14/05/2025
Purani Haveli ka Raaz – Mukammal Kahani
Lahore ke purane ilaqe Ichhra ke ek kone mein ek viran aur tooti phooti haveli thi. Haveli itni purani thi ke uski deewaron se jhaariyaan ug chuki thi, aur har waqt usmein aik thandi, manhoos hawa chalte rehti thi. Mohalle walon ka kehna tha ke is haveli mein kisi waqt Mehtab Singh naam ka zameendar rehta tha, jiska aik hi beta aur aik beti thi – Roohi.
1947 ke dino mein, jab dange phoot paday, to kehte hain Roohi ka is haveli mein qatl ho gaya tha – kisi ne galaa ghot kar maar diya. Tab se log kehte hain ke Roohi ki rooh is haveli mein qaid hai.
Kahani ka aghaz
Ali, Hira, aur Saad – teen university ke students – documentaries bananay ka shauq rakhte thay. Unko is haveli ke baray mein pata chala to decide kiya ke wahan ja kar aik horror short film banayenge. Doston ne pehlay mana kiya, magar woh log hans kar kehne lage, "Bhoot waghera kuch nahi hota."
Raat 12 baje – Haveli ke andar
Woh log 12 baje ke qareeb haveli mein ghusay. Andar har cheez tooti hui thi. Deewaron par purani tasweeren, aur zameen par jaalay. Jaise hi unho ne recording start ki, hawa tez hone lagi. Achanak ek purana jhooley khud-ba-khud hilne laga. Hira ne kaha, “Yeh hawa se hai…”
Magar tabhi ek purani awaaz sunai di:
"Wapis chalay jao..."
Ali ne kaha, “Kisi ne prank kiya hai.” Woh agay barhne lage.
Ek kamra tha jahan darwaza khud se band ho gaya. Saad us kamre mein tha. Jab Ali aur Hira ne darwaza khola, Saad andar tha hi nahi. Sirf zameen par ek purana, laal rang ka dupatta tha – wohi jo tasveeron mein Roohi pehni hoti thi.
Cheekh… aur ghanti ka awaaz
Hira ne bhaagna chaha, magar uske pair kisi cheez mein ulajh gaye. Tabhi ek aur cheekh sunai di, aur har taraf andhera cha gaya.
Ali ne torch on ki – magar Hira gayab thi.
Woh sirf ek choti si diary dekh saka jo purani almari se giri thi. Diary Roohi ki thi:
"Mujhe band kar diya gaya hai is kamre mein... main roshni dekhna chahti hoon... mujhe bachao..."
Ali ne bhaag kar haveli chhor di. Police ne agle din search kiya, magar Saad ya Hira ka koi nishan nahi mila.
Aaj bhi...
Log kehte hain ke har 14 August ki raat, jab Roohi ka qatl hua tha, haveli ke andar se larki ke ronay aur madad ki pukar sunai deti hai.
Ali ne uske baad kabhi kisi se baat nahi ki. Uska kehna hai:
"Main ne bhoot dekha hai. Roohi ab bhi wahan hai. Aur wo akeli nahi..."
