20/12/2025
الامتنان من أساسيات الحياة
الأيام دي قاعده اسرح كتييير مع نفسي بتذكر شكل حياتى كانت كيف
أغلبنا من 2019 لحدى الآن يمكن م عارف الحصل شنو في السنوات دى او حتى م متذكر مش عشان هو م مركز لا ولكن عشان وتيرة الحياة في الفترة دى كانت سريعه شي
مظاهرات كورونا انقلابات قفيل شوارع و آخر شي الحرب ال اخدت من عمرنا تلاته سنين و لسه مستمرة
من الحاجات ال بندم عليها كتير و بتمنى الزمن يرجع بي ل ورا هى الامتنان
الامتنان ل الأمان الامتنان انو اهلى معاى الامتنان ل حضن البيت الدافي الامتنان ل الحياة الكريمه ال كنا عايشينها و م جايبين ليها خبر
الامتنان ل الجيران ال بفقدوا بعض الامتنان ل الضحكات ال طالعه من القلب و حتى الامتنان ل لحظات الحزن والفراق ال بنتجاوزها بوجود الناس حولينا
لمن اسرح بقول شنو ال وصلنا ل هنا مرات الواحد بحس بالاهانه و الذله ل مجرد موقف صغير يحصل معاهو و يقول لا انا زمان م كنت كده ولا كان بحصل معاى كده
انا كنت معزز و مكرم سيد حقي في بيتى و في ملكى
الحياة ماشه سريع شديد و كلو يوم بنقص من عمرنا و كل يوم عبارة عن درس فيها
ى نتعلم ى نتغابي بس في الاخير الدرس درس ف الأفضل نتعلم لانو لو اتغابينا الحياة ح تعلمنا الدرس بالطريقه الصعبه
كل امنياتى انو 2026 تكون سنه جميله سعيده علينا تهون علينا كل السنين الفاتت ❤️🤲
