19/10/2026
PCL BICOL REGIONAL LEGISLATIVE SUMMIT, MATAGUMPAY NA IDINAOS SA CAMARINES SUR ; PCL REGIONAL CHAIRMAN BM REY KENNETH ONING NANGUNA SA AKTIBIDAD
PILI, CAMARINES SUR — Matagumpay na idinaos ang 2026 PCL Bicol Regional Legislative Development and Leadership Summit nitong October 15–17, 2026 sa Fuerte CamSur Sports Complex, Pili, Camarines Sur, na dinaluhan ng mga lokal na mambabatas mula sa iba’t ibang panig ng Rehiyon Bicol para sa tatlong araw na talakayan at pagpapalitan ng kaalaman sa pagsusulong ng mahusay na pamamahala.
Pinangunahan ni PCL Bicol Regional Chairperson Rey Kenneth N. Oning ang pagtitipon, sa pakikipagtulungan ng Pamahalaang Panlalawigan ng Camarines Sur. Dinaluhan ito ng mahigit 300 na mga konsehal at bise alkade mula sa anim na lalawigan ng rehiyon, kasama ang iba pang mga lokal na opisyal, upang palakasin ang kanilang kakayahan sa paggawa ng mga ordinansa, pagbuo ng mga polisiya, at pagtugon sa mga pangangailangan ng kani-kanilang komunidad.
Nakiisa sa summit bilang mga espesyal na panauhin sina PCL National Chairman Hon. Atty. Raul R. Corro, Naga City Mayor Leni Robredo, Camarines Sur Governor Luis Raymund “LRay” Villafuerte Jr., Vice Governor Salvio Patrick Edmund F. Fortuno Jr., Congressman Migz Villafuerte at Senator Joseph Victor “JV” Ejercito.
Samantala, nagbahagi si DILG Bicol Regional Director Atty. Arnaldo E. Escober Jr. ng mahahalagang pananaw hinggil sa mga alituntunin ng kagawaran at sa pagpapalakas ng kakayahan ng mga lokal na sanggunian sa pagtupad sa kanilang mga tungkulin.
Tampok din sa summit ang Inter-Agency Forum on El Niño Mitigation and LGU Preparedness Strategies, na nagbigay-daan sa talakayan hinggil sa kahandaan ng mga lokal na pamahalaan sa mga hamong dulot ng El Niño at iba pang pagbabago sa kondisyon ng panahon. Kasama rito ang mga kinatawan mula sa DOST-PAGASA, National Irrigation Administration (NIA) Bicol, Department of Health (DOH-CHD) Bicol, Department of Environment and Natural Resources (DENR) Bicol at PENRO, at Department of Agriculture (DA).
Ayon kay PCL Bicol Chairperson Rey Kenneth Oning, ang tagumpay ng summit ay patunay ng matibay na pagkakaisa at dedikasyon ng Liga ng mga Konsehal sa Bicol na itaas ang antas ng serbisyo at lehislasyon sa bawat bayan at lungsod.
Ipinakita ng aktibidad na kapag nagtutulungan at nagkakaagapay ang mga lokal na mambabatas sa Bicol, mas mabilis at mas pangkalahatan ang pag-unlad ng buong rehiyon.
