Salaysay sa Buwan

Salaysay sa Buwan mga salaysay na tanging buwan lang ang nakakarinig at basa.

06/03/2024

nang dahil sa'yo,
naramdaman kong muli ang tunay na saysay ng pag-ibig at umibig—
ang kumilala at kilalanin;
humanga at hangaan pabalik;
kumabisado at kabisaduhin;
alagaan nang walang hinihinging kapalit.

ang umibig at ibigin nang mas higit pa sa hinihiling ko sa mga bituin.

at kung pagbibigyan nawa ng mga tala,
hindi ko na sana maramdaman ang kahulugan ng
paglisan at paalam;
hinagpis at lumbay;
panibugho't pangamba;
maging ang kirot at patuloy na pagsisi sa tadhana—
mula sa iyong makulay na katauhan.

ikaw na sana ang huli.
umayon nawa ang sansinukob.
sana.

sansinukob// marso 6, 2024
sa kuwarto.

28/01/2024

ngiti niya'y kayang talunin ang bahaghari sa rikit,
mga mata'y mapupungay, walang sabi ang mga bituin.

ang iyong pagdating, para sa kaniya'y isang piging
inihanda ang kaniyang sarili;
kumpletos rekados wala ka nang hihilingin.
ngunit kung sa huli ay pagtangis lang pala ang kaya mong ihandog,
sana ay itinago mo na lang ang iyong regalo.

luha niya'y kutsilyong sumasaksak sa aming puso.
ikaw ang bumato ng palasong walang pigil niyang sinasalo,
habang kami ang nagbabalot ng benda at umaalo,
sa sugat na ikaw ang siyang nagpadugo.

lalaki // enero 28, 2024
sa kuwarto

28/01/2024

parang kilala kita na hindi.

pamilyar sa akin ang iyong ngalan at ngiti,
paboritong parte ko ang mata mo at mga labi,
memoryado ko ang amoy ng iyong pabango,
ngunit kung tatanungin mo ako tungkol sa iyong nakaraan,
ang sagot ko ay blanko.

nais kitang mahalin nang buo
ngunit di magawa dahil maging ang paborito mong kulay ay di ko matanto,
kung nais mo bang malamig o mainit ang iyong kape—
nagkakape ka nga ba o hindi?

bilang pa lamang ang alam ko sa'yo
nais kong kilalanin ka,
ganoon ako kaseryoso.

ngunit gaya ng balintuna ng buhay,
kung kailan nagmahal nang totoo
saka ka naman lumalayo.

parang paruparo,
marahan mong pinapagaspas ang iyong pakpak
papunta sa direksyong taliwas sa dapat kong puntahan.
ako'y tila batang sumusunod;
di alintana ang pagod sa paghabol,
lango sa ganda ng pakpak mong hugis puso.

nagpapadala sa pagmamahal mong ilusyon ko lang sa isip ang may buo.

lito // enero 28, 2024
sa kuwarto habang nagpapahinga

hindi mo dapat ikubli sa sarilina ang taong pinili mong pagkatiwalaanng dalisay na pusoang taong nangwawasak sa iyonang ...
17/01/2024

hindi mo dapat ikubli sa sarili
na ang taong pinili mong pagkatiwalaan
ng dalisay na puso
ang taong nangwawasak sa iyo
nang paunti-unti
hanggang sa maubos ka
at mawalan nang gana sa mundo.

alam kong pilit mo siyang pipiliin
dahil sagrado kayong nangako sa isa't isa
at may mga taong sa inyo'y umaasa.

ngunit hindi mo dapat ikubli sa sarili
na alam mong
ang pag-ibig ay hindi dapat nakakapaso;
hindi mo kailangang lumuhod para lingunin ka nito;
hindi pag-ibig ang pagpilit sa taong magbago;
hindi pag-ibig ang pagtangis sa gabi nang tahimik para hindi ito magising sa mahimbing niyang pagkakatulog.

malayo sa mukha ng pag-ibig ang pagkakaroon ng pasa sa puso.

kakaibang pag-ibig // enero 17, 2024
sa ikalawang palapag ng bahay.

07/01/2024

sana sinabi mo,
na kaya pala binusog
at pinuno ng paruparo ang aking tiyan,
dahil balang araw ako'y iyong gugutumin
sa atensyon at seguridad.

hanggang sikmura ko'y sumakit na
dala ng panibugho't pangamba.

ang ibigin ka ay talaga nga namang nakakasuka.

love ulcer//enero 7, 2024
sa kusina.

04/01/2024

hindi na ako naggugupit ng buhok.

di gaya ng dati,
kung malungkot ako
o di kaya ay galit sa sarili,
agad kong kukunin ang gunting
at buhok ay gugupitin.

ang habang mababawas ay nakadepende
sa sidhi ng damdaming nararamdaman—
minsan hanggang balikat;
leeg naman kung sobra ang bigat.

pero nang dumating ka,
dalawang buwan na nang buhok ko'y di binawasan,
maganda pala siyang tingnan
kapag ito'y aking inalagaan.

salamat sa iyong pag-iral.
hindi ko na kailangang pakialaman ang buhok pag malungkot,
dahil nang makilala kita,
may kahati na ako sa lahat ng saya, hinagpis, at p**t.

buhok sentiments // enero 5, 2023
sa kuwarto.

03/01/2024

hindi na ako naghahanap
ng pagmamahal na di dapat sa akin.
hinahayaan ko na lang ang sarili
na tangayin ng hangin;
nakapikit akong dinaramdam
ang yapos nito habang nililipad ako kung saan.
hindi na rin ako nauuhaw
sa atensyon ng taong
maging sa sariling tahanan ay ligaw.
sawa na akong maghintay ng oras,
kung kailan ako kailangan—
at kung kailan ako maalala.

sa ngayon, sarili ko muna.
pagod na akong habulin ang pilit na tumatakbo palayo,
ubos na ang enerhiya kong kumapit sa bagay na kumakawala,
ubos na ang luha—
sa ideyang mabilis mawala ang bagay kapag mahalaga.
dito muna ako sa sulok,
susulitin ang pagiging maligaya,
habang sarili'y unti-unti na namang kinikilala.

ako na muna // enero 3, 2024
sa gilid ng bahay habang nakatalukbong ng kumot.

Address

Quezon City

Website

Alerts

Be the first to know and let us send you an email when Salaysay sa Buwan posts news and promotions. Your email address will not be used for any other purpose, and you can unsubscribe at any time.

Shortcuts

Share