07/03/2026
Me slår opp med Meta!
Vil du halda kontakten med oss, bør du bli teatervenn! Då får du òg tilgang til billettar før alle andre, til ein litt rimelegare pris. Meld deg inn på hjelmeland-teater.no/teatervenn
Kvifor gjer me dette?
Etter mange år i eit forhold som byrja med entusiastiske postar, bilete frå premierefestar og invitasjonar til framsyningar, tar Hjelmeland Teater nå eit val: Me slettar kontoane våre på Facebook og Instagram.
Det er ikkje publikum si skuld. Det er ikkje dei som likar, kommenterer og deler si skuld. Det er Meta, som har ein forretningsmodell som i stadig større grad handlar om å samla data, styra merksemda vår og gjera brukarane til eit produkt.
Facebook og Instagram har hjelpt oss å nå ut med framsyningar, dugnader og små glimt frå livet i teaterlaget, men etter kvart har algoritmane tatt meir plass enn menneska, og informasjonen som me legg ut druknar i søppel. Det som me vil dela, når ikkje lenger fram til dei som vil sjå det.
Når eit forhold blir styrt av algoritmar, reklame og datainnsamling, er det på høg tid å gå kvar til sitt.
Difor vel Hjelmeland Teater å flytta kontakten direkte til publikum.
Vil du halda kontakten med oss, finn du oss på hjelmeland-teater.no. Der legg me ut informasjon om framsyningar og anna som skjer i laget.
Me håpar at du blir med oss vidare, òg utan Meta i kulissane. 🎭
