02/12/2025
#တိုင်းသုံးတိုင်းတွင် AA က စစ်ကောင်စီ စစ်စခန်း ၅ ခုနှင့် ရွာသုံးရွာကို သိမ်းပိုက်ထား
ဒီဇင်ဘာ ၂
ရခိုင်ရိုးမတောင်တန်းအလွန် မကွေးတိုင်း၊ ပဲခူးတိုင်းနှင့် ဧရာဝတီတိုင်းထဲက စစ်ကောင်စီ စစ်စခန်း ၅ ခုနှင့် ရွာသုံးရွာကို အာရက္ခတပ်တော် AA က သိမ်းပိုက်ထားသည်ဟု ISP Myanmar ၏ အစီရင်ခံစာတွင် ဖော်ပြသည်။
ISP ၏ ဒီဇင်ဘာလ ၁ ရက်နေ့ထုတ် အစီရင်ခံစာ ဖော်ပြချက်အရ မကွေးတိုင်း အမ်း-ပဒါန်းလမ်းပေါ်က စစ်ကောင်စီ စစ်စခန်း နှစ်ခု၊ ပဲခူးတိုင်း ပန်းတောင်းမြို့နယ်က နှစ်ခုနှင့် ဧရာဝတီတိုင်း ဂွ-ငါးသိုင်းချောင်းလမ်းပေါ်က စစ်စခန်း ၁ ခုတို့ကို အာရက္ခတပ်တော် AA က သိမ်းပိုက်ထားကြောင်း သိရသည်။
AA သိမ်းပိုက်ထားသော ကျေးရွာသုံးရွာမှာ မကွေးတိုင်း ငဖဲမြို့နယ် ပဒါန်းကျေးရွာအုပ်စုမှ ပဇီကျေးရွာနှင့် ဂွမြို့နယ်အစပ် ဧရာဝတီတိုင်းထဲက မကျီဇင်ကျေးရွာနှင့် ဘောမိကျေးရွာတို့ ဖြစ်ကြောင်း ISP ဖော်ပြချက်အရ သိရသည်။
မကွေးတိုင်း အမ်း-ပဒါန်းလမ်းပေါ်က သိမ်းပိုက်ထားသော စစ်ကောင်စီ စစ်စခန်းနှစ်ခုမှာ ပဇီကျေးရွာအနီး မျှော်စင် စစ်စခန်းနှင့် ဂုတ်ကြီး စစ်စခန်းတို့ဖြစ်ပြီး ယင်းစစ်စခန်းများအား အောက်တိုဘာလ ၉ ရက်နေ့တွင် AA က သိမ်းပိုက်ခဲ့ခြင်းဖြစ်သည်။
ပဇီရွာသည် လက်ရှိတိုက်ပွဲပြင်းထန်နေသော နတ်ရေကန်ဗျူဟာကုန်းတပ်စခန်း၏ အရှေ့မြောက်ဘက် ၃ မိုင်အကွာတွင်ရှိပြီး အမှတ် (၉၀၅) အမြောက်စခန်းကွပ်ကွဲမှုဌာနချုပ်နှင့်လည်း နီးကြောင်း သိရသည်။
ပဲခူးတိုင်း ပန်းတောင်းမြို့နယ်က စစ်ကောင်စီ စစ်စခန်းနှစ်ခုမှာ ပုဂံဂွေ့ (ပန်းကန်ကွဲ) ကျေးရွာ တောင်ဘက် ၅ မိုင်ခန့်အကွာရှိ ၆၆၆ ပွိုင့်ကုန်းနှင့် ပန်းတောင်း-တောင်ကုတ်လမ်းပေါ်ရှိ မိုးထိတောင်စစ်စခန်းတို့ကို AA က သိမ်းပိုက်ထားခြင်းဖြစ်သည်။
ပန်းကန်ကွဲ ၆၆၆ ပွိုင့်ကုန်းကို အောက်တိုဘာလ ၁၄ ရက် နံနက်ပိုင်းတွင် သိမ်းပိုက်ခဲ့ပြီး မိုးထိတောင်စစ်စခန်းကို ဇန်နဝါရီလ ၂၆ ရက်တွင် သိမ်းပိုက်ခဲ့သည်။
ဧရာဝတီတိုင်း ရေကြည်မြို့နယ် ငါးသိုင်းချောင်းမြို့အနီးက စစ်ကောင်စီ၏ အမြောက်တပ်ရင်း အမှတ် ၃၄၄ အနီးက ကာကင်းစခန်း ၂ ခုထက်မနည်းကို ပြီးခဲ့သည့်လအနည်းငယ်အတွင်းမှာ AA က သိမ်းပိုက်ခဲ့ကြောင်း သိရသည်။
အမှတ် ၃၄၄ အမြောက်တပ်ရင်းကို အာရက္ခတပ်တော် AA က သိမ်းပိုက်နိုင်ရန် ယခုနှစ်ဆန်းပိုင်းကစ၍ ဒေသခံပြည်သူ့ကာကွယ်ရေးတပ်ဖွဲ့များဖြင့် ပူးပေါင်းထိုးစစ်ဆင် တိုက်ခိုက်နေခြင်းဖြစ်သည်။
လက်ရှိ အာရက္ခတပ်တော် AA သည် မကွေး-ရခိုင်အစပ်ရှိ နတ်ရေကန် လေကြောင်းရန် ကာကွယ်ရေးတပ်စခန်းကြီး၊ ပဲခူး ပန်းတောင်းမြို့နယ်က ကပစ ၆ အနီးနှင့် ဧရာဝတီတိုင်း ရေကြည်၊ လေးမျက်နှာ၊ သာပေါင်း မြို့နယ်တို့တွင် စစ်ကောင်စီတပ်နှင့် တိုက်ပွဲပြင်းပြင်းထန်ထန် ဖြစ်ပွားနေဆဲဖြစ်သည်။
ရခိုင်ရိုးမတောင်တန်းအလွန်က အာရက္ခတပ်တော် AA ၏ ထိုးစစ်များသည် အာဏာသိမ်း စစ်ကောင်စီ၏ ကာကွယ်ရေးပစ္စည်း ထုတ်လုပ်သည့် စက်ရုံ ကပစ ၆ နှင့် ကပစ ၁၄ တို့ကို ဦးလျက်ရှိကြောင်း ISP Myanmar က သုံးသပ်ထားသည်။
မကွေး၊ ပဲခူးနှင့် ဧရာဝတီတိုင်းတို့တွင် စစ်ကောင်စီ၏ ကပစ စက်ရုံ ၂၂ ခုရှိပြီး ၁၆ ခုသည် ဧရာဝတီမြစ်၏ အနောက်ဘက်ခြမ်းတွင် တည်ဆောက်ထားသည်။
AA ထိုးစစ်များမှာ ကစပ စက်ရုံများသို့ ဦးတည်လာသော်လည်း ရခိုင်ကမ်းရိုးတန်းဘက်တွင် စစ်ဆိုင်ထားရမှု၊ သိမ်းပိုက်ပြီးပါကလည်း ထိန်းချုပ်ထားရန် ခက်ခဲမှုများကြောင့် ကပစ စက်ရုံများအား သိမ်းနိုင်ရန် မလွယ်ကူသေးကြောင်း ISP Myanmar က သုံးသပ်ထားသည်။
အာရက္ခတပ်တော် AA သည် ရခိုင်ပြည်အတွင်း မြို့နယ် ၁၄ ခုနှင့် ပလက်ဝမြို့နယ်တို့ကို သိမ်းပိုက်ထားပြီး ရခိုင်တွင် သိမ်းပိုက်ရန် ကျန်ရှိနေသေးသည့် စစ်ကောင်စီ ထိန်းချုပ်မြို့ စစ်တွေ၊ ကျောက်ဖြူနှင့် မာန်အောင်မြို့တို့ကို သိမ်းပိုက်နိုင်ရေး ကြိုးပမ်းနေသည်။
AA ၏ စစ်ရေးလှုပ်ရှားမှုများသည် ရခိုင်ပြည်အပြင် ချင်းပြည်၊ မကွေးတိုင်း၊ ပဲခူးတိုင်း၊ ဧရာဝတီတိုင်း၊ ကချင်နှင့် ရှမ်းမြောက်တို့တွင် ရှိနေပြီး စစ်ကောင်စီ၏ တပ်စခန်း၊ တပ်ရင်းများအား သိမ်းပိုက်နိုင်ရေး ထိုးစစ်ဆင်တိုက်ခိုက်နေသည်။
#အာရက္ခတပ်တော် #စစ်ကောင်စီ #တပ်စခန်းများသိမ်းပိုက် #မကွေး #ပဲခူး #ဧရာဝတီ #ရခိုင်ရိုးမတောင်တန်းအလွန်
#ပြန်လည်ကာမျှဝေခြင်း
#ကျောက်ဖြူသားသျှေ
