12/03/2026
🚨 **ပရော်ဖက်ရှင်နယ် ကစားသမားတစ်ဦး၏ စည်းကမ်းပိုင်းနှင့် မြန်မာ့ဘောလုံးလောက၏ ပုံရိပ် - ဘယ်အရာက ပိုအရေးကြီးသလဲ။**
ပြီးခဲ့တဲ့ မတ်လ (၁၀) ရက်နေ့က ယှဉ်ပြိုင်ကစားခဲ့တဲ့ ရန်ကုန်နှင့် ရတနာပုံတို့ရဲ့ မြန်မာလိဂ်ပွဲစဉ်မှာ မြန်မာလက်ရွေးစင်အသင်းခေါင်းဆောင် မောင်မောင်လွင်ဟာ ပွဲကြည့်စင်ပေါ်အထိ တက်ကာ အမျိုးသမီးပရိသတ်တစ်ဦးကို ကိုယ်ထိလက်ရောက် ကျူးလွန်ခဲ့တယ်ဆိုတဲ့ ဖြစ်စဉ်ဟာ လက်ရှိ ဘောလုံးအသိုင်းအဝိုင်းမှာ အထူးအာရုံစိုက်စရာ ဖြစ်လာခဲ့ပါတယ်။
တိုက်ရိုက်ထုတ်လွှင့်မှု (Live) ရုပ်သံမှာတင် အဆိုပါအမျိုးသမီးပရိသတ်ရဲ့ "ပါးကို လာထိုးတယ်၊ အရှက်မရှိဘူး" ဆိုတဲ့ အော်ဟစ်သံတွေကို အထင်အရှား ကြားခဲ့ရပါတယ်။ ဒါပေမယ့် စည်းမျဉ်းအရ အနီကတ်ပြ ထုတ်ပယ်ရမယ့် အခြေအနေမျိုးဖြစ်နေသော်လည်း ကွင်းတွင်းမှာ အရေးယူခံရခြင်းမရှိဘဲ ပွဲပြီးဆုံးတဲ့အထိ ဆက်လက်ကစားခွင့် ရသွားခဲ့တာကတော့ ပရိသတ်တွေကြားမှာ ကြီးမားတဲ့ မေးခွန်းထုတ်စရာတစ်ခု ဖြစ်လာခဲ့ပါတယ်။
မျက်မြင်သက်သေတွေရဲ့ အဆိုအရ အဆိုပါအမျိုးသမီးဟာ ကစားသမားတွေကို အမြဲလိုလို အော်ဟစ်ဆဲဆိုလေ့ရှိသူဖြစ်ပြီး၊ မောင်မောင်လွင်ဘက်ကလည်း ယင်းပွဲစဉ်မှာ သူဟာ လူမျိုးရေးခွဲခြား စော်ကားခံခဲ့ရကြောင်း လူမှုကွန်ရက်ကတစ်ဆင့် ပြန်လည်ရှင်းလင်းထားပါတယ်။
မည်သို့ပင်ဆိုစေကာမူ... ပရော်ဖက်ရှင်နယ် ကစားသမားတစ်ဦး၊ အထူးသဖြင့် နိုင်ငံ့လက်ရွေးစင် အသင်းခေါင်းဆောင်အဆင့်ရှိသူ တစ်ဦးအနေနဲ့ မိမိ၏ စိတ်ခံစားချက်ကို အပြည့်အဝ ထိန်းချုပ်နိုင်စွမ်း ရှိဖို့က အလွန်အရေးကြီးပါတယ်။ ၂၀၂၄ ခုနှစ်၊ ဒီဇင်ဘာလတုန်းကလည်း အင်ဒိုနီးရှားနဲ့ပွဲအပြီးမှာ ပရိသတ်ကို လက်ခလယ်ထောင်ခဲ့တဲ့အတွက် အသင်းခေါင်းဆောင်ရာထူးကနေ ဖယ်ရှားခံခဲ့ရဖူးတဲ့ သမိုင်းကြောင်းက ရှိနေတာကြောင့် သူ့ရဲ့ စိတ်ပိုင်းဆိုင်ရာ ရင့်ကျက်မှုအပေါ် ပရိသတ်တွေက ပိုမိုဝေဖန်လာကြတာပဲ ဖြစ်ပါတယ်။
လက်ရှိအချိန်မှာတော့ သက်ဆိုင်ရာ တာဝန်ရှိသူတွေအနေနဲ့ ပွဲကြီးကြပ်သူတွေနဲ့ ဒိုင်လူကြီးတွေရဲ့ အစီရင်ခံစာကို စောင့်ဆိုင်းနေပြီး တိကျတဲ့ အရေးယူမှုအပိုင်းကို အဖြေမပေးနိုင်သေးဘူးလို့ သိရပါတယ်။
မြန်မာ့ဘောလုံးလောက ပိုမိုတိုးတက်လာစေဖို့နဲ့ နိုင်ငံတကာအဆင့်မီ ပရော်ဖက်ရှင်နယ် စံနှုန်းတွေ ရှိလာစေဖို့အတွက်... ကစားသမားတွေရဲ့ စည်းကမ်းပိုင်းနဲ့ ပရိသတ်တွေရဲ့ အားပေးမှု ယဉ်ကျေးမှုတွေကို ဘယ်လိုပုံစံမျိုးနဲ့ အကဲဖြတ် အရေးယူသင့်တယ်လို့ ထင်မြင်မိပါသလဲ။
ဒီဖြစ်စဉ်အပေါ် ပရိသတ်ကြီးရဲ့ ပရော်ဖက်ရှင်နယ်ကျကျ သုံးသပ်ချက်တွေကို ကွန်မင့်မှာ ဝင်ရောက်ဆွေးနွေးပေးသွားပါဦး။ 👇
