06/04/2023
SENAKULO SANG PILA KA RESIDENTE SANG BARANGAY CULASI, GINAHIWAT SUBONG NGA HUWEBES SANTO
Tuigan nga nagapatigayon sang Senakulo ang katapo sang sacrifice movement nga mga residente sang Brgy. Culasi, Roxas City sa kada tion sang Semana Santa.
Sa pagpakig-angut sang Bombo Radyo kay Roland Barrera, presidente sang nasambit nga grupo, ginpahayag sini nga ang ila paghiwat sang Senakulo amu ang pagpaintindi sa mga kabataan sang naagyan nga pagpasakit ni Ginoong Hesukristo antes paman ini ginlansang sa Krus agud matubos kita sa kasal-anan.
Dugang pa sini nga kapin 50 katuig na nila nga ginahiwat ini sumugod pa sa tiyempo sang ila katigulangan nga ginpanubli sang ila henerasyon.
Ginaumpisahan nila ini sumugod Miyerkules Santo tubtob Biyernes Santo kun sa diin humalin sa Sitio Paon, Brgy. Culasi, ginalakat sang mga ini palibot sa San Roque, pabalik sa Sitio Paon, kag buwas nga adlaw sang Biyernes Santo alas-9 sa aga, sa bukid sang Biya, sa baylo nga igalansang sa Krus ang nagtindog nga Hesukristo nga si Richard Camacho, igahigot nalang ini sa Krus.
Nahibaluan nga may masobra 80 katawo ang mga nagapasakop sa nasambit nga kahiwatan.
Text: RMBarnuevo
