Festivalen skal nyttast til å ta opp aktuelle problemstillingar knytt til jord, jordbruk og natur, og til å undersøkja språket menneska brukar om desse tema, både det litterære, kvardagslege og fagleg/politiske. Eit overordna mål med festivalen er å skapa rom og gje ei scene til nye måtar å tenka og snakka om dei ulike problemstillingane på, då det å finna ein berekraftig og ny grøn veg, utan at u
tviklinga kollapsar, er ei heilt avgjerande utfordring for vår tid. Jordbrukskonseptet inneber ein hyllest til den jærske bonden og den jærske jorda, då den har gitt opphav til mykje av industrien vår og språk- og kulturuttrykka våre. Ein tanke som ligg til grunn for festivalen er at litteraturen i kombinasjon med jordbruket har eit viktig bidrag å gje til debattane om matproduksjon, jordvern og næringsliv. Me ser på skjønnlitteraturen som eit kulturuttrykk som evner å setta ord på, og romma kompleksiteten i dei spørsmål folk til eikvar tid er opptekne av, både daglegdagse og eksistensielle. Skjønnlitteraturen kan skapa ein større samtale om utvalde jordbruksrelaterte tema, og gje grobotn for både politiske og filosofiske samtalar og debattar. Me ønskjer å nå ut til både byfolk og bønder, både på Jæren og elles i landet. Festivalen blir driven av stiftinga Litteraturhuset på Jæren. Bak konseptet står Bothild Åslaugsdotter Nordsletten, Bjørn Hagerup Røken, Lillian Utne, Inger Størseth Haarr, Gudmund Edland og Peter Strassegger (festivalleiar). Me har fått støtte frå Kulturrådet, Rogaland Fylkeskommune, Jæren Sparebank, Fritt Ord, Bondekompaniet, Garborgsenteret/Time bibliotek, TKS Agri og Rogaland forfattarlag. Me samarbeider også med Tekstallianse, Bokhuset i Stavanger, Foreningen Snakk!
