Jeevan Vigyan

22/08/2026

जीवन विज्ञान सत्सङ्ग

20/08/2026

काठमाडौंको भण्डारीगुठी, पशुपतिनाथ मन्दिर परिसरमा आयोजित श्री पशुपतिनाथ धार्मिक महा–महोत्सव–२०८३ अन्तर्गत श्रद्धेय रमेश नेपाल गुरुदेवले मौनको गहिराइ र जीवनमा यसको प्रभावबारे प्रेरणादायी प्रवचन दिनुभयो ।

गुरुदेवले मौन केवल नबोल्नु मात्र नभई स्वयंभित्र फर्किने, मनलाई शान्त बनाउने र जीवनको वास्तविक गहिराइलाई अनुभूति गर्ने साधना भएको बताउँदै सहभागीहरूलाई मौनको अभ्याससहित ध्यान गराउनुभयो । मौनले विचारको चञ्चलता घटाउँदै आत्मबोध, धैर्यता, शान्ति र आन्तरिक जागरणतर्फ लैजाने उहाँले चर्चा गर्नुभयो ।

कार्यक्रममा सहभागीहरूले मौन र ध्यानको माध्यमबाट आफ्नै अन्तरमनसँग जोडिने गहिरो अनुभूति गर्ने अवसर प्राप्त गरे ।

20/08/2026

बन्दै छ है !

जीवन विज्ञान धाम
अन्तर्राष्ट्रिय आध्यात्मिक तथा आरोग्य केन्द्र
थाक्रे-७, धादिङ

19/08/2026

प्राप्त खुशीलाई स्थिर कसरी राख्ने ?

प्राप्त खुशीलाई स्थिर कसरी राख्ने ? .....Discourse By: Ramesh Nep...

18/08/2026

२०८३ साउन ३० गते राष्ट्रिय वाणिज्य बैंक, ठमेलमा आयोजित स्वजागरण कार्यक्रममा श्रद्धेय भानु गुरुदेवले जीवन, कर्म, प्रेम, लक्ष्य र आत्मप्रेरणाका विषयमा प्रेरणादायी सन्देश दिनुभयो । कार्यक्रममा बैंकका कर्मचारीहरूको उल्लेख्य सहभागिता रहेको थियो ।
गुरुदेवले सहभागीहरूलाई स्वजागरण ध्यानको अभ्याससमेत गराउनुभयो ।

श्रद्धेय भानु गुरुदेवका प्रेरणादायी सन्देश
स्वजागरण भनेको आफूलाई चिन्नु, आफ्नो जीवनलाई बुझ्नु र आफ्नो सम्भावनालाई सही दिशामा प्रयोग गर्नु हो ।
दुःख र सुख कसैले बाहिरबाट दिने होइन । हाम्रो अनुभव र मनको अवस्थाले नै जीवनलाई सुख वा दुःखका रूपमा अनुभूति गराउँछ ।
जीवनमा कुनै कुराप्रति रुचि छैन भने बाहिरको कुनै कुराले पनि वास्तविक आनन्द दिन सक्दैन। रुचि आफूभित्रैबाट जन्माउनु पर्छ ।
प्रेम जीवनको महत्वपूर्ण आधार हो। प्रेम गर्न सकिने व्यक्तिसँग विवाह गरौँ; परिस्थिति फरक भए विवाहपछि आफ्नै सम्बन्धमा प्रेम सिर्जना गर्न सिकौँ ।
अहिले जहाँ छौँ, त्यहाँबाट एक कदम अगाडि बढ्ने ऊर्जा नै जीवनलाई अघि बढाउने प्रेरणा हो ।
‘म किन बाँचिरहेको छु ?’ भन्ने प्रश्नको उत्तर खोज्नु जीवनको महत्वपूर्ण यात्रा हो । आफ्नो जीवनको लक्ष्य पहिचान गर्नुपर्छ ।
शरीरलाई सक्रिय राख्न नियमित व्यायाम, योग र ध्यानलाई जीवनशैलीको हिस्सा बनाउन आवश्यक छ ।

17/08/2026

प्रविधिले जति नै फड्को मारे पनि, त्यसलाई सही दिशा दिने चाहिं मानिसको चेतना नै हो। समग्र स्वास्थ्य, खुसी र शान्त व्यक्तिले समाज, राष्ट्र र प्रकृतिको लागि साँच्चिकै योगदान दिन सक्छ र यही नै दिगो विकासको (SDG) वास्तविक जग समेत हो । थाईल्याण्डको बैंककमा "Empowering Communities with AI: Tools and Strategies for Sustainable Development" कार्यक्रमले प्रविधि उच्चतम प्रयोग र नैतिकताको संयोजनलाई नै आफ्नो उद्देश्य बनाएको थियो, जसमा स्वजागरण ध्यान विधिको प्रयोगात्मक अभ्यास गराइयो । सहभागीहरूबाट प्राप्त उत्साहपूर्ण र आत्मीय प्रतिक्रियाले नेपालको यस मौलिक ध्यान परम्पराको अन्तर्राष्ट्रिय महत्व थप स्थापित गरेको छ। बाहिरी परिवर्तन सँगै भित्री जागरण आवश्यक छ किनकी शान्त मनबाटै दिगो र अर्थपूर्ण परिवर्तनको सुरुवात हुन्छ ।

17/08/2026

जीवन विज्ञान प्रतिष्ठान युवा वृत्तद्वारा अन्तर्राष्ट्रिय युवा दिवस–२०८३ को अवसरमा आयोजित सप्ताहव्यापी ‘Wellness for Youth’ कार्यक्रम ५ किलोमिटर आरोग्य दौडसँगै सम्पन्न भएको छ।

सिफलचौरबाट सुरु भएको आरोग्य दौड सिनामङ्गल पिपलबोट हुँदै पुनः सिफलचौरमै पुगेर सम्पन्न भएको थियो। दौडमा ५ सयभन्दा बढी युवाको सहभागिता रहेको थियो।

दौडको पुरुषतर्फ गणेश सिंह प्रथम, नरेन्द्र सिंह रावत द्वितीय र अशोक शाह तृतीय भए। महिलातर्फ दीपा परियार प्रथम, आश्मा बि.क. द्वितीय र आयुष्मा आचार्य तृतीय भए।

दुवै विधाका प्रथम, द्वितीय र तृतीय हुने प्रतियोगीले मेडलसहित क्रमशः १५ हजार, ७ हजार र ५ हजार रुपैयाँ पुरस्कार प्राप्त गरे।

कार्यक्रमको समापनका अवसरमा श्रद्धेय भानु गुरुदेवले नेपालीहरू स्वभावैले उद्यमशील रहेको बताउँदै अब सकारात्मक सोच र उद्यमशीलताको बाटोमा अघि बढ्नुपर्नेमा जोड दिनुभयाे ।
दौडले पूर्वीय जीवनशैलीको प्रतिनिधित्व गरेको बताउँदै उहाँले नियमित शारीरिक सक्रियता स्वस्थ जीवनका लागि महत्वपूर्ण रहेको बताउनुभयाे। हरेक दिन बिहान उठेर हिँड्ने व्यक्तिको स्वास्थ्य राम्रो हुनुका साथै कार्यक्षमता पनि अरूको तुलनामा दोब्बर हुने उहाँको भनाइ छ।

अन्तर्राष्ट्रिय युवा दिवसको अवसरमा साउन २४ देखि ३० गतेसम्म सञ्चालन भएको सप्ताहव्यापी कार्यक्रममा रक्तदान, स्वजागरण ध्यान, साउण्ड हिलिङ, सङ्कीर्तनलगायत युवालक्षित विभिन्न कार्यक्रम सञ्चालन गरिएको थियो। जसमा १५ हजारबढी युवा प्रत्यक्ष सहभागी भए ।

17/08/2026

नाग पञ्चमीको शुभकामना !

17/08/2026

अन्तर्राष्ट्रिय युवा दिवस–२०८३ को अवसरमा जीवन विज्ञान प्रतिष्ठान युवा वृत्तद्वारा आयोजित “Wellness for Youth” सप्ताहव्यापी कार्यक्रमको छैटौँ दिन श्रद्धा, सङ्कीर्तन र स्वजागरणमय वातावरणमा सम्पन्न भएको छ।

जीवन विज्ञान प्रतिष्ठान, चाबहिलमा आयोजित कार्यक्रममा श्रद्धेय देवी गुरुमाबाट दीप प्रज्वलन तथा माल्यार्पण गरिएको थियो। अर्पण फुयाँलले स्वजागरण गराएका थिए भने तेजस्वी पन्तले स्वागत सङ्कीर्तन प्रस्तुत गरेकी थिइन्।

त्यसैगरी आँचल बस्यालले भक्ति सङ्कीर्तन प्रस्तुत गरिन् भने आकृती प्रसाईं, पवन चापागाई र सन्देश पौडेलले प्रस्तुत गरेको सङ्कीर्तनले कार्यक्रमलाई थप भक्तिमय र ऊर्जाशील बनाएको थियो।

सङ्कीर्तन, सङ्गीत र स्वजागरणको सुन्दर संयोजनले युवाहरूलाई आन्तरिक शान्ति, सकारात्मक ऊर्जा र आत्मचेतनासँग जोडिने अवसर प्रदान गरेको थियो।

गुरुदेवद्वयकाे उपस्थितीमा भएकाे कार्यक्रममा विभिन्न क्षेत्रका व्यक्तिहरूकाे उत्साहजनक सहभागिता थियाे ।

16/08/2026

अन्तर्राष्ट्रिय युवा दिवस–२०८३ को अवसरमा जीवन विज्ञान प्रतिष्ठान युवा वृत्तद्वारा आयोजित ‘Wellness for Youth’ सप्ताहव्यापी कार्यक्रमअन्तर्गत पाँचौँ दिन २०८३ साउन २८ गते युवा सम्मेलन सम्पन्न भएको छ ।

सम्मेलनमा श्रद्धेय रमेश गुरुदेव र भानु गुरुदेवले युवालाई दिनुभएको सन्देशका मुख्य अंश:

रमेश गुरुदेवका सन्देश
ध्यान केवल एकाग्र हुने अभ्यास होइन, सम्पूर्ण जीवनलाई नयाँ ढंगले बाँच्ने कला हो ।
प्राथमिक तहदेखि नै ध्यानको अभ्यास सुरु गर्न आवश्यक छ, विशेषगरी किशोरावस्थामा तनाव बढ्दै जाने भएकाले ।
जीवनमा आउने असल–नराम्रो, माया–गाली र सुख–दुःखलाई सम्हाल्न सक्ने क्षमता नै ध्यान हो ।
ध्यानको अभ्यासले रिसजस्ता भावनालाई व्यवस्थित गर्न र मनलाई सन्तुलित बनाउन सहयोग गर्छ ।
साँचो ध्यानपछि मन शान्त र स्थिर हुनुपर्छ; ध्यानपछि पनि मन अशान्त छ भने अभ्यासको गहिराइमा जान आवश्यक छ ।
नियमित ध्यानले मन शान्त बनाउने, आनन्द बढाउने र एकाग्रता क्षमता विकास गर्ने अनुभव हुन्छ ।
दुःखी वा अशान्त मन लिएर ध्यानमा बस्नुभन्दा पहिले आफूलाई ध्यानका लागि तयार पार्न आवश्यक छ ।

भानु गुरुदेवका सन्देश
संसारमा बढिरहेको तनाव, अशान्ति र डिप्रेसनको समाधान केवल शक्ति, प्रविधि वा प्रसिद्धिमा होइन; नेपालसँग रहेको योग, ध्यान र आरोग्य ज्ञानमा पनि छ ।
‘नेपालमा सम्भावना छैन’ भन्ने सोच त्यागेर युवाले आफ्नै बुद्धि, खोज र अनुभवबाट नयाँ कथा लेख्नुपर्छ ।
हजारौँ वर्षदेखि ध्यान, योग र सांस्कृतिक अभ्यास गर्दै आएको नेपालसँग विश्वलाई दिन सक्ने मौलिक ज्ञान र सम्भावना छ ।
आजको पुस्तासँग एआई र सामाजिक सञ्जालजस्ता प्रविधि छन्। यिनको सदुपयोग गर्दै नेपालको योग, ध्यान र आरोग्य ज्ञान विश्वभर पुर्‍याउन सकिन्छ ।
प्रविधिको उपयोग गरौँ, तर गैजेटको लतमा नफसौँ ।
संसारका असल कुरा उपभोग गर्ने मात्र होइन, आफूभित्रको ज्ञान र क्षमता संसारलाई दिने उपयोगी व्यक्ति बनौँ ।
‘योगी बन्नुभन्दा पहिले उपयोगी बनौँ ।’
आफ्नो लक्ष्यअनुसार प्राथमिकता निर्धारण गरी योजना बनाएर अघि बढौँ। महत्त्वपूर्ण काममा ऊर्जा र समय केन्द्रित गरौँ।
ध्यान, व्यायाम, प्राणायाम र नृत्यपछि प्राप्त हुने आन्तरिक शान्तिबाट सही अन्तरप्रेरणा जन्मिन्छ । बाहिरी अपेक्षाभन्दा भित्री प्रेरणाबाट जीवन जिऔँ ।
जीवनको अर्थ अरूले बताइदिने होइन, आफ्नै खोज र अनुभवबाट पहिचान गर्नुपर्छ ।
डर, तनाव र चिन्ताबाट मुक्त हुन दैनिक जीवनमा व्यायाम, प्राणायाम र ध्यानलाई नियमित बनाऔँ ।
पुराना बानी दोहोर्‍याएर नयाँ परिणाम खोज्न सकिँदैन; नयाँ परिणामका लागि नयाँ अभ्यास र नयाँ दृष्टिकोण आवश्यक हुन्छ ।
विगतका दुःख, आघात र पीडामा अल्झिएर नबसौँ । त्यसलाई शक्तिमा रूपान्तरण गर्दै नयाँ जीवन निर्माण गरौँ ।

सम्मेलनमा विभिन्न क्षेत्रका युवाहरूको उत्साहजनक सहभागिता रहेको थियो भने सहभागीहरूले श्रद्धेय भानु गुरुदेवसँग प्रश्नोत्तर गर्दै आफ्ना जिज्ञासा र अनुभवहरू साझा गरेका थिए ।