17/05/2026
محترم غلام مصطفیٰ دائم ہمارے منقبت ریسرچ سینٹر کے اہم ذمہ دار ہیں۔۔۔توصیف و ثناء فورم پاکستان کی جانب سے ان کی اس زبردست علمی کاوش پہ خراجِ تحسین پیش کرتے ہیں۔
غلام مصطفیٰ دائم کی کتاب ’’منقبت اور سلام روایت، رسومیات اور جدید تناظر‘‘ اردو تقدیسی ادب کی تنقید میں ایک اہم اور منفرد اضافہ ہے۔ دائم صاحب کم عمری کے باوجود فکری بلوغت، وسیع مطالعے اور گہرے تنقیدی شعور کے حامل ہیں۔ ان کی تحریر میں مذہبی، تہذیبی، فکری اور ادبی مباحث کو متوازن اور مدلل انداز میں پیش کرنے کی صلاحیت نمایاں ہے۔
کتاب میں منقبت اور سلام جیسی اصناف کے مفہوم، روایت، فکری اساس اور شعری تقاضوں پر سنجیدہ گفتگو کی گئی ہے۔ دائم صاحب نے منقبت کو محض جذباتی عقیدت کے اظہار کے بجائے اسلامی تہذیب، اخلاقیات اور روحانی اقدار سے جڑی ایک بامعنی ادبی روایت کے طور پر دیکھا ہے۔ اسی طرح انہوں نے سلام کو صرف رثائی ادب تک محدود کرنے کے تصور کی تردید کرتے ہوئے قرآن، حدیث، نعتیہ روایت، صحابہؓ، اہلِ بیتؓ اور صوفیا کے کلام کی روشنی میں اس کی اصل نعتیہ اور تقدیسی حیثیت واضح کی ہے۔
کتاب کے تقریظ نویس ڈاکٹر عزیز احسن اور فلیپ نگار سید صبیح رحمانی کے مطابق اس کتاب کی اہمیت اس امر میں ہے کہ یہ منقبت اور سلام سے متعلق سطحی، جذباتی اور غیر منطقی تصورات کو علمی اور تنقیدی استدلال کے ذریعے واضح کرتی ہے۔ دائم صاحب نے ان اصناف کے فکری، تہذیبی اور شعری پہلوؤں پر ایسی بحث کی ہے جو اردو تنقید میں کم دکھائی دیتی ہے۔ یہی وجہ ہے کہ اس کتاب کو تقدیسی ادب اور نقدِ نعت کے باب میں ایک سنجیدہ اور دور رس تنقیدی کاوش قرار دیا گیا ہے۔
۔۔۔۔۔۔۔۔۔۔۔۔
کتاب کے حصول کے لیے فضلی سنز سے رابطہ کریں:
فضلی بک سنز کا رابطہ نمبر یہ ہے:
03362633887
