18/09/2026
𝐍𝐚 𝐓𝐥𝐚𝐢 𝐇𝐫𝐢𝐡 𝐋𝐨 | 𝐓𝐡𝐮𝐚𝐧𝐭𝐡𝐮 𝐅𝐢𝐦 | 𝐓𝐡𝐞 𝐂𝐡𝐢𝐧 𝐒𝐭𝐨𝐫𝐢𝐞𝐬
---
𝑲𝒖𝒎 29 𝒂𝒉 𝒂 𝒉𝒍𝒂𝒘𝒉𝒕𝒍𝒊𝒏𝒈 𝒍𝒐, 30,31 𝒌𝒉𝒂𝒍𝒂𝒉 𝒂 𝒉𝒍𝒂𝒘𝒉𝒕𝒍𝒊𝒏𝒈 𝒄𝒖𝒂𝒏𝒈 𝒍𝒐, 𝒂 𝒔𝒊𝒏𝒂𝒏 𝒂 𝒕𝒂𝒘𝒑𝒂𝒉 𝒄𝒖𝒏 𝒕𝒉𝒊𝒍 𝒛𝒊𝒂𝒏𝒈𝒌𝒊𝒎 𝒂 𝒅𝒂𝒏𝒈𝒍𝒂𝒎 𝒕𝒉𝒆𝒉
Mary cu k*m 29 a kim cuahco zoih can khal a feh liam rero.
Zo hmanin na k*m a upa tuk zo ti khal in an ti dah cuang lo nan,
a kiang le kap a k*mrual pawl a zoh tikah anih ai in hmai ih rak thangso le pawl ban nawn lo vekin a theiaw.
A rualpi tha pakhat in rei lo ah pasal a neihsan fawn.
A rual pakhatin amahten inn pakhat a rak lei.
Phunsang kai lai ih a mi theih pakhat cun sinak sangzet a rak ngah.
Social Media a on tinten,
"Neihawknak, inn thar lei ding, dinhmun sang ngah, fa nei ding thu, le
hna tuan tha an ngah thu pawl post pakhat hnu pakhat an ra lang ringring fawn.
Mary cu cui post pawl cu hni phah cun
"Congratulations. Ka lo lungawi pituk" ti lobak ngan ding a nei ve si lo.
A sinan, a phone a vun ret veten, a khaan ah amahte to in thu a sutaw theu.
"Ka nun hi ziang a cang si pei? tin.
Tu k*m 29 a kim zo fawn. Inn a nei thei hrih lo,
Innsang khal a nei hrih lo. Hmaihngaltlak dinhmun sang le a nei lo.
Sumpai a khawl mi sun le hnangamnak tlak in a daih fawn lo.
K*m tampi hna a rak tuan hi san nei lo, thansonak um lo vekin a theiaw.
Hnatuan a dil. Voi tampi hnon a tawng.
Khawkhannak a neih mi khal a pelhsolh theu.
Duhthu a vun sam mengmang nan, pakhat hnu pakhat an ziamral men.
Neta ahcun, a duhthusam le tumtah pawl khal midang hnenih vun sim ding hman a zak lehlam.
Ziangah ti le, a duhthusam le sunmang pawl a rel tikah
"a sile, ziangtik ah ha a cangsuak ding na zum?" an ti cun
Mary cun a sawnlet thei si lo theu ruangah a si.
Cui thusuhnak cu a hrangah theih nuam um lo zet a si.
Cutin k*m 30 a kim.
Mary cun amah le mah cu "Tui k*m cu ka tuahsuak tengteng ding" a tiaw.
Khawkhannak thar tampi a tuah.
Hnatuan tla a zuam sinsin.
Sun ni vu in hna a tuan.
Online class pawl a zir.
Hna tuan dilin a vak.
Cule mahte sumtuahnak nei thei dingin a zuam.
A thawkah cun beiseinak nung a ra suak theu.
A sinan, a beisei vekin a hlawhtling si lo.
Hnatuan a dil mi khalle a hlawhsam.
A tuan duh mi hna hman a ai nauhak sawn midang pakhat in a rak ngah.
Cui zan ah, Mary cu a ihkhun kapte ah cun dai ziarzi ten a to.
Calendar a vun zoh ih. A k*m 30 kimnak a si.
Cun a mithli cu a ra luang.
Voikhat hlawhsam men ruangah si lon, a thawk ih a zuam rero kha har a ti tuk zo.
Nun sinpi vekih a umder theu kha har a ti tuk zo.
Mi cu an thangso ih hma an sawn zutzo a hmuh tikah,
zianghman thahnem lo, a kel le bawr ih tang ringring vekin a theiaw fawn.
A netnak ah cun
"Kei hi ka tha tawk lo si pei maw?" ti mi thanau-ruahawknak tiang a nei thlang.
Cui ruahnak cu mi nun ti se theitu khawruahnak tihnung bik a si.
K*m 31 a hun kim cuahco ih Mary cun zuam a tum nawn lo.
Ka hlawhsam leh ko ding ti ruatin hnatuan a theih mi khalle a siauk ngam nawn lo.
A duhthusam khal a relsuak nawn lo.
Ziangah ti le, a duhthusam pawl khal tuahsuak thei cuang ta hmun lo cu a ningzak.
A suahcam ni khalah lungawi thei nawn ta hlah.
Cui k*m, k*mkhat a vung liam mi cu a hlawhtlin k*m si cuang loin,
a hlawhsamnak vun mangsuaktertu ni le thla men an rak si thotho.
Zankhat cu, a rualpi hlun pakhat thawn zanriah eiin a leng an suak.
Cabuai ah cun an rualza in an dinhmun pawl relin an ruahaw rero.
Pakhat in innthar an sah rero lai thu,
a dang pakhat in fahnihnak a neih ding thu,
pakhat leh in, an zungih sinak sang a ngah thu pawl an rel mi cu
Mary cun a rak ngai khiaukhi men.
Cu laiah, pakhat in thu a rawn sut,
"Mary, nang teh ziangha na bang?" a ti.
Maru cu a ngui ih tongding thei lo'n rei lo te a um lawk.
Cule a vun letsal ih,
"ziang thudang hman rel ding ka nei ve lo ee." a ti san men.
A sinan, cuizan an tlunlam ah cun, a thinlung ah cui thusuhnak cu sawn danding a vun ruatkir rero.
"Zianghman a poi cuang lo pi" tin a tiaw men.
Inn a thlen a cui zanah cun Mary cun a thil pakhat a theihthiam mi a um.
Cucu, a nun le dinhmun kha mi nun thawn tahthim in can a rak cemter theu,
amai duhnak le tumnak taktak kha a rak sutaw dah theu lo hi a si.
Mi tahfung thawn a nun a rak tah.
Mi innsang thawn an innsang a rak tah.
An inn, an thlahlawh, an sinak le an hlawhtlinnak pawl zoh in
a nun a rak tahaw.
Mi pakhatkhat cu anih aiin tuandeuh ih an hlawhtlin a si le,
"Kei ka hlawhsam" ti zawngin a rak ruataw.
Mary cun k*m reipi a rak zoh nawn lo mi Notebook fate pakhat a vun zohih,
a sungah a senlai ih a rak ngan mi a duhthusam pawl a vun hmu.
A rak zir duh mi pawl,
cun tuan a rak duh mi hna pawl,
a fehduhnak hmunram pawl,
a ngan duh mi cabu pawl,
a thiam le paihzawng zirnak pawl,
Cahmai tin, pakhat hnu pakhat a vun zoh.
K*m a hung rei vivo ih, a hmaisabik ah amah le mah ningzah ciamco a tumaw nawn lo.
Cu ai in, a thinlung sungah beiseinak a vun nei tharsal.
A thaizing cu Mary cun thu a botcat ih
"Ziangah kei bul ka hnufual?" ti ih suhawk ai in,
"Khuilam feh ka duh?" ti mi a fiang tum sawn.
A nun cu hmakhatte ah a danglam vurvo cuang lo ih,
cun a nunah thil mak danglam a thleng vukvi khal a si cuang lo,
a sun lala ah, hmakhatte ah a hlawhtling tinak khal a si cuang lo.
A sinan, thil pakhat tuah mi a neih cu "a tir ihsin a tuahthawhsal" kha a si.
Kar khat teten a kar, thiamthil pawl a zirsal,
Freelance hna pawl a tuan,
a hlawh sumpai malteten a khawl,
ca a siar, hna a tuan, cuti si na cingin a sungcan a um lai hrih ko nan,
tui tum cu "mi santlai lo ka si" tin a ruataw nawn hrimhrim lo.
Sunnak hi "ka ziraw rero lai" ti in khihhmuhtu a si ti a fiang zo.
Thla a liam, k*m a liam vivo ih a nun khal a rawng danglam vivo thlang.
A dinhmun lawng si loin, amah rori khal a thlengaw.
A hahdam thei vivo, a tuarfei vivo Mah le mah rinsanawknak a nei sinsin.
A hlawhtlinnak zawn tla midang va sim rero a tul nawn lo.
Mi dinhmun le a dinhmun khal a tahthim nawn lo.
Cutin zingkhat cu,
a duh mi tak hnatuan thatuk a ngah thu email pakhat a dawng.
Cucu k*m reipi a rak ngah duh kuahko mi a si.
A computer screen cu a zoh ringring ih voikhat a siarsuak,
a lungawi mitthli hal thawn a vun siar nawnsal.
Mi santlai lo a si lo thu le, mi hlawhtling a si zia midang va theihter rero thei kha si loin,
a nunih a fengawk mi cu ziangtik hmanah a rak tlai dah lo.
Mi thawn an zawhmi lamzin a bangaw lo maimai ti hi a si.
K*m tla a rei vivo ih, Mary cun a hlan a k*m 29 laiih a rak buailaiah
a kiangah to in hiti hnemawk a cak zet
"Na hlawhsam a si lo"
"Na k*m a upattuk ruangah a si lo"
"Na tlaituk lo hokhaw"
Na nun-thuanthu na ngan cem hrih lo, na ngan rero lai hokhaw" tin.
Ziangah tile,
Nun ti mi cu kan mai duancia mi cazin vekin ziangkim a cangsuak thluh thei lo.
Sangka thenkhat cu k*m 31 ah a ongaw ih,
thenkhat cu 35 ah, thenkhat cu 40 ah.
Cun a canah, can a heulak men ti ih kan rak ti mi k*m khal,
a ngaingai ahcun, kan thlen ding mi dinhmun thleng thei dingih kan rak remawk reronak can tla an rak si sawn thei.
Curuangah, hi mi video na zoh i, na thinlung ten,
"Mi cu hmaiah an thlengsang ih, kei hmuah a kel le bawr ah ka um"
tin na ruatawk a si le.
Hahdamten thaw vun thaw awla.
Na rualpi thenkhat an rak hlawhtlin hmai ruangah nang na hlawhsam, na sung tinak a si hrimhrim lo.
Na rualpi nupi/pasal an neihawk ruangah na tlai zo tinak a si cuang lo.
Mi pakhatkhat in inn an rak lei thei ruangah, nang na hlawhsam tinak a si lo lawlaw.
Mi pakhatkhat in dinhmun sang sinak a ngah ruangah, na hrang cantha a cem zo tinak a si hrimhrim lo.
Cun, mi dangih an nun cazin tuahmi kha nangih na nun cazin tuah mi a si ve loih,
na zawhding le na thlunding a si ve lo.
Na tlaituk tinak a si lo ih.
Dungah na tang ringring ding tinak a si lo.
Nang cu, na can le na lamzin ah nangmahten na feh rero sawn a si.
Feh vivo aw. Zir peh vivo aw. Zuam peh vivo aw.
Cun, nangmah le nangmah tuaitharaw vivo aw.
Ziangahtile, tui ni ah nasaten zuamih na tuan kha, thaisunah
na ngan rero lai mi na nun thuanthuih a tulzet mi cahmai bungcang pakhat a si thei hokhaw.
Ni nikhatkhat ah, a liamcia can na thlirsal tikah na theifiang vivo ding.
Cucu "Tui na tuah rero mi, na zir rero mi, na zuam rero mi thil ruangah, na tlai phah ih,
mi dungah na tang ringring ding tinak a rak si hrimhrim lo, na zawhding lamzin thasawn na hmuh ih,
awlsamten na feh vivo thei nak dingsawn hokhaw an si".
