24/04/2024
GANITO SILA MAGSULAT NG DULA...
Sa araw-araw na kasama ko ang mga batang ito, natutuwa akong kahit paunti-unti ay nakahuhubog ako ng mga susunod na magtataguyod sa wika at panitikan nitong bansa.
Naaalala ko noong nakaraang taon, Grade 7 pa lang sila noon, nang isabak ko sa isang Pambansang Paligsahan na pinangasiwaan ng CCP, LIRA at sa pakikipagtulungan ng GSIS sa Kamperformatura, mahiyain at walang tiwala pa sa sariling kakayahang makapagsulat ang mga batang ito. Bilang g**o nila sa Malikhaing Pagsulat, maliban sa lakas ng loob, tibay ng dibdib at kaalaman sa pagsulat, inaraw-araw namin ang pag-e-ensayo, lektura, sulat, workshop, rebisyon, editing at sulat, sulat, sulat pa ulit. Halos dalawang linggo ko rin noon sila inihanda sa paligsahang iyon, na kahit Sabado't Linggo ay nasa paaralan kami. Sa wakas, nagbunga naman ang aming pagpapagal. Nasungkit ni Queen Saldivar ang pagiging Kampiyon sa pagsulat at pagbigkas ng tula. Maliban sa liryo, tropeo na gawa ng mga premyadong visual artist, nagkamit pa siya ng 15,000 piso.
Pagkatapos noon, isang paligsahan naman ang pinaghandaan at dinaluhan namin, sa panahong iyon, kabi-kabila ang kailangang tugunang mga gawain: ang paghahanda sa nalalapit na Grand Recital ng mga estudyante, editing ng book (zine) ng mga estudyante, at kung ano-ano pa, kakaunting panahon lamang ang nailaan namin sa pag-e-ensayo bilang paghahanda sa RFOT (sulat-tanghal category). Ganonpaman, nasungkit pa rin naman ni Aries Federis ang Ikalawang Puwesto sa NCR, sa kabila na siya ay Grade 7 pa lamang noon.
Ngayong taon, muli, sasabak ulit ang mga batang ito sa mga paligsahan, isa na diyan ang Sulat- Tanghal sa RFOT at sana maihabol namin ang ipapasa nila sa Palanca sa Mayo. At sana, makasungkit pa rin kami ng bituin.
Mas kampante na ako ngayon sa kanila, nabawasan na kasi ang labis-labis noon na paglalaro, kulitan, asaran at iba pang asal ng isang normal na bata. Ngayon, hindi na nila pinatutulog ang mga boses, ang maliliit na tinig na kumukulit sa kanilang tainga, at heto na nga, malayang dumadaloy na sa mga batang ito ang ideya sa kanilang isinusulat. Marami na silang nabibigyan ng boses. Sana, kapag natapos namin ang mga aklat nila, makasama namin kayo sa pagbabasa lalo na ang pakikinig sa mga tauhang nilikha ng mga batang ito.
Jayson A. Cruz
G**o, Malikhaing Pagsulat.
