25/09/2026
श्रमिक समूहबाट कांग्रेस महाधिवेशन प्रतिनिधिमा सर्वजित भण्डारीको उम्मेदवारी
नेपाली कांग्रेस मोरङ क्षेत्र नं. १ को महाधिवेशन प्रतिनिधि पदमा उर्लाबारी–४ का सर्वजित भण्डारीले श्रमिक समूहबाट उम्मेदवारी घोषणा गर्नुभएको छ। लामो समयदेखि श्रमिक अधिकार, सामाजिक सेवा र समुदायसँग जोडिएर काम गर्दै आउनुभएका भण्डारीले पार्टीको १५ औँ महाधिवेशनअन्तर्गत महाधिवेशन प्रतिनिधिका लागि आफ्नो उम्मेदवारी अघि सार्नुभएको हो।
भण्डारी २०५४ सालदेखि ट्रेड युनियन क्षेत्रमा आबद्ध भएर श्रमिकका हकहित र अधिकारका विषयमा सक्रिय रहँदै आउनुभएको छ। श्रमिकका समस्या, पेशागत सुरक्षा तथा सामाजिक सरोकारका विषयमा निरन्तर काम गरेको अनुभवलाई उहाँले आफ्नो उम्मेदवारीको प्रमुख आधारका रूपमा अघि सार्नुभएको छ।
सामाजिक क्षेत्रमा समेत सक्रिय भण्डारीले ग्लोबल युवा क्लबको संयोजकका रूपमा पाँच वर्ष काम गरिसक्नुभएको छ। त्यस्तै, हलुका सवारी चालक समूहको दुर्घटना संयोजकका रूपमा १२ वर्ष जिम्मेवारी सम्हाल्दै चालक तथा श्रमिक समुदायसँग नजिक रहेर काम गर्नुभएको अनुभव उहाँसँग छ। लामो समयदेखि विभिन्न सामाजिक तथा श्रमिक अभियानमा सक्रिय रहँदा समुदायका विभिन्न वर्ग र समूहसँग सहकार्य गर्दै आउनुभएका भण्डारीलाई सहकर्मी तथा स्थानीयस्तरमा मिलनसार र सहयोगी व्यक्तिका रूपमा चिनिन्छ। सामाजिक कार्यमा अग्रणी भूमिका निर्वाह गर्दै आउनुभएका उहाँले श्रमिक समुदायको आवाज पार्टीको संगठनात्मक संरचनामा थप प्रभावकारी रूपमा उठाउने प्रतिबद्धता व्यक्त गर्नुभएको छ। महाधिवेशन प्रतिनिधिका रूपमा निर्वाचित भएमा श्रमिक वर्गका मुद्दालाई पार्टीभित्र थप प्राथमिकताका साथ उठाउने, श्रमिकको सम्मान र अधिकारका विषयमा आवाज बुलन्द बनाउने तथा सामाजिक उत्तरदायित्वलाई राजनीतिक अभियानसँग जोडेर अघि बढाउने उहाँको धारणा छ। लामो समयको ट्रेड युनियन अनुभव, सामाजिक क्षेत्रमा गरेको योगदान र विभिन्न जिम्मेवारीमा रहेर हासिल गरेको अनुभवका कारण भण्डारीको उम्मेदवारीलाई मोरङ क्षेत्र नं. १ को श्रमिक समूहमा चासोका साथ हेरिएको छ।
