Irshad Sandhu

31/10/2024

14/04/2024

24/03/2024

دِل توں ای لہ گیا ایں dil ton e leh giyaa ain
تیجا ایڈیشن Teja addition

22/11/2023

،،،جِبھاں وڈھے روگ،،

ویکھ رہیا ایں سورجا
کالے شاہ منشور
آنے گز جمہورتاں
کوڈی بھا دستور
رج کھادی ویہلیاں
بُھکھے نیں مزدور

ویکھ رہیا ایں سورجا
منگویں سبھ کردار
رئی رکھ پردھانڑے
مُنصف ڈنڈی مار
ہنساں نک نکیلڑاں
کاواں ہتھ مہار

ویکھ رہیا ایں سورجا
اُلٹی ہر تدبیر
دھرم ویر گئے دھرمیے
دین نوں مُلّاں پیر
پورے کھوچل رانجھڑے
رج کے کھچری ہیر

ویکھ رہیا ایں سورجا
انھیاں دی چودھراٹ
کُوڑے کرن عیاشیاں
سچ دے گل بھکاٹ
کال رات نوں جپھیاں
چن دے مُنہ تے چاٹ

ویکھ رہیا ایں سورجا
جِبھاں وڈھے روگ
زہراں ونڈن ماندری
سپ لڑاؤندی جوگ
کھوہ لئی کُجھ کمینیاں
چڑیاں ہتھوں چوگ
ویکھ رہیا ایں سورجا

ارشاد سندھو

18/11/2023

،،،،سُن وے میرے ہان دیا،،،،

سُن وے میرے ہان دیا
جِس سورج تے بھری جوانی
راتاں ہوون تنیاں
جِدھے توں چن کھوہیا ہووے
بَدل واء تے کنیاں
جہڑی اکھ وچ سُفنے گھٹ تے
قبراں ہوون گھنیاں
اوہدے دِل دیاں اوہ ای جانے
جِدھے دِل نوں بنیان

سُن وے میرے ہان دیا
جِس دریا نوں پانی آکھے
تیرے نال نہیں رہنا
جہڑے ہنس دے کھاتے پیندا
اِلّ تے کاں دا لہنا
جِس مٹیار دا ڈولی وچ ای
لُٹیا جاوے گہنا
اوہدے دُکھ نوں اوہ ای جانے
جِہنے ایہ دُکھ سہنا

سُن وے میرے ہان دیا
جِہڑے رُکھ نوں شَگناں ویلے
مُڈھوں جاوے پُٹیا
جِس پنچھی نوں کھنب کُتر کے
جاوے انبروں سُٹیا
جہڑے گھر نوں کندھاں ہووے
اندروں باہروں لُٹیا
ٹوٹے ہون نوں اوہ ای جانے
جہڑا مُڑ مُڑ ٹُٹیا

سُن وے میرے ہان دیا
جِس جوڑے دے اِک اِک پُھل نوں
مل مُل دِتا جاوے
جِہڑی جھانجھر ٹھونہیاں ورگا
تن تے زہر پچاوے
جِس وینی نوں کوئی پچھتاوا
اندرو اندری کھاوے
پیلی رُت نوں اوہ ای جانے
جہڑا نِت ہنڈاوے

ارشاد سندھو

17/11/2023

رنگاں تے شک پیندا اے تصویراں دا نہیں رَولا سی
سُفنے ای کُجھ کاہلے سن تعبیراں دا نہیں رَولا سی

جِنے مرضی رَولے ہوون اِک دوجے توں نِکھڑن دے
ایہ تے اوہ وی مندا اے تقدیراں دا نہیں رَولا سی

وکھری گل اے ویلے نے نہیں مُکن دتا حالانکہ
میرا اوہدا رَولا کوئی جاگیراں دا نہیں رَولا سی

کن پڑوانا وی تے موت سی میرے دھرت قبیلےدی
ہیراں تے سن لکھاں مینوں ہیراں دا نہیں رَولا سی

تیرے رُسن مگروں دِل دے شیشے نوں کئی خطرے سن
اکھ توں پُچھ لئےاکھ نوں اکھ دےنیراں دانہیں رَولا سی

جِنا وی سی جہجا وی سی میل ملاپ سی روحاں دا
ساڈی پیار کہانی وچ سریراں دا نہیں رَولا سی

جنڈ چنہاں دے ساہویں سندھو خورے کیہ کیہ مسئلے سن
خالی کچیاں گھڑیاں، ٹُٹیاں تیراں دا نہیں رَولا سی

ارشاد سندھو
ਰੰਗਾਂ ਤੇ ਸ਼ੱਕ ਪੈਂਦਾ ਏ ਤਸਵੀਰਾਂ ਦਾ ਨਹੀਂ ਰੌਲਾ ਸੀ
ਸੁਫ਼ਨੇ ਈ ਕੁਝ ਕਾਹਲੇ ਸਨ ਤਾਬੀਰਾਂ ਦਾ ਨਹੀਂ ਰੌਲਾ ਸੀ

ਜਿੰਨੇ ਮਰਜ਼ੀ ਰੌਲੇ ਹੋਵਣ ਇੱਕ ਦੂਜੇ ਤੋਂ ਨਿੱਖੜਨ ਦੇ
ਇਹ ਤੇ ਉਹ ਵੀ ਮੰਨਦਾ ਏ ਤਕਦੀਰਾਂ ਦਾ ਨਹੀਂ ਰੌਲਾ ਸੀ

ਵੱਖਰੀ ਗੱਲ ਏ ਵੇਲੇ ਨੇ ਨਹੀਂ ਮੁੱਕਣ ਦਿੱਤਾ ਹਾਲਾਂਕਿ
ਮੇਰਾ ਓਹਦਾ ਰੌਲਾ ਕੋਈ ਜਾਗੀਰਾਂ ਦਾ ਨਹੀਂ ਰੌਲਾ ਸੀ

ਕੰਨ ਪੜਵਾਉਣਾ ਵੀ ਤੇ ਮੌਤ ਸੀ ਮੇਰੇ ਧਰਤ ਕਬੀਲੇ ਦੀ
ਹੀਰਾਂ ਤੇ ਸਨ ਲੱਖਾਂ ਮੈਨੂੰ ਹੀਰਾਂ ਦਾ ਨਹੀਂ ਰੌਲਾ ਸੀ

ਤੇਰੇ ਰੁਸਣ ਮਗਰੋਂ ਦਿਲ ਦੇ ਸ਼ੀਸ਼ੇ ਨੂੰ ਕਈ ਖ਼ਤਰੇ ਸਨ
ਅੱਖ ਤੋਂ ਪੁੱਛ ਲੈ ਅੱਖ ਨੂੰ ਅੱਖ ਦੇ ਨੀਰਾਂ ਦਾ ਨਹੀਂ ਰੌਲਾ ਸੀ

ਜਿੰਨਾ ਵੀ ਸੀ ਜੇਹਜਾ ਵੀ ਸੀ ਮੇਲ ਮਿਲਾਪ ਸੀ ਰੂਹਾਂ ਦਾ
ਸਾਡੀ ਪਿਆਰ ਕਹਾਣੀ ਵਿਚ ਸਰੀਰਾਂ ਦਾ ਨਹੀਂ ਰੌਲਾ ਸੀ

ਜੰਡ ਚਨ੍ਹਾਂ ਦੇ ਸਾਹਵੇਂ ਸੰਧੂ ਖ਼ੋਰੇ ਕੀ ਕੀ ਮਸਲੇ ਸਨ
ਖ਼ਾਲੀ ਕੱਚਿਆਂ ਘੜਿਆਂ, ਟੁੱਟਿਆਂ ਤੀਰਾਂ ਦਾ ਨਹੀਂ ਰੌਲਾ ਸੀ

ਇਰਸ਼ਾਦ ਸੰਧੂ
Thanks Gill Gurbinderjit Singh ji

16/11/2023

ایتھے روز نیاں مر جاندے
حق تے سچ وی تاں مر جاندے

توں تے خالی کنڈ کرنی سی
ایہ کملے تے تھاں مر جاندے

حرفاں نے ناں زندہ رکھے
نہیں تے کِنے ناں مر جاندے

موت نوں شابش دیندے جیکر
چِڑیاں دی تھاں کاں مر جاندے

اینے کون جنازے پڑھدا
وعدے جے ہر داں مر جاندے

مرن عبادت ہوندا جیکر
سُن کے اوہدی ہاں مر جاندے

جے نہ ہُندیاں ماواں سجنو
لبھدے لبھدے چھاں مرجاندے

روای تے نِت کِنے سندھو
پلکاں ہیٹھ جھنہاں مر جاندے

ارشاد سندھو

15/11/2023

اِکے رُکھ تے پل کے چِڑیاں
رہ نہ سکیاں رل کے چِڑیاں

باز کمینے کچیاں کھا گئے
بندے کھا گئے تل کے چِڑیاں

اِک اِک پِنجرے پا دیندے نیں
ماپے ہتھیں ول کے چِڑیاں

مُڑ کے جنگلیں جا وڑیاں نیں
شہراں توں سڑ بل کے چِڑیاں

لے نی مائے ٹُر چلیاں نی
شگناں دے رنگ مل کے چِڑیاں

دُکھ دے گیت سُناون سندھو
گھر گھر عمروں ڈھل کے چِڑیاں

ارشاد سندھو