https://www.facebook.com/105587585578500/

Cadnaan-Qabyotire, Hargeys, Hargeisa (2026)

02/07/2026

JACAYL DAACAD NOQON WAAYAY💔

Jacayl daacad noqon waayay
Waa lagu duloobaaye
Hadmuu keenu door yeelan?

Inkastoo dareenkaygu
In aan dalacno mooyaan e
Inu damo ka dhawraayay
Doonistaydii noqon waydey
Darajadii ka gudbi waayay

Anigoo ku dacal jooga
Qalbigayga kuu dayray
Dhana kaaga durki waayay
Waxad igu dagaalayso
Daw waan u heli waayay

Anoo uunka kaa doortay
Oo dayaca kaa dhawray
Dalabkaaga helistiisa
Dagdag kuugu wada heelan
Amaantaada ku da’daala
Adna cadhada dayn waydey

Anigoo ku deeqsiiya
Dooddihiyo hadalkayga
Weedh dabacsan mooyaane
Duris aan ku maqashiinin
Aduu dayro ii yeeshay

Dabnahaygu haasaawe
Iyo hadal wax deeqaaya
Maad u hurin dareenkaasi

Marku daalo maankaygu
Nasiimadaan la doonaayay
Ruuxdaydu dagi waydey
Dagannaanta hiban waayay

Marka aan dabiibaayo
Halka adiga damaqaaga
Adna boogta i daloosha
In aad dooxdo mooyaan e
In aad duubto garan waydey

Markan dawo ku siinaayo
Adiguna deebaaqyo
Dabnahayga seemaashay

Marka aan ku doonaayo
Si aan kuugu dayo raali
Adiguna dagaal baaqdey

Markaan kuu ducaynaayo
Adna eed i daba qaaday

Markaan daacad kuu haaday
Adna dabino ii oo qooshay

Markaan dugsi ku siinaayo
Adna dhaxanta ii daysay

Markan magac la doonaayo
Maamuuska dunjigaaga
Darajiyo hufnaan geeyo
Ana kayga dahrigiisa
Dal’daloolo ii yeeshay

Markaan dayax kuu saaro
Daruuraha samada jooga
Xidigaha dalxiiskooga
Cadho durugta mooyane
Duco kaama soo yeedho.

Markaan fuliyo dookhaaga
Fidmo iyo dar mooyaane
Farxad ilama doon-doontid

Anigoo dulqaadkayga
Dusha kugu hagoogaaya
Adna dacwedo igu oogtay.

Anoo mudni la doonaaya
Maansada dabuubtayda
Maamuus ku deeqsiiya
Adna meesha doogtayda
Dab ku shiday itaalkaaga

Muxubada daraaddaada
Anoo Malab ku deebsiiyay
Adna Dacar i leefsiiyay
Si aan kaaga dudo weeyi

Marka aan ku dacal joogo
Si duruufta dhinacaaga
Kaaga duwo dabaysheeda
Waxad mooday doorkayga
Doqoniimo ii gaara

Marka aan ku doonaayay
Danayntayda kuu saaran
Dabnahayga kuu heelan
Daciifnimo ku miisaantay

Waxaad adigu doonayso
Marka aan ku dagdagaayo
Dadaalkiyo hanayntayda
Dayac baad is tidhi weeyi

Daacadnimo markaan joogo
Deelqaafka kaa dhawrey
Doqoniimo iga moodday

Dabcigiyo wanaagayga
Dirnaantiyo hufnaantayda
Danna laawe igu sheegtay

Adigoon hankay doonnin
Si aan kuugu dalacsiiyo
Markan darajo gaadhsiiyay
Dardartiyo awoodeyda
Ducufnimo ku maamustay

Halkaad adigu doonayso
Guusha aan la doonaayay
Waxa aad isaga daysay
Da’daalkayga qarintiisa

30/11/2025

18/06/2026

LAXAW❤️

Liishaanka xubigiyo dareen,laydhan i haleeshay
Wadnahayga leebaa ku yaal,ku laxaad sadaye
Litaaqada i haysaan arkaa,oonan ka ladayne
Dareenada i lig ligayaa,waa kun libin laabe
Dawadii ladnaantiyo isii,laabta iyo maanka.

Jawharad la moodyeey adaan,loofka ku sudhaaye
Sifa'haaga luulkaa hadaan,laan ka mida sheego
Lib'dhadii cadceediyo dayuxu,waa ku daba luude
Jawigaad labaysaa markaad,socod ladaab-taaye
Lab lu' looday goortay arkaan,laaca quruxdaada
Lugahooda quwadbay helaan,laafyo xara'goode
Dhadigaad u tahay laambadoo,eegta laydhkaaga.

Laxawsiga dareenkiyo kashaan,siiyay laqintaada
K**a leexan ayaan qudha oo,waan ku loognahaye
Lilaahida adaan kuu ahee,hayga lumin huuno.

Guulaha la gaadhana haduu,aadmi laban laabo
Waxa tahay lib aan haysto oo,qoorta lay sudhaye
Luuqdiyo codkaagaan dhugtaa,layl habeenkiiye
Ii lingaxan taswiirtaadu,loogo say tahaye
Laqwigiyo xumaha inaga dhawr,waa luggid-deene.

Liidasho anoo eeday-oo,law ka dhutinaaya
Naf laciiftay lay moodaya-oo,liigo kicin waayay
Labiskaaga goortaan arkaan,laba dig leeyaaye
Liibaantaydu waxay saarantahay,luunka dabintaada.

Laca'laba hadii ay dhici lahayd,malag la laa'luusho
Wadka leexi baan odhan lahaa,waase la helayne
Jidka ina Siraad laguma marshe,waan ku lalin'laaye
Jana'daan ku laboobi lahayn,laagi'hii fardawsa.

Qofyohow ladnaantaa ku dagay,waanan laasimaye
Laxawgii xanuunkii i daa,leebka igu yaale
Sida aad lurkii iiga tirtaan,kuugu loognahaye
Biladiyo lilaahida ayaan,kugu ladha'yaaye
Ku laafyoo naftaydani adaan,laabta kuu furaye.

Kol hadaad lubiga igu qaaday oo,lulasho ii diiday
Xushmadiyo qadarin liicsamayn,kugu lamaaneeye
Luxdanaanta weeyee jacayl,liifid ka ilaali
Luflufkiyo ka xeer nacabku,luxidka yay goyne
Warka sheeda loo laliyo dhaaf,waa laciifnimo e
Liska caashaq adigaa hantee,daacad u ladaabo.

Laxaw 11/2022
Cadnaan-Qabyotire.

15/06/2026

WAA MAALMIHII🕰️

Waa maalmihii
Murugada qalbigu
Ay i mirkici jirtee
Isla maahi jiray

Waa maalmihii
Ruuxdaydu mugdi
Dhex mushaaxi jirtay

Waa maalmihii
Maankaygu gabi
Xasuusaha murgacan
Uu mulaaqi jiray

Waa maalmihii
Meeshaan jiriyo
Meshaanan jirin
Isku kay mid haa

Waa maalmihii
Nolashayda macno
Iiga muuqan jirin

Waa maalmihii
Madashaan tagiyo
Taanan tagin markaa
Midh’ is dhaamahayn

Waa maalmihii
Madaxayga culus
Laygu miiso hawl
Aan mar-dhafan jiray

Waa maalmihii
Meel goonniyiyo
Kalinimo muddaxan
Aan mabsuud ku haa

Waa maalmihii
Mugdiyada dhexdood
Aan marmari jiree
Maarre’ raadin jiray

Waa maalmihii
Maskaxdayda togan
Boqolaal masalo
Igu moosi jirtay

Waa maalmihii
Muuqaygu gabi
Midab gooniyaa
Ii malxiisi jiray

Waa maalmihii
Mawjadaha gig’laa
I madluufiyeen

Waa maalmihii
Wax kastoo macaan
Aan ka maarmi jiray

Waa maalmihii
Rabi yaa Macbuud
Wardigaygu mirto

Waa maalmihii
Aan masuugi jiray
Nolashaydan madhan

Waa maalmihii
Maalkaan hayiyo
Kii iga maqnaa
Midna ii darnayn

Waa maalmihii
Mitit noqosho iyo
Is maqiiq badnaa

Waa maalmihii
Saaxiib Murtiyo
Kii ii macaan
Ii mase ahaa

Waa maalmihii
Miski carafta iyo
Dumar Muunnaddood
Ka muquuran jiray

Waa maalmihii
Malagyada qarsoon
Aan magansan jiray

Waa maalmihii
Mihna’dayda iyo
Macnahayga da’dan
Inu muuqdo rabay

Waa maalmihii
Mixnadoo dhanniyo
Muranada necbaa

Waa maalmihii
Maankiyo jidhkaba
Aan maxbuuska haa

Waa maalmihii
Maalay qadhaadh
Intan miirto cabo
Aan mawjaddaha
Dhex muquuran jiray

Waa maalmihii
Marka uunku hurdo
Intaan madal cidlo ah
Ka samaysto meel
Kasha miran jiree
Masalooyin badan
Aan u Macalin haa!

Waa maalmihii
Aan musaafir haa

Waa maalmihii
Uunka maagi jiray

Waa maalmihii
Fikir igu mudnaa

Waa maalmihii
Tixda maali jiray

Waa maalmihii
Wardi meerin jiray

Waa maalmihii
Bunka kiisa maddow
Aan miisan jiray

Waa maalmihii
Isla murmi jiree
Nafta maagi jiray

______________
Waa maalmihii
September 2025
Hargeysa
Cadnaan-Qabyotire

11/06/2026

XAQIIQADA DAYR KA DHIGO

Dareenada hawasha baddan
Wax ay dumiyaan kashee,
Digriga qalbi'gaaga saar.

Balaayada daaha ka xidho
Digtoonida guul ku gaadh,
Daryeelka ku soor naftaa.

Darbiga baahida adkee
Duruu'faha hawlo badan,
Dul qaadka hankaaga saar.

Dabciga guulaha rikiba
Hadii lagu sii durkana,
Mar buu darajada heliye,
Wixii dayriya u diid.

Dayuxu nuur buu sidaa,
Cadceedu da'daal la mida,
Dadkaa doorkaa ku jira,
Markii aqli lagu dab xidho.

Damaca sooyaalka haya,
Wuxuu diirada ku hagi,
Dariiqyada lagu aflaxo.

Markii dardar laysku xullo
Dahaadho xidhmaa furmee,
Dalqada hawlaha dhex qaad,
Ku durug guulaha nafyahay.

Dilaaca ku yaal qalbiga,
Hadii dawadiis la waayo,
Baryadda Eebaa dabiibta,
Daqiiqado kugu bogsiisa.

Dufaannada yoolka buuba
Waxa ay dumiyaan adayge,
Xirfadda lagu diido yeello.

Markaad darajooyin hayso,
Makhluuq kale kaama duwo,
Wax aad dalaba'taad heshaaye,
Dariiqyadda libin ma taalo.

Dalaalimo meel la sudhay,
Hadaad war ka doon tidhaa,
Waxa ay kugu duubi uun,
Siday ugu duuban tahay,
Halkuu dacalkeedu yaal.

Damaashaad ruux ku jira
Dayacay hawl uu lahaa,
Wax uu iska diida'yaa,
Si ay run u duubntahay,
Wax uu duwayaa aqliga.

Wax aan se ku doodayaa,
Dantaadu halkay ku taal,
Dulqaad baa lagu tagaa,
Da'daal iyo dhabar adayg,
Mar baa dibjir loo noqdaa,
Dacarta lagga quud dhigtaa.

Dabbaylaha guuxa iyo
Daruuraha samada jira,
Dar baa kartidood ku daga,
Ku daabacay magac yadood,
Waxaa se ku daaban taas,
Kal ay doonistu hagayso.

Adoo digdigtaba awoodin
Daciif laysk**a dhigee,
Marbaa daal muujiniyo,
Dakaan lagu hawl galaa.

Dhul uu jiilaal dareeyay
Diraacada ku hooraysaa,
Waxaa dabnaheega yaal,
Dareentiyo doog baxee,
Wakhtiga doorkiisa weeyi,
Iftiin iyo dugul wareega,
Sunnaha nolashaa u dayra.

Siduu arin dood u yahay
Waxaa lagu door bidaa,
Daloolka ku yaal Irbade,
Cilmigu waa daare dhise,
Wax uu dumiyaa jahliga.

Alifka lagu daa'dahdiyo
Aqoon lagu doog dhabtaa,
Wax ay shidaysaa dabkoo,
Qoryaha iska daatay iyo,
Wixii Dogob ooli lahaa,
Dariiqyada layska marro,
Danbay ka dhex baadhaysaa.

Wixii Damal meel ku yaal
Markuu roob dhibica daadsho,
Qoyaan dar'dhinaaya ruuxda,
Markii daas dhisa la yidhi,
Dugsoon lagu diirsadiyo,
Sidii da'do looga baxay,
Wax aan uga duur socdaa,
Aqlaa laa dunidii badalay,
Cilmaa lagu sii durkiyay.

Intii dabin laysku dhigo
Adoon dib ka eeg is odhan,
Duruuftaa lagaa bartaa,
Intii dakhariyo xanuunle.

Dar daaran sii adkaynta:
Jibaa dunidani dhex taal,
Dabayl fooraha u eeg e,
Halkuu shar ka soo dusiyo,
Furee daaqadaha banaan,
Si aan doolaalo fogi,
Jidkii guulaha u duwin.

Wax aan dux ku sheegay iyo
Tusaalaha door u muddan,
Anoo dacal qudha banayn,
Duntii maansada xidhxidhay,
Daliilo cad ku beer fariin,
Wax aanse ku dabool is idhi;
Halkay dulucdeedu tahay
In aan ku dawaariyee,
Waxa aan waanada ku daray;

Wakhtiga dayac kaaga lumay
Adoon uurkaaga durin,
Darsaa laga sii bartaaye,
Khiyaalka adoon ku doodin,
Dugaal waayaha ka dhigo,
Dadnimo shaadhkaa ka dhigo,
Dulqaad dugsigaa ka dhigo
Kashana daacada ka dhigo,
Dambiga cadawgaa ka dhigo,
Samaha dariskaa ka dhigo,
Dadaalka jacayl ka dhigo,
Runtana dunidaa ka dhigo,
Hubsiimada daar ka dhigo,
Ducada faralkaa ka dhigo,
Xaqiiqada dayr ka dhigo.
_______________________________
Xaqiiqda dayr ka dhigo 2022,
Cadnaan-Qabyotire

10/06/2026

Dhugashada aqoontiyo xiskuu Eebe kugu dhaabay
Dhaqankii haweenkiyo asluub-taad, dhaaftay idilkood e
Mudh ka tidhi dhamaantii khalgiga, muunad iyo dheeg ba

Dhiiranida adaan kaa helaa, dhaqan gobeeddeeye
Dhaymaha naftaydiyo hankaad, dhool u tahay wayn e
Dhabannada ilmada adiga ka tira dhaayihiyo wiilka

Kuma dhaafo abaalkaad dhigtaa, dheef u helayaaye
Ku dherarnid ruuxdiyo wadnaha, dhiiga unuggayga
Dhayaliyo ciyaar kaaggama tago dheeman iyo luula

Dhaawaca xasuustiyo kashaad dhayi taqaanaaye
Dhamidayba ruuxdaad tartaa dheefta iyo guul e
Magacaaga inaan dhawri baan dhaar ku marayaaye

Dhan kastaba adaan kaa heloo dhiiga wada raacay
Dhaxal weeyi wanaagaad qabta, waana dhalankaay e
Kugu dhigay, kugu dhaatay qalbiga, meesha ugu dhawrsan.

Hees❤️📝

Cadnaan-Qabyotire

09/06/2026

RAJO AAN BURBURI KARIN❤️

Binayntiyo farshaxankiyo
Faaya'haagan bilista ah
Dabcan dhaayo biish-day
Qurux daada buux-santay
Bilyan jeer Narruurooy
Naf baxaysay way hayn

Ana waxan u ahay basta
Haddaan kuu waramo bu'o
Kuu baanno innan yahay
Kuu bur-qado xasuusaha
Haatan igu barooga ah
Biluwgiyo dhamaadkaba
Bogbog kuugu wada taxo:

Billow waxan ka dhigayaa
Barigeennii kulantida
Maalintii is barashada
Goobtii wax barashada

Burjigaaga hirayaa
Bigta daymadii h**e
Jidhka Baar illaa Hoos
Ashkraar ku baashaal
Xubin-xubin u ba'bac dhige
Beer nugaylna igu keen

Aniguna baraad li'
Badda dhaygag kugu noqoy
Arag-tiduna igu beer
Ina aan ku beeg-sado
Haasaawe ku balano

Markii aan is idhi bogta
In kastood i boqortood
Iga dhigtay qof Baashira
Maad fullin bu'a-aygii

Aniguna is bixin waa
Beer qaad siyaado ah
Is ban-baanin kari waa
Taba'shada ka bixi waa:

Baraad-lida aan gallay
In ay sii bullaashiyo
Baawar noqoto mooyiye
Maan helin baxnaanayn

Jacaylkaagu igu baday
Wadnahaygu bogsan waa
Xaalkaygu barak-oow

Baaqiyo yabooha'ha
Codsigayga oo bilan
Bara'haaga kuu dhigay
Waydigii i baal maray
Fariintayda aan bogan

Baahi'daadu igu taran
Adna iima aad bixin
Balse kaama aan hadhin
Aniguna is beer-qaad
Boohiintaydu dami waa

In kas toon is kaa baray
Libintayda oo badan
Isku kaa ban dhigay jeer
Haku bogoto odhan jiray
Buuxin waa hankaagii
Dhaaya'haaga bili waa

Si kastoon bariiddiyo
Salaan boqran u soo diro
Farxadiyo bashaashuhu
Booqashada tan dhaafkii
Xummad igama ay bi'in

Xiisahaagu igu baah
Igu sii bullaal uun
Boog xanuunta igu noqoy

Adoo adigu i baal maray
Ana baaqsan kari waa

Adoo adigu burinaya
Ana raali kugu badshe

Araggaaga u buseel
Bil-dhaantaada u hilloow
Bartaad joogto soo aad
Bariiddooyin kuu keen

In kastoo ay Buun-diyo
Bir xadiid ah igu tahay
On boggaaga hananeyn
Waan bilkeediyaa uun
Rajo aanna burburayn

Ilaa barashadaadeenii
Jacaylkaagu igu baday
Doonistaydu bixi waa

Sawirkaad ku bogan karto:
Han kuu baah-day Dhooleey
Hal beeggiisu wuxu yahay
Wuxu haatan bogsa'shada
Dawo uu ka baadhaa
Baaliyada xasuusaha
Badh kamida ayay tahay
Kombaskiyo bartii h**e

In kastooy is biirsheen
Sannadduhu bateen uun
Baladkaan ku kullanniyo
Bugacaddii xasuusuhu
Wali Maanka k**a bi'in.

Jaam-caddiyo buugtiyo
Barxaddiyo galaaskii
Marku buuqu igu furmo
Waa aan u baah-daa
Bal in aay i daa'yaan
Hilow-giyo basaas-yadu

Rajo aana Burburayn
6/3/2026

Cadnaan-Qabyotire

08/06/2026

GARASHADA U DHAGAR NOQO

Ifka ruuxna muu dhalan
Isagoo dhamays jirin
Qalinkiisa lagu dhigin
Dhadhamada arsaaqdiyo
Dheeftuu helaaayo e
Dhulka galbeedi haka filan
Inu uu dhamays yahay
Dhagar iyo shil mooyiye
Dhaawaciyo ba’mooyiye
Dheef laga cantoobsado!

Haddii ay abaar dhacdo
Oo geeddi kugu dhasho
Laysk**a dhaqaaqo e
Sahan baa la dhawraa
Lagu dhaabadeeyaa
Halka hilaaca dhoolkiyo
Dhibicuu ku onkaddee
Dhakhso looma guuroo
Lama dhibo hayaanka e
Dhalinyaro maqiiqnida
Dhagar iyo shilmooyee
Dhaawac ba’mooyiye
Guul laguma dhalin karo.

Dhan kale haddaan dayo
Saxaraha dhibtaa taal
Balo iyo dhunkaaliyo
Dhaqan liita weeyyoo
Ani waxay iiga dhigtahay
Gacantaada ku dhimoo
Garashada u dhagar noqo.

Dhan kale haddaan dayo
Nin dhintaa ma libin helo
Dhaqashiyo awoodiyo
Dhuddo faanleh laga waa
Dharag iyo tisqaad jira

Dhumuc kuma talaabsado
Daba dhilif u sii dhuray
Karaamda ka dheeraa
Dhafoorkiisu sharaf iyo
Dhabankiisa qurux waa
Ruux dhabcaala lagu sheega
Waxan uga dhag leeyahay
Ninka dhoofay waa dooda
Ka tahriibay waa dhabac
Liidnimo u dhaadhacay
Qof dhaqaaqay waa lumay
Dhimashuu u xaytayoo
Garashada u dhagar noqoy!

Inkastuu Nabigu dhahay
Hadaad nolasha dhibsataan
Nabad gala ee dhalndhool
Dhulka meel u wacan qabo
Anoon dhaafin qawalkaa
Galbeed dhiirgalin ma le
Dhaqashiyo hiraal ma leh
Dhulka xaadha mooyiye
Dharag iyo hufnaan ma leh
Dhigaal iyo aqoon dhaba
Adi kuu dhigmani karta
Dhisme kuu hal tabinkarta
Dhaxal kuu huwayn karta
Marna lagama dheefoo
Dhamysnimo ma buuxshoo
Ciiddaada uma dhigmo
Dhaxal kuuma noqon karo!

Haddii aanba dheeldheel
Qof dhurmaaya kula ahay
Bal dhaad oo yar faallee?
Imisa dhaqaaq baxay
Saxariirka sii dhamay
Uu dhintay facoogii
Magafuhu ka dhaashaday
Laga furtay dhaqaalaha
Ehelkoodu dhiig baxay
Markii uu dhaqaaq yidhi
Uu dhoof u lugo baxay
Badu ay ku dhaaratay
Ina aanu dhaafayn
Maydkiisa soo dhigto
Xeeliga biyaha dheer
Ama cadkood dhargay
Bahal iyada ku dhex nool.

Haddii aanba dheeldheel
Qof dhurmaaya kula ahay
Qab baa igu dhex nooloo
Waxan dhaadayaa wali
Dhalinyaro hagaaggtoo
Dhabdhab iyo run fikirtoo
Dheeldheelka dhaaftoo
Karaamadana dhawrtoo
Cilmigooda dhigatoo
Dhididhkooda maashoo
Dhulka beer ka qodatoo
Sarayntana ku dhimato e
Quudhsiga halaga dhigo
Waxa dhawrsi laga galo.

Inkastuu dhulkeenani
Dhimashada la xidid yahay
Kaa dhacdayna kugu dhacday
Maalin waliba dhaar iyo
Dhagar iyo shidood yahay
Laysku wada dhexnoolyahay
Waxa aanan dhaafayn;
Dhaxan iyo ma laha baraf
Dhidid iyo kulayl ma leh
Gaajo kuguma dhici karto
Hoylaani kaa dheer
Qabku kaama dhiman karo
Dhulkaagaad ku tahay ruux
Ruux la dhaato oo jira!

Waakani dhulkaagii
Isagaa ku dhawraya
Sharaf kaaga dhigan adi
Aan xaqaaqa dhici karin

Ruuxii dhaqaaqiyo
Dhoofku uu la waynyow
Caradaada salka dhigo
Dheef iyo ka dayo udug
Guul iyo ka dhali hadaf
Dhaqaaliyo abuur guul
Magac iyo ka dheef samo

14/April2025
Hargeysa
Cadnaan-Qabyotire

04/06/2026

GARASHADA HA CAWRAYN

Maansadan caroogiyo
Erayadan cudoonka li’
Waxa ay’ ku curatoo
Oo aay cabiray-saa
Ciidan iyo u tahay garab
Dareenada cabsoodiyo
Ciilanaha wax tabayoo
Waxay caawinaysaa
Codka ruuxa gudbin karin
Cabashana awooddayn.

Halkaan caashaqsadayiyo
Ceelkeeda aan galo
Caynkeeda aan xidho
Calalkeeda aan tollo,
Aan ku curiyo waayuhu
Dabno ay carcariyeen
Carab aamu lagu yidhi
Ciilkaambi laga dhigay.

Cidkastoo la dhayalsaday
Waxan caawa leeyahay
Weedho caafimaad sida
Cawil lagu tanaad baxo
Xornimadu u tahay calan.

Waxan caadi kuu idhi
Wakhtigaa cajiib oo,
Kolba cayn is rogayee,
Nafta caato bixiyoo,
Haw cadhoonin waayaha,
Haw jabin cidhiidhiga,
Haka caban ayaamaha,
Cadibaada kuu sida.

Guushiyo cisayntana
Cidna gaar umay helin
Calanadda sareeyee,
Samir oo cagaha saar
Jidka wada caqabadaa.

Jiidhkiyo cadkaagani,
Jugta uu cadaawuhu,
Camdi uu is yidhi yeel,
Cashar iyo ka baro Bari
Cilmi adiga kuu dana.

Waayuhu cataabiyo,
Yay ku odhanin cabo iyo
Car caarafka hoosee
Hayaan kaa u ciidami.

Ruux aad calowdeen
Cafis saamax mooyiye
Ka cadgooso hays odhan
Haduu ciiro haku digan

Culimadu siday tidhi,
Casharbaaba lagu sugay
Dadka ceebta qariyee,
Hadaad aragto caaryaha
Cawradiisa ruux kale
Haw tabin cidkale abid.

Caro Aadmi joogaha
Hadii aabad cudud iyo
Ugu dookhtada cuudkaa
Cisho daad in dheertahay,
Soke ceeb in ay tahay
Cuqubaa ka dhalata e,
Ka cabsoo Ilaahay,
Kolna caasi yaad noqon.

Cilmi waa dantaada e
Caarad kii ku yara dheer
Adigoon is cajabin galin
Cashariyo ka baro tabo.

Inakastuu cid uun yahay
Bashar cayanadii yahay
Khaladiyo gaf cugan karo
Cudur daarku wuxu yidhi
Cuudka maanka weeyiye
Yaad macalinka caasiyin.

Heerka caawa aan ahay
Hadaan talo cid siinayo
Waxa iigu culus ani
Wakhtigaaga ciyaariyo,
Cidlo yaanay kaa lumin.

Garshada ha cawrayn
Ha cadibin furnaanteed
Caaryaynta liidkiyo
Yay camaajuroobine,
Cidna deeq ha uga dhigin
U cartami afkaaraha
Cuno yaan lagugu sirin
Digdig yay ku cabsi galin
Xornimada u calan taag

Cando yuu kaskaa noqon,
Sida ceelka laga cabo
Cayn waliba dhaansato

Cadibaad ta’ joogtiyo,
Culaysyada amuuraha
Rajo kaa curyaamiyay
Mar bay kala caraabiye,
Fulle cararay yaad noqon.

Cabashada ha joogtayn
Ruuxaan ku caawinin
Cudud kuugu kaabayn
Codka kuugu deeqayn,
Dareen kugu casuumayn,
Looma sheegto ciriqaa
Si uu kuugu caragsanin.

Cirka iyo daruuruhu,
Haday kugu cabaa'daan,
Ciidu kula dagaalanto,
Dhirtu kula colaadsanto
Dhaguxuna ku caasiyo
Baray caadi noqoniye
Kolna yaanad ciishoon.

Wiigaga culayskiyo,
Laabta cudurku kaa galo,
Murug yay ku caamayn,
Cunfi yuu ku saamayn,
Caadifadi ku dhagarayn

Cindigaagu gobanimo,
Iyo gacal casiisiya,
La ogow cad sooryayn
Calmashada badhaadhaha.

Wakhtiyada caraabaha,
Casar hawsha kuu taal,
Cudur daar haduu jirin
Danbaysiiso waa ceeb.

Is caleemo saarkiyo,
Arin aan laguu culan
Ceebaa ka dhalatee,
Cag fudayd ka dheerow

Qofkaad cugo is leedahay,
La caweena nolashana,
Durba laguma cararee,
Baryaa lala cag maalaa
Sheeko lala caruusaa.
Jirab lagu cadaadshaa.

Markastood cadiban tahay,
Dhibtu caam ma noqotee,
Calooshaada rajo gali,
Ku adkee cagaha dhulka.
Cisho ay timaadaba.
Farxad baa cagaarimiye.
________________________
Garashada ha cawrayn,8-20-21.

Cadnaan-Qabyotire

31/05/2026

Si kastoon dhibiyo hawl u maray caashaq halistiisa
Maba aan hantaaqmeen haddaan hadal wadaag naaye
Nin ku hantay, nasiib buu halee, haakah nolashiiye

Hooshaarka quruxdiyo wanaag heego bilig taada
Kuu hanqaarme dhaayaha arkaa haybad wacaneeye
Timahaagan faayaha hadh saday uunku heli waayey

Ka mudh tidhi haweenkoo ifkaba waad ka hiray saay e
Hibashada qofkii kugu helay guul la hoya'taaye
Halacsiga dhaayaha mar qudha maalin ku haleelay

Hidahaaga guudiyo markaan dayo hal beegaaga
Hagar daamo kaa jiro haween waan ka hadhayaaye
Kuu haneyay wadnahayga oo hoo ku idhi qaado

Hanashad markii aan hubsaday heerka quruxdaada
Hindisaha da'daal kaan u huray hawl u galidaada
Hambalyada naftay-daan u diray waana heliddaada

Hees❤️

Cadnaan-Qabyotire

cadnaanqabyotire

Cadnaan-Qabyotire

02/07/2026

18/06/2026

15/06/2026

11/06/2026

10/06/2026

09/06/2026

08/06/2026

04/06/2026

31/05/2026

Address

Telephone

Website

Alerts

Contact The Establishment

Shortcuts

Share

Category

Listing takedown request