18/12/2025
تسابيح الدعامية و(موية البلاعة) !!
عندنا صاحبنا زمان كان بحب ريحة (البنزين) حب ما عادي.
وهو للأمانة زول ملتزم (لا بلعب قُمار لا جرب الخمرة) .
مشهور في الفريق لا بيت ولا بيتين.
والله يا جماعة أغنية (الليل الليل العديل والزين) الأغنية دي فيها جنس كضب .
يقول ليك (لا لعب القمار ولا جرب الخمرة) .
وتلقاهو أمبارح القريبة دي شارب ليهو (نص قزازة) وبالدين كمان .
خلو الكضب يا بشر.
المهم زولنا دا بتكيف لي ريحة البنزين شديد.
مرات قاعد أجي ألقاهو (بشم) في (تنك العربية).
والله صحي.
تلقاهو مدنقر ويشم في (التنك).
وعادي ممكن يمشي (الطرمبة) بدون سبب.
ما عندو عربية لكن بمشي (الطرمبة) من أجل (الريحة) .
الكيف عندو كدا.
الله خلقو كدا.
كل زول في الدنيا دي عندو (كيف).
شاي ، قهوة ، سجائر ، شيشة ، ود عماري وغيرو.
وفي ناس بتتكيف لريحة (الطين) .
وناس بتكيفو لريحة (المنكير) وأنا منهم.
وناس (الكيف) حقهم ريحة (البن) .
تلقاهو بحب ريحة (البن) لكن ما بشرب قهوة.
نحن وأولاد حلتنا بنتكيف للزولة (البتقلي البن).
حتى لو حرقتو ذاتو بنتكيف ليها.
الله خلقنا كدا.
بنحب (البت) البتحرق البن.
وطبعاً أي زول حر في (حبو).
المهم ..
أنا بتكيف بــ(الكتابة).
الكيف عندي الكتابة.
بكتب بس.
وقد أنفقت (23) سنة من عمري في الكتابة والجرايد وكدا.
وفي السنوات الــ(23) دي إشتغلت في (24) صحيفة سودانية.
والصحيفة رقم (25) حقتي وكنت رئيس تحريرها والحمدلله .
كان لي شرف العمل مع مجموعة كبيرة من رؤساء التحرير أذكر منهم على سبيل المثل لا الحصر الأساتذة : (حسين خوجلي ، محمد أحمد كرار ، عادل الباز ، شجرابي ، الباقر عبد الرحمن ، أحمد البلال الطيب ، الرشيد على عمر ، محمد أحمد دسوقي ، عمرابي عبد الماجد ، خالد عز الدين ، يوسف سراج ، وجدي الكردي).
وغيرهم من الأساتذة والزملاء الذين أكن لهم كثير من الحب والتقدير.
كل الصحف دي إشتغلت فيها بصفة (الإحتراف).
يعني بالقروش.
يعني دا شغلي.
وقد كنت (متمرداً جداً) ومتقلب المزاج.
وبسبب المزاج المتقلب دا حصلت لي كثير من المواقف مع الحكيم طه على البشير وكذلك الأرباب صلاح إدريس والرشيد على عمر ، ربما سأحكي هذه القصص يوماً ما إن شاء الله .
بعد هذه التجربة المتواضعة بقيت مركز كتاباتي على الفيسبوك فقط بالإضافة لقناتي على اليوتيوب.
ربما بسبب ظروف الحرب وربما لأن الملل قد أصابني.
الكتابة عندي إدمان.
عشق.
لو نايم ممكن الكتابة تصحيني من النوم براها.
أنا بضحك بالكتابة وببكي بالكتابة وبتونس بالكتابة.
بعزي نفسي بالكتابة وبطبطب على روحي بالكتابة.
الكتابة عندي حياة عديل.
مرات بكتب بدموعي ومرات بكتب بأعصابي ومشاعري .
بمتع نفسي بالكتابة.
ومقتنع إنو ما أكتبه يشبه لحد كبير (أكل المستشفى).
وأكل المستشفى ما بنفع مع كل الناس.
وكتاباتنا دي ما بتنفع ما كل الناس.
ممكن تشوفها (كلام ساكت) وممكن تشوفها (رسايل عميقة) وممكن ما تشوفها ذاتو.
وبما إنو الفيسبوك (لامي كل الناس).
حابي أثبت حاجات معينة في الصفحة دي.
دي صفحتكم وأنا أتشرف بمتابعتكم.
لكن عندي توجيهات عامة بتخص الصفحة.
نتفق على الشروط دي عشان نمشي لقدام.
ما حابي أخسر زول ، وحقيقي قاعد أتألم لما أحظر زول من الصفحة.
ويشهد الله الحظرناهو كتار وكتار شديد وهذا أمر يؤسفني الإعتراف به.
خلونا نتفق على حاجات ونمشي عليها.
أول حاجة .. الصفحة دي ما زي ما باقي الصفحات.
من ياتو ناحية؟
أوريك من ياتو ناحية.
هنا ممنوع منع بات الألفاظ والتطاول والخروج عن الأدب.
ما بسمح بأي إستهتار بالدين الإسلامي ولا بقبل بالعنصرية ولا برحب بأي حاجة ممكن تساهم في هدم قيم وتماسك المجتمع السوداني والأسرة.
دا خط أحمر.
ما بقبل أي إساءة للصفحة أو إساءة لمتابع في الصفحة.
عندك وجهة نظر مختلفة قولها بأدب وإحترام.
نختلف بأدب.
أنا ما بتحمل الناس العندها نفسيات.
أكون معاكم واضح.
أنت زهجان أو منفسن (بعيد مني).
(نفسن) بعيد بعيد.
عندك مبادي حسد وحقد ؟؟ بعيد بعيد ما تجيني هنا.
ما بتحملك ولا بغشك.
في الصفحة دي ما ساعين لــ(الكم).
أنا بهمني (الكيف) وليس (الكم).
أفضل لي خمسة متابعين فاهمني وفاهمهم ولا (200) ألف ما فاهمين المطرة صابة وين.
دي حاجة .
الحاجة التانية (كونو أكتب شنو وكيف وعن منو وليه .. دي حاجة حقتي أنا ما مسموح ليك تدخل فيها).
أكتب كلام بسيط ولا كلام كتييير دي حاجة راجعة لي .
أنت عندك خيار تتابعني أو ما تابعني.
لا أنت مجبور علينا ولا نحن مجبورين عليك.
لقيت المحتوى بتاع الصفحة دي ما عاجبك ، طوالي شوف صفحات بتشبهك وبتعبر عنك.
لكن هنا عادي بتلقاني كاتب عمود عن (الرموش ، الضفادع ، حنان جوطة ، ملاح الروب ، تسابيح الدعامية ، الحب من أول نظرة ، الفسيح ، زيدان إبراهيم ، العجور ، الطب ، محمد بشير ، توب ندى القلعة ، موية البلاعة ، روفا ، اللحمة ، سعد الدين ، الشتاء ، طه سليمان ، الزلط ، سميرة دنيا ، زيت صباح ، نسرين نمر ).
المهم ..
أي حاجة تخطر على بالك هنا في.
وكمان الذكريات عندها مساحة كبيرة.
وكلو بالمزاج.
أنا بكتب لو عجبك حبابك ألف ولو ما عجبك حبابك ألف.
متوقع مني أكتب ليك عن حاجة معينة أو دايرني أكون على مزاجك صدقني دا ما بحصل.
لو ما لقيت عندنا الحاجة الدايرها طوالي غادر الصفحة.
ما تزحم الفيس حقك بصفحات أنت ما قاعد تستفيد منها.
الصفحة دي لا هي رياضية ولا سياسية.
دي مساحة أنا بكتب فيها بدموعي وأعصابي.
لو لقيتني بعبر عنك يبقى دا شرف كبير بالنسبة لي ، لو لقيت ما نقدمه ما بشبهك أكيد في صفحات تانية بتشبهك.
حاجة أخيرة .. ممنوع السرقة ، لو عجبك بوست عندك خيار تعمل مشاركة أو نسخ مع حفظ الحق الأدبي.
أقول قولي هذا بكامل التواضع والمحبة والتقدير لكل الأخوان والأخوات المتابعين.
أتشرف بكم وأعتبركم عائلة كبيرة تسعدوني وأرجو أن أسعدكم.
هي دعوة للجمال والحب والخير 🌹💙❤️
تحياتي وتقديري .. محمد الطيب الأمين
