21/02/2023
في المنشور السابق اتشاركنا معاكم معنى الجمبه ،وكانت اكثر الاراء بتقول انو ليها ارتباط كبير بي امهاتنا واخواتنا (ستات الشاى) ،وفي ناس مشت معانا ابعد في المعني وعبرت عن انو بعني ليهم المكان الامن القادرين يتشاركو فيه الانس والمحبه ، مساحه امنه و مريحه بعد يوم طويل وشاق .
حبينا نمشي معاكم خطوه بخطوه ،وسعينا نعرف اكتر عن (الجمبه) في اللغه بتعني شنو ،ولقينا انها طالعه من كلمة (جمب) بمعني القرب ،وهي كلمه دارجيه في اللهجه السودانيه بتعني الوجود في مكان واحد .
ارتبط كمان معانا مفهوم الجمبه بالمشاركه ، مشاركتنا احلامنا وافكارنا واهدافنا . وبرضو فشلنا وانكساراتنا ،وكم من افكار عظيمه نشأت وشاء القدر انها تنجح في قعدة(جمبه) وكم من همومنا الاتبددت في نفس المكان،كم من الافكار الماتت واندفنت برضو في (الجمبه) ،ونحنا طلعنا بي احلامنا وطموحتنا وفننا من نفس (الجمبه) عشان نشاركها معاكم .
كمان اتوسع معانا معنى الجمبه اكتر ،وبقي كل مكان قادرين نتشارك ونصنع فيه فن وخدمه لمجتمعنا ،اخدنا معانا (الجمبه) في ترحالنا في ربوع بلدنا الحبيب السودان .
في مقبل الايام حانشاركم بي كل المحبه الفي الدنيا نحنا منو وبنقدم شنو بي صوره اكتر تفصيل ..
شاركونا المشوار والمحبه ونحنا جمبكم❤️🙏
#جّمبة_إستديو
