28/04/2025
𝗣𝗔𝗚𝗟𝗜𝗟𝗜𝗡𝗔𝗪: Ang Kanidugan Festival ay hindi basta-basta pista, ito’y buhay, alaala, at pagkakakilanlan ng mga taga-Odiongan. Hindi natin ito binago mula sa naunang bumuo nito; sa halip, ibinalik pa nga natin ito sa orihinal nitong anyo at layunin: ang ipakilala ang pangabuhi ag kasadyahan sa kanidugan. Sa panahong unti-unting nawawala ang saysay ng mga selebrasyon, tayo’y humakbang paatras para makalundag nang mas malalim sa ating pinagmulan.
Ang pagpili kay Sir Rhexem Greg R. Llasos bilang consultant ay hindi tungkol sa kung saan siya galing, kundi tungkol sa kanyang field of expertise at ang kaya nyang dalhin para sa pagpapaangat ng Kanidugan Festival. Siya ay nag sanay sa Cultural Center of the Philippines Arts Academy sa larangan ng Culture Based Choreography for Festival Dance, Mounting Dance Production at Music Composition, at dati nang naging consultant ng Odiongan noong 2019. Hindi siya bago sa atin—kundi isa sa mga unang tumulong maghubog ng dignidad ng ating selebrasyon. Sa katunayan, kasabay ng pagkonsulta sa kanya ng Odiongan, pumunta rin siya ng Nabua, Camarines Sur kung saan kinuha rin siyang resource trainer sa kanilang festival.
Ang Kanidugan Festival 2025 ay hindi gawa ng iisang tao lamang. Ito ay pinamunuan ng Festival Chairman na si Sir Mark Ericson Fiedacan, kasama ang Festival Director na si Sir Victor André Factor—parehong taga-Odiongan, at parehong empleyado ng LGU. Si Sir Llasos lang ang kinailangang magkaroon ng MOA dahil siya ang consultant. Ang kanilang pinagsamang husay at paninindigan ang nagbukas ng daan para sa isang mas matibay at makabuluhang Kanidugan Festival, at sumasalamin sa kasaysayan at kultura ng Odionganon.
Ngayong taon, sariling atin ang ating ipinakita. Orihinal ang galaw, ang musika, ang damdamin sa isa sa mga segement or part ng Kanidugan Performance. At ngayong taon din idiniin ang lokalisasyon ng performers, dancers at drum beaters - lahat dugong Odionganon. At hindi lang iyon—isinama rin natin ang Pangupong na ritwal, isang lokal na tradisyong Odionganon ng pasasalamat sa Maykapal. Isa itong tahimik na rebolusyon, pagbalik sa ating ugat sa harap ng makabagong panahon.
Hindi ito pagsisimula ng bago—ito ay pagbalik sa tunay. Pag allign ng ating sariling kwento sa pag tanghal ng Kanidugan Festival. At bilang mga tagapangalaga ng kultura, tungkulin nating ipaglaban na ang pista ay hindi lang para sa aliw kundi para sa alaala, hindi lang para sa saya kundi para sa saysay.
Ito ang Kanidugan Festival na may puso. Kanidugan Festival na may ugat. Kanidugan Festival na Tatak Odionganon...
