუტი გაიხსნება და დაწესდება მისი სახელობის სამეცნიერო პრემია გამორჩეულ ნაშრომში:
💬 "საქართველოს უნივერსიტეტი ქვეყნის სამეცნიერო ეკოსისტემის გაძლიერების მიმართულებით ახალ მნიშვნელოვან ნაბიჯს დგამს - 25 ოქტომბერს, 10 საათზე, უნივერსიტეტის სამეცნიერო ჰაბის ფარგლებში ცოტნე ჯავახიშვილის სახელობის სინთეტური ბიოლოგიის ინსტიტუტი გაიხსნება. ინსტიტუტის გახსნაზე მეცნიერის სახელის უკვდავსაყოფად და ინოვაციური კვლევების წახალისების მიზნით ცოტნე ჯავახიშვილის სახელობის სამეცნიერო პრემიის დაარსების იდეა გაჟღერდება. სამეცნიერო პრემია მეცნიერებს სამ წელიწადში ერთხელ მიენიჭება საბუნებისმეტყველო მეცნიერებათა სამ კატეგორიაში: ქიმია, ბიოლოგია და ფიზიკა.
ცოტნე ჯავახიშვილის სახელობის სინთეტური ბიოლოგიის ინსტიტუტი საქართველოს უნივერსიტეტის სამეცნიერო ჰაბის ნაწილი იქნება, სადაც უკვე ფუნქციონირებს მოლეკულური მედიცინის ინსტიტუტი და ერთიანი ჯანმრთელობის ინსტიტუტი. ჰაბი ინტერდისციპლინური კვლევითი სივრცეა, რომელიც გააერთიანებს სხვადასხვა მიმართულების მეცნიერთა ძალისხმევას ინოვაციური აღმოჩენებისა და ტექნოლოგიური განვითარების მიზნით. სინთეტური ბიოლოგიის ინსტიტუტის საქმიანობა ორიენტირებული იქნება მოლეკულურ ინჟინერიაზე, გენომურ მოდიფიკაციებსა და ბიოტექნოლოგიურ ინოვაციებზე, რაც ხელს შეუწყობს ქვეყნის კვლევითი პოტენციალის გაფართოებასა და საერთაშორისო თანამშრომლობის გაღრმავებას.
ინსტიტუტში ამჟამად ექვსი მეცნიერ თანამშრომელი მუშაობს, რომლებიც ცოტნე ჯავახიშვილის მოწაფეები არიან. ისინი იზიარებენ ცოტნე
ჯავახიშვილის სამეცნიერო პრინციპებს და განაგრძობენ საქმიანობას მისი ხედვის შესაბამისად.
ცოტნე ჯავახიშვილი გამორჩეული ქართველი მეცნიერი, ბიოტექნოლოგი და მოლეკულური ბიოლოგია, რომლის სამეცნიერო საქმიანობა მოიცავდა გენომურ ტექნოლოგიებს და სინთეტური ბიოლოგიის მიმართულებით ახალი მიდგომების განვითარებას. იგი სწავლობდა თბილისის სახელმწიფო უნივერსიტეტში, მუშაობდა საქართველოში მეცნიერთა ბიოქიმიის ინსტიტუტში, მოგვიანებით კი კარიერა გააგრძელა ამერიკის შეერთებულ შტატებში, სადაც იყო რამდენიმე წამყვანი კვლევითი ცენტრის მკვლევარი და მეცნიერ-მენტორი. 2025 წელს პროფესორი საქართველოს უნივერსიტეტის მეცნიერების გუნდს შემოუერთდა და სინთეტური ბიოლოგიის მიმართულების განვითარება ჩაიბარა.
რამდენიმე თვის წინ პროფესორი ჯავახიშვილი თვითმფრინავით ფრენისას ოკეანის თავზე დაიკარგა. მიუხედავად საერთაშორისო მაშველთა ინტენსიური ძალისხმევისა, მისი პოვნა ამ დრომდე ვერ მოხერხდა.
ინსტიტუტის დაარსება უზრუნველყოფს მისი სახელისა და სამეცნიერო მემკვიდრეობის
შენარჩუნებას და გაგრძელებას. მისი სახელობის სამეცნიერო პრემია კი გახდება სიმბოლო ინოვაციის, გამბედაობისა და სამეცნიერო აღიარების. პრემია ყოველ სამ წელიწადში ერთხელ გადაეცემა მეცნიერებს ქიმიის, ბიოლოგიისა და ფიზიკის მიმართულებით და იქნება აღიარება იმ მეცნიერების, რომელთა საქმიანობაც მნიშვნელოვან წვლილს შეიტანს სამეცნიერო პროგრესისა და საზოგადოების კეთილდღეობაში.
ინსტიტუტის გახსნა და პრემიის დაარსება საქართველოს უნივერსიტეტისთვის მეცნიერების საერთაშორისო სტანდარტებთან დაახლოებისკენ გადადგმული კიდევ ერთი ნაბიჯია, ამავდროულად, აღნიშნული ინიციატივა გამოხატავს პატივისცემას ადამიანის მიმართ, რომლის სიცოცხლე და მოღვაწეობა ემსახურებოდა ცოდნის გაფართოებას და მომავლის მეცნიერების შექმნას" | წერს საქართველოს უნივერსიტეტი
🔻 აშშ-ში მოღვაწე ქართველი მეცნიერი, ცოტნე ჯავახიშვილი, შვეულმფრენით ოკეანეში 14 ივლისს ჩავარდა. ის ამ დრომდე არ უპოვიათ
