23/04/2026
Ilang mamamahayag gustong busalan ng Rizal PNP?
UMALMA ang ilang miyembro ng mga mamamahayag na kasapi sa PaMaMariSan-Rizal Press Corps matapos itong iwanan sa ere ng Public Information Office ng Rizal Police Provincial Office.
"Good morning, everyone. This is in connection with the recently conducted Media Summit here at Rizal PPO, where the media accreditation process was emphasized. In compliance with MC 2023-053, entitled “Revised Media Relations Policy,” only those who meet the required accreditation standards will be included in the new Viber group to be created for this purpose," ayon kay PCapt. Mariesol Tactaquin, hepe ng Rizal PNP-PIO.
Isang lingo bago nito, nag-courtesy call ang nasabing grupo sa bagong talaga na provincial director na si PCol. Eleazar Barber at isa sa mga napag-usapan ay ang renewal ng accreditation.
Tulad ng mga nakaraang renewal, tumalima naman ang mga miyembro at nagsumite ng kinakailangang dokumento.
Nabanggit din sa usapan ang may kaugnayan sa isasagawang media summit ng Rizal PNP upang lalo pang maging mabunga ang kooperasyon ng kapulisan at media sa paggawa ng mga balita.
Sa pakikipag-ugnayan ng pangulo ng PaMaMariSan-Rizal Press Corps na si Niel Alcober kay Tactaquin, dito na nagkaalaman na ang nasabi palang media summit ay inisyatibo ng isa pang grupo ng mga “mamamahayag” na kasapi sa Rizal PNP Press Corps.
Ayon sa kasaysayan ng nasabing grupo, nagkawatak-watak na ito dahil una, karamihan sa mga miyembro nito noon ay mga tinatawag na haosiao o hindi lehitimong mamamahayag at ikalawa, may akusasyon na ang kasalukuyang presidente ay ayaw umano bumaba sa puwesto sa kabila nang dapat ay napalitan na ito.
Hindi na kinuwestyon ng PaMaMariSan-Rizal Press Corps ang pagiging lehitimo ng kabilang grupo at pumayag na lamang ito na magco-exist sa pagko-cover ng balita sa pagkakaalam na hindi lalampas sa lima ang mga miyembro nito.
Dahil dito, dalawa lamang sa 23 miyembro ng PaMaMariSan-Rizal Press Corps ang dumalo sa nasabing media summit kung saan doon naganap ang proseso sa renewal ng accreditation.
Pagkatapos ng nasabing media summit ay bigla na lang nakatanggap ng mensahe mula kay Tactaquin tulad ng mababasa sa itaas at bigla na lang ‘nag-left the group’ ang lahat sa Team PIO.
Giit ni Alcober, wala umano sa usapan na doon sa media summit gagawin ang renewal kundi puwede itong isumite anumang oras at tulad nang dati ay puwede na sa ipadala sa Viber.
Isa pa, bakit umano sila iniwan sa ere gayong ang kanilang mga miyembro lamang ang nagbabalita ng lahat ng press release ng at kung mayroon man ang kabilang grupo ay wala itong pino-post sa Viber group.
Batay sa nasabing mensahe, lilikha uli ng panibagong Viber group ang PIO para lamang doon sa mga dumalo sa media summit.
Tulad ng naunang argumento ni Alcober, OK na ang co-existence ng dalawang grupo, pero sana umano ay maramdaman man lamang ng kanilang grupo na dalawang grupo ang kinikilala ng PIO at hindi pumapabor sa isang grupo lamang.
Umani rin ng negatibong reaksyon mula sa mga media practitioners na matagal nang kumokober sa probinsya ang hakbang na ito ng Rizal PNP-PIO.
Tila nagiging "selective" na umano ang Rizal PNP sa pagpili ng mga mamamahayag na bibigyan ng impormasyon, nagsisilbi itong banta sa malayang pamamahayag at karapatan ng publiko na makatanggap ng mabilis at tamang impormasyon.
Sa ngayon, nananatiling hamon para sa mga hindi pa accredited na reporters kung paano makakakuha ng mga spot reports at updates mula sa Rizal PNP, lalo na’t ang bagong sistema ay tila naglalagay ng pader sa pagitan ng kapulisan at ng mga kritikal na mamamahayag.
