Komedya ng San Dionisio

11/05/2026

Malugod na nakikiisa ang Komedya ng San Dionisio sa paggunita ng ika-446 na gunitaon ng pagkakatatag ng ating minamahal na bayan ng Parañaque ngayong ika-11 ng Mayo, 2026.

Mula sa isang payak at tahimik na bayan na unang hinubog ng pananampalatayang Katolikong itinanim ng mga paring Agustino, ang Parañaque ay naging isang masigla at maunlad na lungsod na ngayon ay kilala bilang “Mega City By the Bay.” Sa paglipas ng mga siglo, nananatiling buhay ang diwa ng pananampalataya, kultura, at pagkakaisa ng mamamayang Parañaqueño.

Kasabay ng pag-unlad ng lungsod ay ang patuloy na pagsibol ng ating mayamang tradisyon ng Komedya—isang sining na nagsasalaysay ng pananampalataya, kabayanihan, at pagtatagumpay ng kabutihan. Sa bawat kilos, awit, at pagtatanghal, patuloy nating inaalala ang ating makasaysayang pinagmulan at ang malalim na debosyong namayani sa ating bayan sa loob ng maraming henerasyon.

Nawa’y manatiling matatag ang pananampalatayang iniwan ng ating mga ninuno at lalo pang yumabong ang kultura at pagkakaisa ng bawat Parañaqueño at Parañaqueña.

10/05/2026

ABANGAN.

09/05/2026

Ngayong ika-10 ng Mayo, 2026, taus-pusong pagbati ng Komedya ng San Dionisio sa lahat ng mga ina na nagsisilbing ilaw, gabay, at lakas ng bawat tahanan at pamayanan.

Tulad ng mga reynang tampok sa tanghalan ng Komedya, ang bawat ina ay larawan ng kagandahang-loob, katatagan, sakripisyo, at walang kapantay na pagmamahal. Sa likod ng bawat matagumpay na pamilya at pangarap ay ang tahimik ngunit dakilang pag-aaruga ng isang ina.

Sa pagdiriwang na ito, ipinagkakatiwala namin ang lahat ng mga ina sa paggabay at panalangin ng mapagkalingang Ina at Patrona ng Lungsod at Diyosesis ng Parañaque, Nuestra Señora del Buen Suceso.

Katulad ng isang makulay na pagtatanghal ng Komedya, nawa’y manatiling buhay sa ating mga puso ang pagmamahal, pananampalataya, at pagkakaisa na unang itinuro ng ating mga ina.

Maligayang Araw ng mga Ina!

30/04/2026

Sa Araw ng mga Manggagawa ngayong Mayo 1, 2026, ang Komedya ng San Dionisio ay taos-pusong nagpupugay sa lahat ng manggagawang Pilipino. Sila ang tunay na mga bida sa ating buhay.

Tulad ng mga mandirigma sa Komedya, kayo ang mga taong may tapang, tiyaga, at paninindigan. Nakikibaka kayo araw-araw; sa bawat pawis at sakripisyong iniaalay ninyo, inaalagaan ninyo ang inyong pamilya at ang buong bayan.

Kayo ang mga bayaning hindi laging nakikita, ngunit ang inyong mga kuwento ay dapat iparinig at ipagdiwang. Nawa, itanghal natin ang dangal ng paggawa; ipaglaban natin ang karapatan ng manggagawa. Nararapat kilalanin ang kanilang mahalagang papel sa ating lipunan.

Ang Komedya ng San Dionisio ay buong pusong nakikiisa at nakikibahagi sa Araw ng mga Manggagawa.

Mabuhay ang mga uring manggagawa!
Mabuhay ang Komedya!

28/03/2026

Ang World Theater Day o Pandaigdigang Araw ng Teatro ay nagbibigay-pugay sa mahalagang papel ng teatro bilang daluyan ng sining, kultura, at kamalayang panlipunan. Kinikilala ang mga alagad ng tanghalan na sa pamamagitan ng kanilang talento at malikhaing pagpapahayag ay naipapakita ang katotohanan, damdamin, at karanasan ng tao. Ang teatro ay nagsisilbing salamin ng lipunan at tulay ng pagkakaunawaan, na patuloy na nagbibigay-buhay sa kultura at pagkakakilanlan ng bawat bansa.

Ang Komedya ng San Dionisio ay buong pusong nakikiisa at nakikibahagi sa Pandaigdigang Araw ng Teatro.

28/02/2026

Halina't panoorin ang ilang sipi ng "Prinsesa Perlita" ni Dra. Felicidad Mendoza na itinanghal ng ating samahan sa D.L. Umali Hall ng University of the Philippines Los Baños sa pangunguna ng National Commission for Culture and the Arts noong Pebrero 20, 2026 bilang pagdiriwang ng Pambansang Buwan ng Sining na may temang "Ani ng Sining: Katotohanan at Giting" sa palatuntunang "Kuwento at Espasyo."

Higit sa LIKE at SHARE,
mag-SUBSCRIBE din sa official Youtube account ng Komedya ng San Dionisio:

https://youtube.com/?si=ZUpBXfYoeiRY0IDw

An excerpt of the Prinsesa Perlita at UPLB. February 20, 2026.

26/02/2026

Maraming salamat po sa inyong suporta at pagkilala sa sining at kultura ng bayan lalo na sa aming samahan,
Los Baños Municipal Mayor
Hon. Neil Andrew Nocon!

24/02/2026

KSD 🤝 Mayor Nocon

Lubos na nagpapasalamat ang buong Komedya ng San Dionisio kay Los Baños Municipal Mayor Neil Andrew Nocon sa kanyang paghanga at pagsuporta sa ating samahan sa katatapos na "Kuwento at Espasyo" na ginanap sa D.L. Umali Hall ng University of the Philippines Los Baños noong Pebrero 20, 2026.

Nasaksihan at napanood ni Mayor Nocon ang ating sipi ng "Prinsesa Perlita" ni Dra. Felicidad M. Mendoza na labis niyang ikinatuwa at nagbahagi sa mga nagsiganap ng kanyang kasiyahan sa pagbabahagi ng ating minanang kultura sa lalawigan ng Laguna; isa din sa mga kinahiligan ng butihing alkalde noong kanyang kabataan ay ang magtanghal sa teatro sa kanilang bayan.

Nagbigay din ng mga posters si Mayor Nocon na bahagi ng kanyang proyekto upang ipalaganap ang kaalaman sa nakararami ukol sa ating Pambanasang Watawat, ang Ebolusyon ng mga Watawat ng Pilipinas, ang buhay ni G*t Jose Rizal sa lalawigan ng Laguna at ang paglilibot sa mundo ni G*t Jose Rizal.

Muli, maraming salamat po sa inyo,
Los Baños Municipal Mayor Neil Andrew Nocon!

23/02/2026

KSD sa UPLB

Isang araw ng makabuluhan, makulay at pagdiriwang ng mahuhusay na talento at pagbabahagi ng galing sa sining at kulturang Pilipino.

Nagsama-sama ang mga kalahok mula sa iba't ibang bahagi ng Luzon sa palatuntunang "Kuwento at Espasyo" na ginanap noong Biyernes, Pebrero 20, 2026 sa D.L. Umali Hall ng University of the Philippines Los Baños.

Ang palatuntunan ay isinagawa ng National Commission for Culture and the Arts at UPLB Office for Initiatives in Culture and the Arts kasama si G. Edward Perez, Executive Director ng ARTIST, Inc. at Program Director, 2026 NAM-Luzon, isa sa mga naging susi sa matagumpay na palatuntunan - ito ay bahagi ng mga gawain ngayong buwan ng Pebrero na itinalagang "Pambansang Buwan ng Sining" o "National Arts Month."

Naging bahagi dito ang ating samahan, Komedya ng San Dionisio, kung saan ipinakita nito ang ilang sipi mula sa "Prinsesa Perlita" ni Dra. Felicidad M. Mendoza.

Lubos na nagpapasalamat ang KSD sa lahat ng mga sumuporta, tumulong, nakiisa, at nakasama upang ang ating pagtatanghal ng Komedya ay maitampok sa nakararami lalo na sa mga kabataan at maipakita ang yamang minana na patuloy na yumayabong sa pagdaan ng panahon.

Mabuhay ang Sining at Kultura ng Pilipinas!
Mabuhay ang Komedya!
Mabuhay ang Komedya ng San Dionisio!