19/06/2026
میرپور (پی آئی ڈی) 19 جون 2026محکمہ ان لینڈ ریونیو کا ساؤتھ زون مالی سال 2026-2025 کیلئے مبلغ 57 ارب روپے سے زائد ٹیکس ریونیو وصول کرنے کیلئے پر عزم۔ متعدد مشکلات کے باوجود ساؤتھ زون مالی سال 26-2025 کیلئے مبلغ 57 ارب روپے کا ٹیکس ریونیو اکٹھا کرنے کیلئے مؤثر حکمت عملی تشکیل دیتے ہوئے اس عدد کو عبور کرنے کیلئے دن رات کوشاں ہے۔ترجمان محکمہ ان لینڈ ریونیو کی جانب سے جاری کردہ پریس ریلیز کے مطابق امسال محکمہ ان لینڈ ریونیو کو حکومتی اور وفاقی سطح پر چند پالیسی فیصلوں جن میں بینک پالیسی ریٹ میں کمی، جائیداد کی خرید و فروخت پر عائد شدہ انکم ٹیکس میں کمی و تعلیمی سیس کا ختم ہونا اور بجلی بلات کے ٹیرف / ریٹس میں کمی قابل ذکر ہیں، کے باعث کچھ مدت میں کمی کا سامنا تھا، لیکن ساؤتھ زون مؤثر حکمت عملی پر عمل پیرا ہے اور پر عزم ہے کہ مالی سال 26-2025 کے اختتام پر مبلغ 57 ارب روپے سے زائد کا ریونیو وصول کرلے گا۔ اعداد و شمار کے مطابق بینک پالیسی ریٹ میں سٹیٹ بینک آف پاکستان کی طرف سے خاطر خواہ کمی کی گئی ہے، جس کے باعث ٹیکس سے ودہولڈنگ ٹیکس کی مد میں مبلغ 10 ارب روپے کی کمی کا سامنا کرنا پڑا۔ اسی طرح جائیداد کی خرید و فروخت پر عائد شدہ انکم ٹیکس و تعلیمی سیس کی نرمی کی وجہ سے مبلغ 1 ارب روپے کی کمی ہوئی۔ بجلی ٹیرف ریٹس کی نرمی کی صورت میں مبلغ 2 ارب روپے کی کمی واقع ہوئی اور اب موجودہ ہڑتالی صورتحال اور کمیونیکیشن سروسز متاثر ہونے کے باعث مبلغ 2 ارب روپے کی ریونیو وصولی تعطل کا شکار ہے۔ یہاں یہ امر قابلِ ذکر ہے کہ گزشتہ مالی سال 25-2024 کے دوران ساؤتھ زون نے مبلغ 57 ارب پچاس کروڑ روپے کا ٹیکس ریونیو اکٹھا کیا جبکہ امسال اس عدد کو عبور کرتے ہوئے اس سے زائد وصولی کیلئے ساؤتھ زون ٹھوس بنیادوں پر دن رات کوشاں ہے اور قوی یقین ہے کہ مورخہ 30 جون تک مقررہ ٹیکس اہداف حاصل کر لیے جائیں گے۔ ان میں قابلِ ذکر محصولات انکم ٹیکس، سیلز ٹیکس، فیڈرل ایکسائز ڈیوٹی اور ودہولڈنگ ٹیکسز وغیرہ شامل ہیں۔ کمشنر ان لینڈ ریونیو ساؤتھ زون سید انصر علی کی جانب سے اظہار کیا گیا کہ مورخہ 6 جون 2026 سے آزاد کشمیر میں ہڑتال کی صورتحال کے پیش نظر کاروباری اور انڈسٹریل سرگرمیوں پر خاصا فرق پڑا ہے۔ ان تمام حالات کے باوجود ساؤتھ زون کی جانب سے مثبت اقدام اٹھائے گئے اور ریونیو وصولی میں کسی قسم کا تعطل پیدا نہ ہو، کیلئے اسلام آباد اور جہلم میں کیمپ آفس قائم کئے گئے، جن کی بدولت ٹیکسز کی بلا تعطل وصولی اور آن لائن سسٹم کی مسلسل مانیٹرنگ کی جا رہی ہے اور اس کے ساتھ ساتھ ٹیکس گزاران کو بھی بروقت ٹیکس جمع کروانے کی بابت ہمہ وقت رہنمائی فراہم کی جا رہی ہے۔ کمشنر ان لینڈ ریونیو سید انصر علی نے کہا کہ محکمہ ان لینڈ ریونیو ریاست کی معیشت کو مستحکم بنانے میں ریڑھ کی ہڈی کی حیثیت رکھتا ہے اور اسی بنیادی اہمیت کو مدنظر رکھتے ہوئے محکمہ ان لینڈ ریونیو کی پوری ٹیم تمام نامساعد حالات کے باوجود آزاد جموں و کشمیر کے ریاستی بجٹ کو کسی صورت کم نہیں ہونے دے گی اور مالیہ سرکار کو بہتر سے بہتر بنانے کیلئے ہر ممکن کوشش کو یقینی بنایا جا رہا ہے۔ جس کے ثمرات رواں مالی سال کے اختتام پر سب کے سامنے ہونگے اور ریونیو ادا ہندگان کی کارکردگی اور مؤثر حکمت عملی کو خود ثابت کریں گے اور انہی ٹھوس اقدامات کے نتیجے میں مملکت خداداد پاکستان پر بھی ریاست کی بابت مالی بوجھ کم ہوگا۔ کمشنر ان لینڈ ریونیو (ساؤتھ زون) میرپور ڈویژن سید انصر علی نے مزید کہا کہ یہ ہماری پوری ٹیم کی مشترکہ کوششوں، بہتر پلاننگ اور جدید اصولوں پر مبنی نیٹ ورکنگ کا نتیجہ ہے کہ مالی سال کے اختتام پر مبلغ 57 ارب روپے سے زائد کا ٹیکس ریونیو کا عدد کامیابی سے عبور کر لیا جائے گا اور آئندہ بھی محکمہ ان لینڈ ریونیو ریاست کے مالی و معاشی استحکام میں کلیدی کردار ادا کرتا رہے گا۔
