02/03/2026
BINIBINING FILIPINA
Pepito Roman
Hindi naman palaging batayan ang katanyagan
Hindi rin kailangang balingkinitan lang ang katawan
Hindi basehan ang katayuan sa lipunan
Natamong papuri at parangal, hindi rin tunay sukatan
Binibining Filipina na wala sa telebisyon, magazine, at dyaryo
Silang nagwawalis sa lansangan at naglilinis ng inidoro
Binibining Filipina na wala sa entablado
Mga tindera sa palengke, naglalako ng kung anu-ano
Binibining Filipina madalas hindi natin batid
Mga aleng nasa bukid, sa putik nanlilimahid
Binibining Filipina, hindi man nasusulyapan ng kasikatan
Mga dilag sa pagamutan, nag-aalaga ng mga may karamdaman
Binibining Filipina hindi sa mga patimpalak
Silang abala sa gawaing bahay at pag-aaruga ng anak
Binibining Filipina na hindi kinikilala ng mundo
Silang mga nasa silid aralan, buong husay na nagtuturo
Binibining Filipina hindi lang sa salita
Lugod sa kanyang puso, tunghay sa kanyang gawa
Laksang pagsubok na nakaharang, hindi niya iniinda
Magiting niyang ginagampanan, tungkuling ipinagkatiwala sa kanya
Binibining Filipina, mahusay sa iba’t-ibang larangan
Bantog sa katapangan, mayaman sa karunungan
Sa likas niyang kagandahan, bighani ang buong daigdig
Hindi karangyaan ang kanyang nais, kundi isang wagas na pag-ibig
*Photo credits to the rightful owners.