Saair Jugno

03/07/2026

مکمل غیب وی ہووے اوندی ہستی نظردی ھے
او نہ ہووے تونڑے وستی اوکوں وستی نظردی ھے

جیکوں حاصل کرنڑ کیتے نیئں سدھ کتنے جنم گزریے
اوندے ھتھیں اوھا ھنڑ شئے وڈی سستی نظردی ھے

اوندے نظریں تاں ہنجوں دی کئی قیمت وی ھ کائنا.
میڈا روونڑ پتہ نئیں کیو اوکو مستی نظردی ھ

خلا وی ھ اوندے پیریں اوندے چؤ گرد تارے ھن
فلک تے ٻہہ کرائیں اوکوں اجاں پستی نظردی ھے

میں اکھیں نوٹ کے تونڑے ٹراں بے چنت پج ویساں
میڈے پیریں کوں ھر حال اچ اوندی وستی نظردی ھے

پتہ کینجھی بلا دا کوئی میڈے تے پئے گئے سایا
میڈے جسم ءچ اے روح میڈی زبردستی نظردی ھے

01/06/2026

ڈینہ جیویں سیاہ رات کوں تسلیم نئیں کیتا
ہک شخص میڈی ذات کوں تسلیم نئیں کیتا

میں آپ کوں حالات دے صدمات تے چھوڑیے
پر گردش حالات کوں تسلیم نئیں کیتا

کم سِن کوں بمعہ نیزے ہتھیلی تے سجا کے
کم ظرف دی اوقات کوں تسلیم نئیں کیتا

سنگ تیڈے ہا کائنات دا ہر رنگ گوارا
بن تیڈے میں کائنات کوں تسلیم نئیں کیتا

ساجد میں ہنجھوں نال اوندے پیر جو دھوتن
اوں نیناں دی سوغات کوں تسلیم نئیں کیتا...

اصغر ساجد لنگراہ

27/01/2026

25/12/2025

سر تے آئی کوں کلھیں جگ تے آپ نبھیندے آخر
ترٹی بانہہ کوں اپنڑے گل وچ ھر کئی پئیندے آخر

کیویں نہ ھنڑ دنیا چھوڑ کے اوندے پاسے ونجاں اوندا پیار تاں مقناطیس دے وانگ چھکیندے آخر

کالے نال کئی چٹا بدھو ھک ڈینہہ جگ دنیا تے
تونڑے رنگ وٹیندا کئینی عادت چیئندے آخر

بھردا ھویا طاق کہیں گھر دا اوویں حال اساڈا
اندری اندر ڈکھ سوی دے وانگ چٹیندے آخر

کہیں منہ زور دے منہ نہیں لگدا کئی وی اے دستور اے
جیرھا ھینڑا ہوندے اوکوں ھر کئی جھنڑکاں ڈیندے آخر

میں ھنڑ کہیں کوں کیویں اکھاں تو نیئں پکریا میکوں
جیرھا جینجھا بیج چھٹیندے فصل او چیئندے اخر

یوسف تے ھابیل دا قصہ واضح سبق سکھیندے
جیئں تے ڈھیر اتبار ھوندا ھے وار کریندے آخر

سجھ دے سامنڑے ڈیوا تونڑے بے وقعت ھے سائر
لیکن کالی رات کوں اپنڑاں سوجھلا ڈیندے آخر

24/12/2025

برف تونے جو بھاہ ءچ میں پاتے قدم
ایں محبت دی راہ تے میں چاتے قدم

چپ چپاتی ٹری ھے محبت تیڈی
دل دی دھرتی تے آئےگنگےباتے قدم

ایں مکانیں توں گھن لا مکانیں تانڑی
تیڈے ھر جاہ تے میں ھن سُنجاتے قدم

سنج ھے وستی تے ویران گلیاں سبھے
عشق دی ڈائنڑ جیویں کئی پاتے قدم

لوک ڈیکھن تے ول رشک کرن ودے
آ ٹروں رل کے ڈونہیں رلا تے قدم

توں جو مل پئیں قسم تیڈی سائر دے ھنڑ
پئے نیئں ٹکدے ایں ارض و سما تے قدم