28/03/2020
قرنطين
قرنطينه!
څومره ښه چې دې رازده کړل
څومره ښه چې دې رایاد کړل
ځینو، ځینو رابطو
عجیب وهم رانه تاو وي
عجیب ډار یې د زړګي په حجرو خپور وي
داسې ویره،
چې که دا رابطه نه وي
چې که دا غږ تر غوږ نشي
چې که دا پل ونړېږي
ساه به بنده شي
ارمان به ویلې کېږي
او له سترګو به خنداوې وڅڅېږي
حرکت به مې په ټپه ودرېږي
قرنطينه!
څومره ښه چې دې رایاد کړل!
چې له ځینو سره هېڅ د کیسو نه وي
او خبرې د زړو نه وي
که یې دوه سترګې نه وینې
که یې پوست رغوي ښکل نکړې
که په ډنډ د سپين ټټر دې لاهو نه وي
غږ دې نه ورته یادېږي
حس دې نه ور په زړه کېږي
نوم دې ورو، ورو ترې هېرېږي
غږېدلو ته هېڅ هم نه پاتې کېږي
قرنطينه!
څومره ښه چې دې رایاد کړل
زندګي بغیر له هر چانه ممکنه
تنهایۍ کې دې دروړاندې خپله وینه
مونږه هسې په وهمونو کې ایسار یوو
له دروغو نه یې جار یوو
نه د روح ملګری
نه د زړه میین شته
چې دې دوه سترګې پناه وې
چې دا ژېړه نرۍ غاړه دې ورنه وړه
د ویښتو وږم دې یخ شمال ته سپاري
د لاس کرښې به دې مات دیوال ته سپاري
قرنطينه!
څومره ښه چې دې رازده کړل
څومره ښه چې دې رایاد کړل
ځینې مینې شدید وهم
ځینې مینې هوا نه وي
چې په هر حالت پایېږي
ځینې مینې وړې پاڼې
که له ونې جلا کېږي
مړاوې کېږي، ژېړې کېږي
که له ځینو د بڼو نڅا پناه شي
غږېدلو ته هېڅ هم نه پاتې کېږي
