15/10/2026
राखेपद्वारा गुन्जन शाह क्यान बोर्ड सदस्यबाट ९ दिनमै फिर्ता
काठमाडौँ — राष्ट्रिय खेलकुद परिषद् (राखेप) ले नेपाल क्रिकेट संघ (क्यान) को बोर्ड सदस्यमा मनोनीत गरेको ९ दिनमै गुन्जन शाह ठकुरीलाई उक्त पदबाट फिर्ता बोलाएको छ।
राखेपका सदस्यसचिवस्तरीय निर्णयअनुसार उनलाई फिर्ता बोलाउने पत्र जारी गरिएको हो।
यसअघि उनलाई असोज १९ गते क्यानको बोर्ड सदस्यमा नियुक्त गरिएको थियो।
राखेपले प्राविधिक कारण देखाउँदै गुन्जन शाहसहित अन्य खेल संघमा मनोनीत गरिएका पदाधिकारीहरूलाई समेत फिर्ता बोलाएको जनाएको छ।
क्रिकेटको नीतिगत ज्ञान र व्यवस्थापकीय अनुभव नभएको व्यक्तिलाई क्यानको बोर्डमा पठाइएको भन्दै उनको नियुक्तिलाई लिएर खेल क्षेत्र र सरकारी अधिकारीहरूबाट व्यापक आलोचना भएको थियो।
प्रधानमन्त्री कार्यालयको निर्देशनसमेत आएपछि राखेपले यो निर्णय लिएको बुझिएको छ।
दाङ, घोराहीकी बासिन्दा गुन्जन शाह पूर्व उद्योग, वाणिज्य तथा आपूर्तिमन्त्रीकी स्वकीय सचिव तथा रास्वपाकी केन्द्रीय सदस्य उम्मेदवार हुन्।
उनलाई छुम्बी लामाको ठाउँमा क्यानको विधानको व्यवस्थाबमोजिम सदस्य मनोनीत गरिएको थियो।
🏏
