17/06/2026
AI-Powered Border Security System Pushed by BI; P10.74-B CAISS Project Seen to Modernize Philippine Gateways at Zero Cost to Government
MANILA — Isinusulong ng Bureau of Immigration (BI) ang isang komprehensibo at makabagong border security system na sasaklaw sa buong bansa, hindi lamang sa Ninoy Aquino International Airport (NAIA), upang mas mapalakas ang kakayahan ng Pilipinas laban sa human trafficking, terorismo, at iba pang transnational crimes.
Ayon sa BI, ang panukalang Civil Aviation and Immigration Security Services (CAISS) project ay magdadala ng makabagong teknolohiya tulad ng artificial intelligence (AI), biometrics, at real-time data analytics upang mapahusay ang border control operations sa mga pangunahing international gateways ng bansa—nang walang direktang gastusin mula sa pamahalaan.
Sa isang panayam, ipinaliwanag ni BI spokesperson Dana Sandoval na ang P10.74-bilyong unsolicited Public-Private Partnership (PPP) proposal ay kasalukuyang sumasailalim sa pagsusuri ng iba't ibang ahensya ng gobyerno dahil sa lawak ng benepisyo at kakayahan nitong iangat ang antas ng teknolohiya ng bansa.
“Ang pinakamahalagang aspeto ng proyektong ito ay ang pagiging end-to-end nito. Mula sa frontline operations hanggang sa data collection, processing, at assessment, saklaw ng sistema ang buong proseso at hindi lamang ito nakatuon sa NAIA,” ani Sandoval.
Ayon sa kanya, sasaklawin ng CAISS ang lahat ng 11 operational international airports sa bansa, isang international seaport sa Zamboanga, at anim na border crossing stations. Kabilang sa mga serbisyong ilalagay ang electronic gates, AI-driven data processing, at biometric capture systems na magpapahusay sa seguridad at kahusayan ng immigration procedures.
Mas Epektibong Pagsugpo sa Krimen
Bukod sa pagpapabilis ng proseso sa mga paliparan at pantalan, sinabi ni Sandoval na makatutulong ang CAISS upang mas matukoy at mabantayan ang mga indibidwal na posibleng sangkot sa ilegal na aktibidad.
Ipinaliwanag niya na may kakayahan ang sistema na magtakda ng partikular na parameters upang awtomatikong masuri at ma-filter ang impormasyon ng mga biyahero. Dahil dito, magiging mas target-oriented ang monitoring at enforcement efforts ng mga awtoridad laban sa mga taong maaaring magdulot ng banta sa seguridad ng bansa.
Aniya, ang ganitong uri ng teknolohiya ay matagal nang ginagamit sa ibang mga bansa at makatutulong upang makahabol ang Pilipinas sa mga internasyonal na pamantayan sa border security.
Pinakabagong Teknolohiya Kada Apat na Taon
Isa sa mga tampok ng panukala ay ang garantisadong pag-upgrade ng sistema kada apat na taon upang matiyak na laging gumagamit ang BI ng pinakabagong teknolohiya nang hindi nangangailangan ng karagdagang pondo mula sa gobyerno.
Ayon kay Sandoval, ang proyekto ay nakabatay sa user-pay model kung saan ang mga gagamit lamang ng serbisyo ang magbabayad para rito.
Dahil dito, hindi umano mapapasan ng mga mamamayang hindi gumagamit ng international travel services ang anumang gastusin kaugnay ng proyekto.
Walang Naghain ng Mas Mabuting Alok
Dumaan na rin ang proyekto sa isang Swiss challenge, isang proseso kung saan binibigyan ng pagkakataon ang ibang kumpanya na maghain ng mas magandang o mas murang alternatibong panukala.
Ayon sa BI, nagpadala pa ng mga paanyaya ang ahensya sa iba't ibang kumpanya na may kakayahang magbigay ng katulad na teknolohiya. Gayunman, wala umanong naghain ng counterproposal laban sa orihinal na alok.
Nirepaso na rin ang proyekto ng Department of Finance, Department of Justice, at Office of the Solicitor General. Gayunpaman, nilinaw ni Sandoval na wala pang pinal na kontratang nilalagdaan at wala pang anumang koleksiyon o bayaring ipinapatupad kaugnay ng proyekto.
Timbangin ang Seguridad at Kapakanan ng Publiko
Kinilala rin ni Sandoval ang kahalagahan ng maingat na pagtitimbang sa pagitan ng benepisyong maidudulot ng modernisasyon at ng anumang posibleng gastos na maaaring kaharapin ng mga biyahero.
Aniya, mahalagang isaalang-alang hindi lamang ang epekto ng proyekto sa pambansang seguridad kundi maging ang pananaw ng publiko at iba pang stakeholders bago tuluyang magpasya ang pamahalaan.
Binigyang-diin din niya na ang CAISS ay nananatiling isang panukala mula sa pribadong sektor at patuloy pang sinusuri ng gobyerno bago ito aprubahan o tuluyang ipatupad.
Kapag naaprubahan, sasaklawin ng proyekto ang mga pangunahing international gateways kabilang ang NAIA, Clark, Davao, Mactan-Cebu, Boracay, Iloilo, Kalibo, Laoag, Bohol-Panglao, Puerto Princesa, at Zamboanga airports, gayundin ang Zamboanga seaport at anim na border crossing stations.
Nakasunod ang sistema sa mga pamantayan ng International Civil Aviation Organization (ICAO) para sa biometric at border security operations. Kabilang sa mga pangunahing tampok nito ang advanced passenger information systems, contactless facial recognition border control, biometric kiosks, criminal record search engines, at deception detection technologies.
Sa kasalukuyan, nananatili pa sa yugto ng pagsusuri ang CAISS project. Gayunpaman, iginiit ng BI na handa na ang teknolohiya, malawak ang saklaw nito sa buong bansa, at wala itong agarang pinansyal na pasanin sa pamahalaan—isang mahalagang hakbang habang nagsisikap ang Pilipinas na makahabol sa antas ng border security ng iba pang mga bansa sa ASEAN at sa buong mundo.
