17/04/2021
📚مذكرات عبد الوهاب بن عباد📚
🥇🥇🥇 كتاب من أحسن ما تنجموا تقراوا كان تلوجوا على قصة نجاح تونسي. عبد الوهاب بن عياد، هو تونسي إنطلق من الصفر و تمكن من بناء أكبر مجمع شركات في تونس، اللي تعرفوها الكل "بولينا".
🥈🥈🥈حكى على حياته و كيفاه عرف تونس من نهار اللي حل عينيه على الدنيا. كيفاه كبر في عائلة متواضعة كيما كل التوانسة في الوقت هذاك، قرأ و نجح في قرايته رغم صعوبة التعلم اللي كان يعاني منها، و آخير و الأهم، كيفاه حلم و حقق حلمه رغم كل الصعوبات.
🥉🥉🥉من الدروس اللي تعلمها في حياته و يراها أساس للنجاح، أولا الحلم، المثابرة و الانضباط في السعي لتحقيقه، أهمية العايلة و الأصدقاء بش تنجم تبدى مشروعك، التواضع في المعاملة مع الآخرين، و في النهاية، إنك تكون صدق في حب الناس من حولك و حب الوطن.
👨⚕️👨⚕️👨⚕️شد إنتباهي، إنه في آخر الكتاب، عطى نظرته للدين الي لخصه في عمل و حب الخير، نظرته إلى تونس و إيمانه إنها ولادة و فيها طاقات هائلة، إخلاصه أولا لعائلته و أصدقائه و ثمة للعمل.
كتاب، كان تقراه، بش يرجعلك الأمل و يعطيك دفعة بش تبدى مشروعك كانك مازلت متردد.
السعر : 15 دينار.
مدة المطالعة: 5 ساعات.
