Nynorskens hus skal vere ein kulturarena i hovudstaden der ulike uttrykk møtest: musikk, dans, språk, litteratur, teater, handverk, design, debatt og forsking. Det skal vere ein arena for born, unge, amatørar og profesjonelle. Det skal vere eit rom for å undersøke og formidle nynorsk kulturarv, skape nye uttrykk, bygge kunnskap og samhald. Huset skal vere ein aktør i utviklinga av Noreg, ein talar
stol, ei scene for ulike stemmer. Nynorskens hus skal gi fleire tilgang til nynorsk språk. I august 1913 opna Bondeungdomslaget i Oslo (BUL) dørene til nybygget i Rosenkrantz’ gate 8 og Teatersalen. Inn dørene gjekk kunstnarar, politikarar, akademikarar, bønder, ungdom. Dei heitte Sletten, Kviberg, Garborg, Semb, Johannessen, og mange var med dei. Med debatt, dramatikk, folkedans, song og framsyningar, i møte mellom elitisme og folkelegheit, samla og skapte dei kulturuttrykk som spegla eit heilt folk. I oktober same år fann den store teaterslaget stad i gatene og i huset. Det var blod på veggene. Huset er ein aktivitetsarena, eit diktarhotell, ei systove og Kaffistove, med kultur for alle, der BUL sine eigne aktivitetar i Songlaget, Teaterlaget, Leikarringen og Idrottslaget med øvingar, framsyningar og konsertar held hus. Men vi har også plass til musikarar, kunstnarar og organisasjonar i huset vårt. I 2008 blir ei ny dør opna. 150 barn og ungdom, kunstnarar, BUL, Noregs Ungdomslag og Det Norske Teatret stiftar Den mangfaldige scenen - eit teater der dei unge kan uttrykke seg, lære og skape. Nye fellesskap veks fram. Huset og verksemda blir rusta opp med dugnad og støtte frå private og offentleg pengesekker. I 2013 ynskjer Jon Fosse og Kai Johnsen at Hav kan spelast i dette huset, med BUL som hovudprodusent, og saman med BUL og fleire organisasjonar blir ideen om eit nynorskens hus i hovudstaden fødd. I 2014 vedtar årsmøte til BUL at denne staden i Rosenkrantz’ gate, mellom aust og vest og regjeringskvartalet og Stortinget, skal ha ein ambisjon det står respekt av.
26. september 2014 kl. 17.15 opnar dei nye dørene til Nynorskens hus med musikk, dans og ord, og med Hav i Teatersalen. Svindseth, Amran, Joof, Johnsen, Fosse, Skagestad, Iversen, Sandegren, Kaur, Bøyum, Løvald, Donya, Nordval og Riise med mange fleire ønskjer velkommen. I 12 veker er det Haustfestival med skisser til kva huset kan romme. Innhaldet i Nynorskens hus vil bli bygd over fire år av folk frå fleire miljø og gjennom samtalar av ulike format: debatt, framsyningar, læring og forsking. Sjå www.nynorskenshus.no for informasjon om programmet og framtida.
