02/02/2026
سيد لياقت شاهه پاران ضلعي قيادت خلاف لڳايل الزام بي بنياد، ڪوڙا ۽ سياسي مفادن تي ٻڌل آهن: اعجاز احمد کهڙو
ضلعي جنرل سيڪريٽري اعجاز احمد کهڙو سيد لياقت شاهه پاران لڳايل الزامن کي سخت لفظن ۾ رد ڪندي چيو آهي ته اهي الزام سراسر بي بنياد، گمراهه ڪندڙ ۽ ذاتي سياسي مفادن جي عڪاسي آهن، جن جو حقيقت، قانون يا پارٽي پاليسي سان ڪو به واسطو ناهي.
هن واضح ڪيو ته جن نوڪرين جو ذڪر ڪري عوام کي گمراهه ڪرڻ جي ڪوشش ڪئي پئي وڃي، اهي سال 2021 ۽ 2022 دوران ڏنيون ويون هيون. ان وقت تعلقي صوڀوديرو جو صدر اعجاز احمد کهڙو جڏهن ته تعلقي گمبٽ جو صدر ڪاشان شيخ هو. جيڪڏهن سيد لياقت شاهه وٽ ڪو به قانوني يا اخلاقي سوال آهي ته هو ان وقت جي ذميوارن کان پڇي، نه ته ميڊيا ۽ سوشل ميڊيا تي اجايو سياسي ڊرامو نه ڪري.
اعجاز احمد کهڙو وڌيڪ چيو ته اهي سڀ نوڪريون عدالت جي واضح اسٽي آرڊر تحت ڏنيون ويون ۽ مڪمل طور ميرٽ تي تعلقي صوڀوديرو جي حقدار ماڻهن کي مليون. اڄ نوان الزام لڳائڻ رڳو پارٽي اندر انتشار، تڪرار ۽ بدامني پيدا ڪرڻ جي ناڪام ڪوشش آهي.
هن چيو ته حقيقت اها آهي ته پارٽي سدائين سيد لياقت شاهه کي نوازيو آهي. کيس مختلف وقتن تي نوڪريون، ٺيڪا ۽ ذميواريون ڏنيون ويون، پر بدقسمتي سان انهن سهولتن کي ذاتي فائدي لاءِ غلط استعمال ڪيو ويو. نوڪريون وڪرو ڪرڻ ۽ ٺيڪا وٺي ڪم نه ڪرائڻ جهڙا عمل ڪنهن کان لڪل ناهن.
ضلعي جنرل سيڪريٽري چيو ته اڄ جڏهن پارٽي جي واضح هدايتن، پاليسي ۽ نظم و ضبط تحت ايمانداري سان ڪم ڪيو پيو وڃي، ته الزام بازي، بليڪ ميلنگ ۽ منفي پروپيگنڊا ذريعي پارٽي کي ڪمزور ڪرڻ جي ڪوشش ڪئي پئي وڃي، جيڪا هرگز برداشت نه ڪئي ويندي.
هن وڌيڪ چيو ته سيد لياقت شاهه کي اڃا به تعلقي صدر چونڊڻ پارٽي جي وسيع دل، برداشت ۽ جمهوري سوچ جو ثبوت آهي، نه ته ڪنهن دٻاءَ يا مجبوري جو نتيجو.
آخر ۾ اعجاز احمد کهڙو واضح ڪيو ته پارٽي ڪنهن به قسم جي ڪوڙ، الزام تراشي، بليڪ ميلنگ يا منفي پروپيگنڊا کي سختي سان رد ڪري ٿي.
سچ، قانون ۽ پارٽي پاليسي ئي اسان جي اصل طاقت آهن ۽ رهنديون۔
