12/06/2026
Dit weekend begint veur Nederland ‘t WK Voetbal. Zaw Koeman al zien name vaerdig höbbe veur de wedsjtried taenge Japan? Es ‘t aan de Marotte zaw lègke waar ‘t allang duudelik gewaes. Hiejónger ‘t dreamteam van Vorst Joep. Spisjaal in ein succesvol jeske gesjtaoke oet ‘t jaor 1988.
𝐁𝐨𝐧𝐝𝐬𝐜𝐨𝐚𝐜𝐡 𝐕𝐨(𝐫)𝐬(𝐭) 𝐉𝐨𝐞𝐩
Deze sjluwe vos is de Sfinx van ‘t team. Hae sjprik dèks van zien dreamteam. Hiejónger lègke veer ‘t veur uch oet wie zien team de coupe in de wach geit sjleipe.
𝐀𝐬𝐬𝐢𝐬𝐭𝐞𝐧𝐭 𝐁𝐨𝐧𝐝𝐬𝐜𝐨𝐚𝐜𝐡 𝐒𝐮𝐩𝐞𝐫 𝐒𝐣𝐫𝐚
Allein geit ‘t neit! Hae wit es geine angere ‘t sjpel van de taengesjtenjer te laeze en wiest Vorst Joep en zien men altied de waeg.
#𝟏 𝐊𝐞𝐞𝐩𝐞𝐫 𝐊𝐚𝐦𝐢𝐧𝐬𝐤𝐢
Eine baetere sjloetpós kènse dich neit indènke. Ziene doorbraak in 2018 bewees dat hae wied kènt oetgooie en wit ouch wienee hae op de tróm mot sjlaon es de res aeve verzjwaak.
#𝟐 𝐑𝐞𝐜𝐡𝐭𝐬𝐛𝐚𝐜𝐤 𝐏𝐞𝐭𝐞𝐫
Zelfs este meins van ‘m aaf te zeen blifse ‘m taengekomme. Van deze back is sumpel gezach neit aaf te komme. Ein nachmerrie veur jedere taengesjtenjer.
#𝟑 𝐊𝐨𝐩𝐬𝐣𝐭𝐞𝐫𝐤𝐞 𝐊𝐚𝐦𝐩𝐬
Geit altied veurop in de sjtried en zörg d’r veur dat al zien teamgenote in de pas blieve loupe!
#𝟒 𝐋𝐞𝐭𝐬𝐭𝐞 (𝐈𝐧𝐝𝐞)𝐦𝐚𝐧(𝐬)
Hae is ‘t verlengsjtuk van de bondscoach in ‘t veldj. Es Libero zuut hae d’r op toe dat jederein zien taake oetvuiert zowie ze oots bedach zeen.
#𝟓 𝐋𝐢𝐧𝐤𝐬𝐛𝐚𝐜𝐤 𝐏𝐞𝐭𝐫𝐨
Veur zien teamgenote is hae ‘t zunke in hoes, mer veur zien taegesjtenjers komme zien tackles es dondersjlaag bie heldere hemel: geknip veur ‘t vak!
#𝟔 𝐁𝐨𝐱-𝐭𝐨-𝐁𝐨𝐱-𝐁𝐞𝐮𝐫𝐬𝐠𝐞𝐧𝐬
Lejao is euveral en nurgus! Ziene inzat is onmisbaar veur ‘t geheel en leet deze geaoliede mesjiene dreeje wie eine goudloupende Vastelaoveswaage!
#𝟕 𝐕𝐥𝐞𝐮𝐠𝐞𝐥𝐟𝐥𝐢𝐭𝐬𝐞𝐫 𝐏𝐚𝐭𝐫𝐢𝐜𝐤
Deze sjnelheidsduvel is lestig aan benj te lègke en is op jeder Veldeke ein waope veur ooze kringk!
#𝟖 𝐌𝐚𝐫𝐚𝐭𝐡𝐨𝐧𝐥𝐮𝐢𝐩𝐞𝐫 𝐒𝐚𝐦
Mit zien loupvermoge lup hae ontèlbare läöker toe. Get wo ‘t optochkommitee sjloes op kan zeen.
#𝟗 𝐆𝐨𝐚𝐥𝐠𝐞𝐭𝐭𝐞𝐫 𝐆𝐮𝐢𝐝𝐨
Es haenke de veursjte haet hae ein perfek naeske veur de goal. Mit ziene vlotte bewaeginge leet hae mènnig taegesjtenjer sjus oppe tied komme veur de herhaling.
#𝟏𝟎 𝐂𝐫𝐞𝐚𝐭𝐢𝐞𝐟 𝐭ö𝐬𝐬𝐣𝐞 𝐝𝐞 𝐤𝐚𝐥𝐤𝐥𝐢𝐞𝐧𝐞
‘T is de toon dae de meziek maak! Mit zien maotwirk passes wit Joeri jederein in sjtèlling te brènge.
#𝟏𝟏 𝐆𝐞𝐬𝐣𝐭𝐫𝐢𝐤 𝐯𝐞𝐮𝐫 𝐝𝐞 𝐛𝐚𝐥
Dit sjtielicoon is mit ongriepbare acties ein lus veur ‘t oug en bie oetsjtek ‘t paradepaerd van ‘t illeftal! Prinsheerlik om d’r bie te höbbe!
