06/10/2026
بنون سیوان، د ملګرو ملتونو پخوانی لوړپوړی استازی او د افغانستان په چارو کې وتلی ډیپلومات وفات شو
بنون سیوان، چې د افغانستان د تېرو لسیزو په بحراني او جګړه مارو کلونو کې یې د ملګرو ملتونو د یو مهم ډیپلومات په توګه د سولې د لارو چارو او بشري مرستو په برخه کې اساسي رول لوبولی و، د ۸۹ کلونو په عمر د قبرس په پلازمېنه نیکوزیا کې له دونيا سترګې پټې کړې.
د نوموړي مړینه په داسې حال کې واقع کېږي چې یواځې څو ورځې وړاندې یې د ډاکتر نجیب الله د مړینې د ۳۰م تلين په مناسبت له بي بي سي سره په یوه ځانګړې او وروستۍ مرکه کې، د افغانستان او افغانانو سره د خپل ژور عاطفي پیوند یادونه کړې وه. سیوان په دغه مرکه کې ویلي وو چې د ماموریت پر مهال یې له افغانانو سره یوځای رنځونه ګاللي او د شوروي لخوا د غورځول شويو ماینونو له امله د ماشومانو قربانۍ له نږدې لیدلې دي.
د قبرس په نیکوزیا کې په یوه ارمني کورنۍ کې زېږېدلی بنون سیوان، د لوړو زده کړو له بشپړولو وروسته په ۱۹۸۸ کال کې (د جنیوا هوکړه لیک له لاسلیک کېدو سره هم مهال) د افغانستان لپاره د ملګرو ملتونو د سرمنشي سلاکار او لوړپوړی سیاسي استازی وټاکل شو.
نوموړی هغه څېره وه چې له نږدې یې د شوروي د وتلو وروستۍ مرحلې، د ډاکټر نجیب الله د حکومت سقوط، د کورنیو جګړو پیل او د افغان مشرانو ترمنځ د سولې د ناکامو هڅو ننداره کړې وه.
هغه په خپله وروستۍ مرکه کې د ۱۹۹۲ کال په اپریل کې د ډاکټر نجیب الله د ایستلو لپاره د خپلو هڅو جزئیات هم بیان کړي وو او ویلي یې وو چې کله د مجاهدینو مشران په کابل کې د موقت حکومت پر جوړولو ونه توانېدل، په خپله یې په یوه الوتکه کې اسلام اباد ته د تګ هڅه وکړه.
نوموړی د تېرې یکشنبې په شپه شاوخوا لس نیمې بجې د نیکوزیا په خپل کور کې وفات شو. د راپورونو له مخې، هغه انځورونه او یادګارونه چې اوس د نوموړي د مړینې په اړه خپرېږي، خپله سیوان د مړینې څخه څو ورځې وړاندې رسنیو ته سپارلي وو.
| | | |
