01/10/2026
Ishte një kënaqësi e veçantë të kishim mes nesh Prof. as. Dr. Jonela Spahon, dekane e Fakultetit të Edukimit dhe Filologjisë në Universitetin “Fan S. Noli”, një akademike dhe studiuese e shquar në fushën e filologjisë dhe letërsisë shqipe. Prej vitesh, ajo është e angazhuar në kërkime shkencore mbi figurat themeluese të kulturës shqiptare dhe, si pedagoge dhe drejtuese akademike, ka dhënë një kontribut të çmuar në studimin dhe promovimin e trashëgimisë sonë letrare dhe kulturore.
Edhe pse në një kohë relativisht të shkurtër, u zhvilluan një sërë aktivitetesh dhe bashkëbisedimesh me anëtarë të komunitetit shqiptar në Boston, studiues dhe dashamirës të kulturës shqiptare.
Bashkëbisedimi letrar, i organizuar nga Federata Pan-Shqiptare e Amerikës “VATRA” – Dega Boston, u fokusua në figura të shquara të Vatrës dhe të kulturës kombëtare, si Kristo Floqi, Fan Noli, Faik Konica dhe Foqion Postoli. Gjatë këtij takimi, Prof. Spaho prezantoi librin “Themeluesit Korçarë të Komedisë Shqipe”, një botim i mbështetur nga fondet e kërkimit shkencor të Universitetit “Fan S. Noli”, realizuar në bashkautorësi me Prof. as. Dr. Eris Rusin dhe me kontributin e Dr. Ilir Shytës.
Takimi u përshëndet nga Kryetari i Vatrës, z. Mentor Maksutaj, si dhe nga Hirësia e Tij, Peshkopi Theofan Koja. Eventin e përshëndetën gjithashtu regjisori, aktori dhe bashkëthemeluesi i Teatrit të Diasporës, Erand Sojli, i cili recitoi një poezi të Kristo Floqit, si dhe bashkautori Prof. as. Dr. Eris Rusin dhe pedagogu Dr. Ilir Shyta.
Një tjetër takim i veçantë ishte vizita në Universitetin e Harvardit, së bashku me z. Faton Limani dhe znj. Greta Limani, ku u bashkëbisedua mbi librin studimor kushtuar jetës dhe veprës së Kristo Floqit, si dhe mbi botimin shkencor me komedi të Kristo Floqit dhe autorëve të tjerë, si Mihal Grameno, Filip Postoli, Ilo Mitkë Qafëzezi, etj., të sjella sipas teksteve origjinale dhe të shoqëruara me aparat kritik.
Rrugëtimi vazhdoi edhe në Massachusetts State House, ku vazhdoi bisedimi me Theatrin e Diaspores rreth librit “Themeluesit Korçarë të Komedisë Shqipe”, duke theksuar rëndësinë e rikthimit në dritë të veprave të harruara të krijuesve që çelën rrugën e artit dramatik në fillim të shekullit XX në vendin tonë. Këto vepra, edhe pse të shkruara në periudha të largëta, mbartin ende mesazhe të rëndësishme për shoqërinë bashkëkohore dhe meritojnë të rikthehen në skenën teatrale për audiencën shqiptare dhe diasporën.
Librat e dhuruar nga autorja do të bëhen pjesë e bibliotekës së Degës së Vatrës, si dhe e bibliotekës së Universitetit të Harvardit.
Si Theater i Diaspores e falenderojme Prof. as. Dr. Jonela Spahon per sherbimin e madh që i ka bere theatrit dhe dramaturgjise shqiptare me risjelljen ne vemendje te autoreve pionere te theatrit shqiptar.
I urojmë suksese të mëtejshme dhe shprehim dëshirën për bashkëpunime të frytshme edhe në të ardhmen.
