31/03/2026
ضلع مہمند میں "میر اویس مہمند لیگ سیزن 2" کا باضابطہ اعلان
ضلع مہمند میں کرکٹ کے فروغ کے لیے "میر اویس مہمند لیگ سیزن 2" کے انعقاد کا باضابطہ اعلان کر دیا گیا ہے۔ لیگ انتظامیہ کے مطابق اس ایونٹ کا بنیادی مقصد نوجوان کھلاڑیوں کو اپنی صلاحیتیں دکھانے کے مواقع فراہم کرنا اور علاقے میں مثبت کھیلوں کی سرگرمیوں کو فروغ دینا ہے۔
مہمند کرکٹ ایسوسی ایشن کے صدر ارباب خان نے بتایا کہ لیگ کو جدید تقاضوں کے مطابق پروفیشنل انداز میں منعقد کیا جائے گا، جس کے لیے تیاریاں بھرپور طریقے سے جاری ہیں۔
لیگ میں فاتح ٹیم کو 10 لاکھ روپے جبکہ رنر اپ ٹیم کو 5 لاکھ روپے انعام دیا جائے گا۔ اس کے علاوہ نمایاں کارکردگی دکھانے والے کھلاڑیوں کے لیے خصوصی انعامات بھی رکھے گئے ہیں۔
ارباب خان کے مطابق لیگ کے لیے مجموعی طور پر ایک لاکھ 60 ہزار روپے کا اضافی پول رکھا گیا ہے، جبکہ بہترین کھلاڑیوں کے لیے 50 ہزار روپے کے خصوصی انعامات مختص کیے گئے ہیں۔
اسپانسرشپ کے حوالے سے لیگ میں ٹائٹل اسپانسر (ایکسکلوسیو)، گولڈ اسپانسر، سلور اسپانسر اور آفیشل پارٹنرز کی مختلف کیٹیگریز متعارف کرائی گئی ہیں۔ اسپانسرز کو گراؤنڈ برانڈنگ، ڈیجیٹل پروموشن، سوشل میڈیا کوریج اور ویڈیو برانڈنگ سمیت متعدد سہولیات فراہم کی جائیں گی۔
لیگ انتظامیہ کا کہنا ہے کہ یہ ایونٹ نہ صرف مقامی سطح پر کرکٹ کو فروغ دے گا بلکہ نوجوانوں کو مثبت سرگرمیوں کی جانب راغب کرنے میں بھی اہم کردار ادا کرے گا۔
