GHAN MEDIA

15/08/2026

طالبانو سره د سولې خبرو کميسيون پخوانۍ غړې فوزیه کوفي ویلي، ملګري ملتونه او غړي هېوادونه یې باید له تشو بیانیو او څرګندونو تېر شي او عملي ګامونه پورته کړي ترڅو پر طالبانو فشار زیات کړي.

فوزیه کوفي څرګنده کړې چې نړیواله ټولنه باید طالبان د هغو رنګینو او ښایسته ژمنو له امله ځوابګو کړي چې واک ته له رسېدو وړاندې یې ورکړې وې.

نومېړې ټینګار کړی: «افغانستان د خپل تاریخ په یوه حساس پړاو کې دی؛ موږ باید تر هغه چې ناوخته شوی نه وي، د قانون د حاکمیت او اساسي قانون پر بنسټ د نظام د بېرته راتلو لپاره هڅې وکړو.»

فوزیه کوفي زیاتوي چې په افغانستان کې د روان حالت له بحراني کېدو د مخنیوي يواځېنۍ لار د قانون حاکمیت او د نړیوالې ټولنې جدي عملي هڅې دي.

| | | | | |

14/08/2026

د پاکستان د پنجاب ایالت په مرکز لاهور کې پولیسو پرېکړه کړې چې په ټولو تاڼو کې به د ښځینه پولیسو ۲۴ ساعته حضور یقیني کړي، څو ښځې وکولای شي په هر وخت کې خپلې ستونزې او شکایتونه له پولیسو سره شریک کړي.

د لاهور د پولیسو د عملیاتو مشر، فیصل کامران ویلي چې د دې اقدام موخه ښځو ته د خوندي او اسانه چاپېریال برابرول دي، ترڅو هغوی وکولای شي د کورني تاوتریخوالي، ځورونې او نورو اړوندو قضیو په اړه له وېرې پرته شکایتونه ثبت کړي.

د نوموړي په وینا، ښځینه پولیسې به شپه او ورځ د ښځینه مراجعینو د مرستې او قانوني لارښوونې لپاره موجودې وي او د ښځو اړوند شکایتونو ته به چټک ځواب ویل کېږي.

پاکستاني چارواکي دا پرېکړه د ښځو د خوندیتوب او پولیسو ته د هغوی د لاسرسي د ښه کېدو په برخه کې یو مهم ګام بولي.

14/08/2026

د افغانستان متحدې جبهې ادعا کړې چې ځواکونو یې په تېرو ۲۴ ساعتونو کې د هلمند او کندهار ولایتونو په بېلابېلو سیمو کې درې هدفي عملیات ترسره کړي او د دغو عملیاتو په ترڅ کې یې ۷ طالب غړو ته مرګ ژوبله اړولې ده.

د جبهې په وینا، د هلمند ولایت د مرکز لښکرګاه ښار د لومړۍ امنیتي حوزې پر یوې پوستې په برید کې دوه طالبان وژل شوي او دوه نور ټپیان شوي دي.

جبهه زیاتوي چې د لښکرګاه ښار د اوومې حوزې اړوند د بولان په سیمه کې د یو لړ نورو عملیاتو پر مهال دوه طالبان هم په نښه شوي دي.

د اعلامیې له مخې، د کندهار ولایت د دامان ولسوالۍ په اړوندو سیمو کې هم د یوه هدفي عملیات پر مهال د طالبانو یو غړی په نښه شوی دی.

متحدې جبهې ادعا کړې چې په دغو عملیاتو کې په نښه شوي کسان د پخوانیو افغان امنیتي او دفاعي ځواکونو په نیولو، شکنجه کولو او وژلو، او همدارنګه د عامو خلکو په ځورولو کې لاس درلود.

طالبانو تر اوسه د دغو ادعاوو په اړه څه نه دي ویلي.

13/08/2026

د فرانس پرېس خبري اژانس د یوه راپور له مخې، د طالبانو مشر هبت الله له لوري دولتي مامورینو ته د ځیرکو ټېلیفونونو د منع کولو له حکم وروسته، دا تګلاره اوس د پوهنتونونو دروازو ته هم رسېدلې ده.

دوی وايي په پوهنتونونو کې د سمارټ ټيليفونونو پر اخیستلو له نوي محدودیت وروسته، افغان محصلین پر دوو بېلابېلو نظرونو وېشل شوي دي؛ یو شمېر یې دا پرېکړه د درسي سرچینو د موندلو پر وړاندې خنډ ګڼي، خو ځینې نور بیا وایي چې د دې کار له امله په ټولګیو کې د زده کوونکو تمرکز زیات شوی دی.

په کابل او هرات کې محصلینو تایید کړې چې د پوهنتونونو ادارو خبرداری ورکړی چې محصلین سمارټ ټليفون پوهنتون ته نه شي راوړلی او سرغړونکي به له «قانوني تعقیب» سره مخ شي.

بلخوا د کندهار پوهنتون ویاند نذیر احمد قادري ویلي، دا ګام د دې لپاره اخیستل شوی چې محصلین په بشپړ ډول خپلو درسونو، لکچرونو او عملي کارونو ته پام واړوي.

د یونیسکو د راپور له مخې، که څه هم د نړۍ ۵۸ سلنه هېوادونه په ښوونځیو کې د پام غلطېدو مخنیوي په موخه د ټېلیفون پر کارولو بندیز لګوي، خو د پوهنتون په کچه دا ډول سختګیري بې سارې بلل کېږي.

طالبان چې کابو پنځه کاله کېږي واکمن دي، له دې وړاندې هم د انټرنیټ او ډېجیټل ټېکنالوژۍ د کنټرول په موخه ورته بیلا بیل ګامونه پورته کړي دي.

| | | | | |

13/08/2026

13/08/2026

مولوي عبدالکبیر: "اوس په افغانستان کې اسلامي نظام راغلی، له نورو هېوادونو خپل وطن ته راشئ"

د طالبانو حکومت د کډوالو چارو وزیر مولوي عبدالکبیر وايي، راستنو شویو افغان کورنیو ته د خوراکي او غیرخوراکي مرستو رسولو او د هغوی د مېنو د بیارغونې هڅې روانې دي.

نوموړي پکتیکا ته د سفر پر مهال له سلګونو راستنو شویو کورنیو سره د خوراکي توکو د مرستو په وېش کې ګډون کړی او ویلي یې دي، چې اړمنو کورنیو ته د مرستو د رسولو لپاره ګڼو ادارو ته دندې سپارل شوې دي.

د کډوالو چارو وزارت په وینا، د مرستو دغه لړۍ تر اوسه په لوګر، پکتیا او پکتیکا کې ترسره شوې او په هر ولایت کې زر کورنیو ته د خوراکي توکو بستې وېشل شوې دي.

عبدالکبیر له افغان سوداګرو هم غوښتي، چې له راستنو شویو کورنیو سره مرسته وکړي او ویلي یې دي، چې د هغوی د مېنو د بیارغونې په اړه له اړوندو ادارو سره خبرې روانې دي.

13/08/2026

د پنجشېر سیمه‌ییز چارواکي وايي، سوداګرو په دغه ولایت کې د څښاک اوبو، سیروم او غیرالکولي مشروباتو د تولید کارخونو جوړولو برخه کې ۱۰ میلیونه ډالر او د تفریحي پارکونو جوړولو برخه کې پنځه میلیونه افغانۍ پانګونه کړې ده.

#پنجشېر #پانګونه

12/08/2026

د بغلان امنیه قومانداني وايي چې د دغه ولایت په تاله او برفک ولسوالۍ کې د کرنې پر اوبو د دوو کورنیو ترمنځ په وسـ ـله واله نښـ ـته کې څلور تنه و.ژل شوي او یو بل ټپي دی.

د تاله او برفک ولسوالۍ امنیه قوماندان، اسماعیل ایوبي ویلي چې دا پېښه د دې ولسوالۍ په دیوالک سیمه کې شوې او نښـ ـته د شخصي دښـ ـمنۍ او د کرنې د اوبو د کارولو پر سر د اختلاف له امله رامنځته شوې ده.

د بغلان د امنیه قوماندانۍ په وینا، په دې نښـ ـته کې ښکېل کسان له پېښې وروسته له سیمې تښتېدلي او تر اوسه څوک نه دي نیول شوي.