18/05/2026
Markaad tahay Landar
Libaax laba maaha
Lab baad tahay qoodha"
Aniga oo maalmahan maqnaa nin weyn baa isoo raadiyay—e, aan meerisyadaa sare oo la iga codsaday inyar ka taabto Aftahamadooda. Sida ay u leeyihiin "Libaax lama maaha" ayaa aan u odhanayaa 'hadalku laba ma ahee, meerisyadani waa sax Aftahamo ahaan iyo Miisaan ahaanba, waana Shareere'. Intaas aniga oo aan hadal kale u hollanin iga sii qaddinta. Inyar haddii aan Shareera ha taabto fasirkiisana, (Waa heerka ugu sarreeya ee isku ekaysiinta laba Hummaag) dooddan oo hal'abuurkii midhaha lahaa ay qaar ka duween, waxa aan ku soo celinaynaa xaqiiqada, innaka oo sababayn doonnana waxa ugu horraynba aan saxnaanta siinaynaa hal'abuurka iyo tixdiisa.
Heerka isku ekaysiinta ugu sarreeya weeyaan shareeruhu, labada Shay ee la isku shareeraayo na waxa la iskaga dhigayaa hal mid, taas oo la macne ah haddii aad shayga wax loo shareeraayay taqaannid, in aad shayga la shareeray ka maaramaysid inaad fahamtid sifihiisa. Aan si kooban u soo qabto, (Axmed waa libaax) (Waxaad tahay buur) (Waxan ahay Dayax) (Indhahaaga dhayda ah) iwm, dhammaan waa Shareere. U kaalay haddaba halabuurku waxa uu shareeray iyo cidda uu u shareeray. Hal'abuurka meerisyadan sameeyay waxa uu shareeray dadka reer Soomaaliland, isaga oo aan u kala qaadayn lab iyo dheddig, yar iyo weyn, masuul iyo shacab. Waxaana uu ku shareeray Libaax, waliba Libaax lab ah ayaa uu ku shareeray. Halka uu iskaga shareerayna waa (Sifaadka lagu yaqaanno libaaxa labka ah oo dhan, haddii ay tahay xoog, adkaysi, geesinnimo, xarrago, hanweyni, sharaf, burji iwm...) sidaas awgeed, yaa ah (Laandar?) waxa ah Laandar bulsho ka kooban qayb walba oo ay bulsho tahay. Haddaba marka aad tahay Laandar, Libaax laba maahee, Lab baad tahay Qoodha) bulsho wada bulsho uun ma aha, ee bulshada Soomaaliland waxa ay ku sifaysantahay summad kaste oo halabuurku uu Libaaxa labka ah ka qaatay, taas oo aan inyar idinkala wadaagay.
Ciddii wax kale ku haysataa waa halkeda. Ciddii Aftahamo ku haystayna waa intaa warku. Ciddii doodda ka du'day ee lab iyo dheddig u qaybisay Shareeruhuna, BULSHO ayaa la shareerayaa, laguna shareerayaa LIBAAX; maxay kale?
