https://www.facebook.com/603780646162695/

Laitu Hyju, Seremban (2026)

20/03/2026

Cawngtha nan-e yeq

Krawnnjk khova Bok Dawng takkjngkhjq khrawng pjiyjk a’mjiq ti. Nhe ta nam ma mji yaq ti. Nam mjng a’lhawyilhak ka a’pjpjt a’mjiq ti. Ithawnna jm takpa’njng ljucawng a’cong laq ti. Pancitheq b**g ummhengtheq b**g a’cong laq ti. Cong ngaq pa’njng kek b**g yong b**g lj a’etheq b**g an-e ca-eq ti.
Nhxppjkkhova tju va a’pjpjt buq a’e tunna “kyut kyut” ta a’thai thaiyjk a’yawk ti. Cawng b**g yong b**g lj enhjq pai uqva ting buqam a’tawk hjt ljceq (yong a’kheqi yeq ting a’thai thok ong yongpum a’min lj a’hot ljceq, ibaw thonni yeq pai yjm?) Yong b**g a’kem anlo lj cawng an-e ti. A’yang a’yang a’con ljceq “hjiq hjiq” ting a’vju lj a’nho ti. Yong b**gnga a’thai meng ong a’toq ti. Jnni khova njng yong b**g lj ankeq lj ancen ti. Bok Dawng lj yong b**g lo vaq ong a’cong laq ting buq pa-a-ceq a’pawi ya emhu vaq ti.
Nokkjngceq cawng b**g nga anmhin nhjq ti. Pancitheq b**g ummhengtheq b**gnga anlen nhjq ti. Nikencu vjng yong b**g sawvok b**g Bok Dawng lju va a’kem anlo seng ti. Bok Dawng lj yong b**g sawvok b**g a’kem anlo ting buq va a’pawiya emhu vaq ti. A’pawi yaha ipmhu vaq ti. Bok Dawng lj ibaw ka’toqeq jng a’lungduk kjng a’mjiq ti. (Bok Dawng lj ibaw toqeq pai yjm?)
Ta’naq bawng ljceq Bok Dawng ngo Bok Dawng ngo ting nhe anpani yjngkhjq a’thai thaiyjk a’yawk ti. (U hiyeq pai yjm?) Bok Dawng paw njng ti. Bok Dawng a’pyaw ti. Paw-u lj ancong phui yeq. A’pawiya ka’ipmhu veq ting a’pyaw ti. A’paw lj Bok Dawng nga a’so ti. Bok Dawng ngo, im mata kinhiq eyeq p**q cawng mji tiyaq. Ni lju cawng njng kancongngi ting a’tak ti.
Cawng anmhin ljceq Bok Dawng lj a’paw lj cawng a’nhiqyan ti. Pa’njng im pawq a’nhiqkjq ti. Im a’nhiqphaw ljceq cawngtha jng buq huiyjkka an-ehaq ti. Pjpjiq anpyaw ti. Bok Dawng nga a’pawi ya a’ipbal mhu lj a’pawi ya a’dxm mhu nhjq ti.

08/03/2026

ချင်းလူမျိုးတွေရဲ့ အမည်ရှေ့မှာ Salai / Mai ထည့်ရေးတာ ဘာကြောင့်လဲ

ချင်းလူမျိုးအများစုမှာ အမည်ရှေ့မှာ Salai / Mai ဆိုတဲ့ စကားလုံးတွေ ထည့်ရေးတဲ့ အလေ့အထ ရှိပါတယ်။ ဒါဟာ အလှရေးတာ မဟုတ်ဘဲ ရိုးရာယဉ်ကျေးမှုနဲ့ မျိုးနွယ်ဂုဏ်အဆင့်ကို ပြတဲ့အရာ ဖြစ်ပါတယ်။

Salai ဆိုတာ ယောက်ျားလေးတွေ အမည်ရှေ့မှာ သုံးတဲ့ စကားလုံးဖြစ်ပြီး အဓိပ္ပါယ်က မျိုးကောင်းသား၊ လူမျိုးအဆင့်ရှိသူ၊ လေးစားထိုက်သူ ဆိုတဲ့ သဘောပါ။ မြန်မာလိုဆိုရင် ကို / မောင် / ဦး လို သုံးတဲ့ သဘောပါ။

Mai ဆိုတာ မိန်းကလေးတွေ အမည်ရှေ့မှာ သုံးတဲ့ စကားလုံးဖြစ်ပြီး အဓိပ္ပါယ်က သမီး၊ မိန်းကလေး၊ လေးစားထိုက်တဲ့ အမျိုးသမီး ဆိုတဲ့ သဘောပါ။
မြန်မာလိုဆိုရင် မ / မယ် / ဒေါ် လို သုံးတဲ့ သဘောပါ။

ဘာကြောင့် ထည့်ရေးကြတာလဲ
မျိုးနွယ်ကို ဖော်ပြဖို့
ယဉ်ကျေးမှုအရ လေးစားမှု ပြဖို့
ဘိုးဘွားအစဉ်အလာကို ဆက်ထိန်းဖို့

ဒါကြောင့် Salai / Mai ဆိုတာက နာမည်အလှမဟုတ်ဘဲ ချင်းလူမျိုးတွေရဲ့ ယဉ်ကျေးမှုနဲ့ ဂုဏ်သိက္ခာကိုပြတဲ့ အမှတ်အသားတစ်ခု ဖြစ်ပါတယ်။

02/03/2026

A’ham lj a’tu

Hyjmma nam nammjk ka imcaw immjk a’mjiq ti. Jnni im ma a’ham lj a’tu pjinhiq a’nhiqmjiq ti. Nhehjiq im ma phampheq ya a’mjiq ti. Nhxptjng nhxptjng imhel b**g imkawl b**g a’nhiqpheq seng ti. A’mx b**g nga tong b**g ngjng a’nhiqthjn seng ti. Hilaha ham lj poktu tawkki yaq ti. Nikencu vjng ham lj byjl a’sawu vjngkhjq vok njn naq ti.
Nhxppjk khova a’tu lj thoicawpui pjiyjk nhehjiq khram dukka a’ljkkiye ti. Jnni a’ljkki tunna byjl dukkakhjq “sut sut” ta a’mengngi lj a’ketut tjngkhjq phol hyawngngjk a’thok ti. Pa’njng jnni semmmicaw a’ljkki dxnpawq a’lo ti. Semmicaw lj a’nhova phol a’lo vjngkhjq mhawt taq ti. Semmicaw a’heltjq a’phaw nhjq ti. (Kai ibaw thonni te nhiq jm?)
Jnnikhova buq buqtiq ham lj semmicaw heltjq a’phaw jngkhjq phol a’mhuq ljceq “Phol phol” ting a’vju ti. Ham a’vju vjngkhjq nam mjngkhjq b**g lj an-yawk ljceq a’lo ti. (Ta’mhawt ibaw thonni yeq pai u vjm?) Khrawng b**g tuk b**g cim b**g poktu b**g pokpra b**g ngjng anlo vjngkhjq phol lj a’mhuq ljceq phol a’cenbal ti. (Phol a’cenbal ljceq ibaw thonni yeq pai u vjm?)
Nam mjngkhjq b**g lj ham khram dukkakhjq byjl b**g a’kem ansawu nhjq ting antak ti. Nhetiq lj anpuyi yjngkhjq cim, poktu, pokpra b**g ngjng jnni byjl a’sawu vjngkhjq anvok ti. Tuvaceq ham lj a’tu khram dukka byjlsawu b**g mji tiyaq ti. A’kyellhek nhjq ti. Imhel b**g imkawl b**g nga a’kyellhek. Im dukka a’kyellhek ti. Nikencu vjng ham lj a’tu vjngkhjq nuipheng kheupheng kangkang sasa a’nhiqmjiq ti.

24/02/2026

Ta-u hungtung lj naw-u hawkho

Hyjmma nawnaw nawyinawktiq ta-nawu pjinhiq a’nhiqmjiq ti. A’ta ming ceq a’hungtung ti. A’nawu ming ceq a’hawkho ti. A’ta buq lj a’dxyi pa’njng a’nawu hawkho lj buq a’epek laq ti. Jnniba nuipheng kheupheng a’nhiqmjiq ti.
Nhxppjk khova a’ta a’hungtung lj a’nawu va buq lj andxyi ting a’tak khova a’nawu a’hawkho lj ibaw a’tak kjng takpa’njng ta-u hungtung ngaw thoipui a’kho im ma citdo lheyaq. Thoipui a’kut ta a’ljkki hawm. Jnni kencu vjng buq e ya laq lheyaq ting a’tak ti. A’ta a’hungtung buq lj a’dxyi tongnga “gruk gruk” ka a’pang ti.
Ta’naq a’mjiq ljceq thoipui a’kut lj nanljkki ya nantha mji tiyaq ting a’tak ti. Jnni khova thoipui a’kho ljha a’hi ki ya ka’tha mji tiyaq ting a’tak ti. (Kai nang nhiq ceq ibaw nanpi nawk kjm?)
Buq lj andxyi ljceq a’kut kho b**gnga antha mji tiyaq ti. A’ta a’hungtung lj buq lj a’dxyi tongnga ta’naq ta’naqa “gruk gruk” ka a’meng ti. A’nawu a’hawkho lj thoipui b**g ngo im pawq citbal nhjq ljpuq ting a’tak ti. A’kut kho b**g nga a’yaidak ting phrephrecaw va ancit ti. Im anphaw ljceq a’kut lj buq nan-e yeq nhjq ting a’tak ljceq buqpji a’min ti. Jnni khova a’nawu a’hawkho lj elheye tiq, na’kut caiq ong botti mawve ting a’vju ti. (Ithawnna a’vju va nanpi nawk kjm?)
A’nawu a’hawkho lj a’kut ta ibaw a’tak kjm takpa’njng ceq buq nan-e yeq maw jng sawpung ngjng na’pawi ya nanbotti laq. Botti yaqpu pa’njng na’mik kjng hotta laqaq jngkhjq sai b**g nan-hungtung nga anvawng pa’njng nan-hungtung lj anniqi yeq ting a’tak ti. (Thoipui a’hawkho lj a’hawu vjngkhjq a’kut lj a’khinneqa nanpi nawk ki?) A’khin ti. A’kut tjngkhjq a’pawi ya a’botti ljceq buq a’e ti. Awnsi b**g nga a’kem ljceq a’dyelq ti. Jnni khova njng a’ta a’hungtung a’mjipha ti. (A’ta a’hungtung tuvakhjq yawkka a’bjibal ljceq ibaw thonni pai u vjm?) A’kho b**g a’kut b**g pa’pjiq antha a’mjiq ljceq a’sawu ti. Khui ceq nitjq njng.

05/02/2026

Nupaw kheu khinnaqtiq Kekcaw

Hyjmma nam nammjk hella yething thingngjk a’mjiq ti. Yetheq a nawnaw a’epha ti. Jnni yetheq eya kek uppjk nhxp tjng anlo ti. Jnni yething nga mhunu luvjk ci a’lo seng ti. Jnni mhunu a’lenthe ti.
Nhxppjk khova keknu lj a’cawtiqa, “Yetheq eya luvjk djkkcaw citte cuq. Mhunu lj anmanni yeq,” ting a’hawu ti. A’nu lj a’hawu vjngkhjq kekcaw luvjk lj khin naq ti. Nhxppjk khova a’nu lj mhawt laqaq a’pjpjtcaw yetheq eya a’cit ti. A’cit ljceq khole ljha a’nu cingpawq citti yaq ti. Yetheq epheng a’mjiq ti. Kho a’mxsomsem ma jnni kekcaw jngkhjq mhunu lj a’mhuq ti. A’nui ljceq nang ceq ka’e yeq maw ting a’lungduk kjng a’mjiq lj, “Cui” ting hawn tjqljngkhjq a’thjyi ljceq kekcaw jngkhjq a’khra jng “Phung Phung” ting a’phawp ti.
Jnni khova njng kekcaw lj, “Nu-u vo, ka’dx eq nhjq. Ka’dx eq nhjq,” ting a’pang ti. Kekcaw a’pang ngjngkhjq a’nu lj a’yawk ti. U a’pang ngjm ting a’hot ljceq a’caw njng ti. “Hj, ka’caw mhunu lj a’payi, mhunu lj a’payi,” ting a’vjuvak ti. Keknu lj a’haw kek-up b**g a’hawuvi ye ljceq kek b**g lj mhunu antjm ti. Kek-up b**g lj antjm ma anming ljceq mhunu vjngkhjq a’doq ti. Mhunu lj khawm njn tiyaq ljceq kekcaw a’lhjqbal ti.
Nikhova njng kekcaw lj nu-ukheu khin naha ting niba ka’thonni laq ting a’lungduk kjng a’mjiq ti. Jnni nhxp khotjqljngkhjq kekcaw lj a’nu pui laqaq ipawqa cit vawp tiyaq ti. Yetheq a eye vawp tiyaq ti.

18/01/2026

Acaw b**g lj anu

Nhxppjk khova acaw luvjk lj, “Nu-u vaw, im hella epawi b**g mji tiyaqu. Nhxptjng niyok b**g si njn. Edo tiyaha. A’haw b**g nga ka’emhu pa’njng a’bji yeq tjng,” ting a’nu va a’tak ti. (Anu lj ibaw takbal pai yjm?)
Anu lj acaw b**g nga, “Ka’caw tiq o, niba pa’njng cuva a’lhaw va nancit teq,” ting a’tak ti. Acaw b**g lj “he he he” ting a’pyaw ti. Anu tiq acaw tiq lj khram ankyawyi laqeq ti. Acaw b**g anlek khovaceq khrampjk kjng anthelqli njn ti. Anu ceq a’len khovaceq khrampjk kjng thelqli njn naq ti. (Kai anu thok njn naq khovaceq ipawq citteq pai uvjm?”)
Anu lj a’khram “phung phung” nga a’boppi ljceq a’pai ljceq khram hawn a’phaw ti. A’tha dawm pawq a’kom ti. Acaw b**g lj a’pai lj a’khom mjngkhjq hawnsangphaw a’pai njng a’ljuqvi ting ansa ti.
Anu ljha a’caw tiqa, “Cuva tong tongngjk nanmhuqi? Jnni tong nga na’cit teq,” ting a’tak ti. Jnni khova acaw b**g lj, “Nu-u vaw, jnni tong tjq kankho vjng krawkki dovaquha. Ka jng njng kancit teq sang,” ting antak ti. (Kai, anu lj ibaw takbal pai yjm?) Anu lj ka ceq mji yaq. Nankho jng cit ljpuq,” ting a’tak ti. A’tha acaw luvjk lj, “Nu-u vaw, ceqbi yjng nancit teq,” ting a’tak ti. A’tha luvjk lj ceqbi yjng cit dovaha. Seke yjng ka’cit teq sang,” ting a’tak ti. (Kai, anu lj ibaw hawu pai yjm?) Ceqbi ya mji yaq. Seke ya mji yaq. Nankho vjng njng nankrawkki laqeq,” ting a’tak lj ankho vjng ankrawkki lj ancit ti. Tong tjq anphaw ljceq nuipheng kheupheng a’cawk b**g a’kem an-e ti.
Ta’naq bawng anmjiq ljceq a’thai yx-jk “Gying gying”nga an-yawk ti. Acaw b**g lj, “Nu-u vaw, ithai tj?” ting a’hiq ti. Anu ljha, “Humkekthai” ting a’so ti. Ta’naq ljceq khohyawq a’aw ti. Anu tiq acaw tiq thingkho ancit lj anmjiqye ti. Khohyawq a’kem a’aw khovaceq lawm mjng-ha tui a’kem a’luiq ti. (Kai, anu tiq a’caw tiq im pawq ibaw citbal leq pai uq vjm?)
Acaw luvjk lj, “Nu-u vaw, im ma phung seqe,” ting a’tak ti. Anu ljha, “Ki cing nga phung mji yaq,” ting a’takbal ti. “Tui kawng ong nancong laqeq. Tui kawng ngjng njng im ma nancitbal leq,” ting a’tak ti. Tui ya ceq kawng ngaq ti. Kho njng a’mx nhjq ti. Ibaw kanthonni yeq jm ting anu a’lungko a’suksak ti. (Kai, ibaw thonni pai u vjm, hawu sawm mjn?)
Ta’naq a’mjiq ljceq long cawngngjk a’lo ti. Anu tiq acaw tiq lj jnni long a’hot ljceq anpyaw ti. Ithawnna jm, nanmhawtti? Jnni long dukkata amawqpaw a’pui ti. Amawqpaw lj long a’hawiq lj a’lo ti. Anu tiq acaw tiq long ngjng a’dawn ljceq im pawq a’hawiqbal ti. Khui ceq nitjq njng.

05/01/2026

Nhetiq lj I an-e yjm?

Hyjmma Kheng takkjngkhjq semmicaw pjiyjk a’mjiq ti. Nhetiq im ma acaw, uicaw, mimcaw, vokcaw, sjlcaw, maqcaw b**g a’kem anmjiq ti. Sjlcaw lj maqcaw b**g lj im mjng a’lhawlhak tjq cit ulj a’cawk ansuiye seng ti. Hilahaceq acaw, uicaw, mimcaw, vokcaw b**g lj im hella njng Kheng ngjng ljkki ulj Kheng lj a’pawiya a’hot seng ti.
Nhxppjk khova Kheng lj acaw luvjk a’cxpthai a’yawk ti. (Acaw ithawnna pang pai yjm?) “Kyiq kyiq kyiq, kyiq kyiq kyiq, kyiq kyiq kyiq” a dxm laqaq a’cxp ti. Kheng lj, “Nu-u vaw, acaw a’yensi. A’cawk lj a’dxyi ya ka’pi nawk. Nu-u vaw, acaw b**g lj i an-e yjm?” ting a’hiq ti. A’nu lj, “Acaw b**g cawng an-e,” ting a’tak ti. Kheng lj cawng a’lekcaw a’lawkke ljceq acaw b**g nga a’pek ti.
Ta’naq bawng a’mjiq ljceq Kheng lj buq lj a’dxyi ting buq a’e ti. Kheng lj buq a’e yjngkhjq uicaw lj a’hotti ti. Kheng lj a’nu va a’hiq ti. A’nu lj, “ Nu-u vaw, uicaw ljta ki buq ka’e yjngkhjq an-hotti. Uicaw buq lj a’dxyi ka’tik. Uicaw lj i a’e yjm?” ting a’hiq ti. A’nu ljha, “Uicaw ljta buq a’e,” ting a’nu lj a’tak ti. Kheng lj buq a’lekcaw a’lawkke ljceq uicaw va a’pek ti.
Uicaw lj buq a’e yjngkhjq mimcaw lj a’mhuq ljceq “Minyawng minyawng” nga a’pangngi ti. Kheng lj, “Nu-u vaw, mimcaw a’cawk lj a’dxyi nhjq. Mimcaw ljta i a’e tj?” ting a’hiq ti. (Mimcaw lj i a’e yjm, nangnhiq nanmhawtti?” A’nu lj mimcaw ljta ngaw b**g a’e ting a’nu lj a’so ti. Kheng lj mim ma ngaw lj buq a’nhjuq ljceq a’pek ti.
Kheng lj a’yawsi yjngkhjq a’thai thaiyjk a’yawk bal pjn ti. Ngek ngek ngek ting a’pangthai a’yawk ti. Jnni ithai yjm nanmhawtti. Vokthai ti. Kheng lj a’nu va a’hiqbal pjn ti. “Nu-u vaw, vokcaw lj i an-e yjm?” ting a’hiq ti. A’nu lj, “Vokcaw lj buqlhji awnlhji b**g vangkju b**g a’e,” ting a’tak ti. Kheng lj buqpji yjngkhjq buqlhji b**g vangkju vjng a’nhjuq ljceq vok ka a’pek ti. Vokcaw a’eca ljceq a’tha a’pangngi ti. Kheng lj yawk njn tiyaq ti. (Kheng ibaw thonni pai yjm?) Kheng lj iya mhawt tiyaq ti. Ta’naq a’mjiq ljceq a’nu lj amlenthe yjng vokcawk b**g tui yjng a’nhjuq ljceq a’pekke khova njng pangngi tiyaq ti. Jnni khova njng Kheng lj vokcaw b**g lj a’cawk a’kem an-e ting a’mhawt ti.
Tuvakhjq yokka Kheng lj im ma a’mjiq yjngkhjq vok a b**g a’khetnawk khovaceq vok a vong ljha Kheng annawyinawk ti. Khui ceq nitjq njng.

17/12/2025

Nawyiphatiq So So

Hyjmma nam nammjk ka So So takkjngkhjq mhutawcaw pjiyjk a’mjiq ti. Nhxppjk khova a’ham mjng tju va lju pawq a’nhiqcit ti. Lju va a’nhiqcit khova So So lj pacaw a’kyjl ti. Dxnnjk a’nhiqphaw ljceq, “Ham maw, a’nghx sxmsawm me, I nghx vjm mhawt taq. A’nawmtet. I nghx tj,” ting a’hiq ti. A’ham lj, “Ka’tu vaw, na’mhawtteq sang pa’njng a’tha cite,” ting a’tak ti. So So ljha a’mhawt teq sangnga a’mhawima jng a’cit ti. A’lhawtjq a’phaw ljceq a’ham lj, “So So vaw, na’mhawp peq. Ka’krengcaw va cit te,” ting a’vju lj a’tak ti.
“Bung” ting a’meng ngjngkhjq a’thai a’ham lj a’yawk lj a’hot ljceq So So thingkho va a’mhawp pjngkhjq njng a’mhuq ti. Jnni khova So So a’vju ti. (Ibaw vju pai yjm?) “Ham-u vaw, a’nawutet tjngkhjq a’mhuq pjn,” ting a’tak ti. A’ham lj, “I yjm hawusawm me,” ting a’ham lj a’hiq ljceq So So lj, “Tongpa mhatti. Tongpa a’yut dxnna a’mhawp ting tongpa b**g a’pum b**g ngjng a’koppi ti. “Ham-u vaw, a’nawmtet,” ting a’tak ti.
A’tha a’nhiqcit ti. Dxnnjk a’nhiqphaw ljceq, “Ham-u vaw, I nghx tj, a’odxp,” ting a’tak ti. A’ham lj, “Na’mhawt teq sang pa’njng cite,” ting a’tak ti. Jnnikhova thing hawn njngkhjq “Pawk” ting So So lukok ka a’kraw ti. (I hi pai yjm?) So So lj iyjm ting a’lukok a’thammi ljceq yangkatpa njng ti. So So lj dawngnga a’hot ljceq dek ka a’yut tjngkhjq yangkatpa a’kem a’mhuq ti. “Aw, ni yangkatpa njng a’o i,” ting a’ham ma a’tak ti.Im ka’phawbal pa’njng me-e tiq thoicawpui tiqa ka’pek keq ting yangkatpa b**g a’kem a’kolq ti. So So a’pyaw takpa’njng a’pyaw ti.

12/12/2025

Yawng Si Tiq Imtu

Hyjmma nawnaw ipthutiq Yawng Si takkjngkhjq semmicaw pjiyjk a’mjiq ti. Ihyaw a’ipthu vjng takkjngkhjq a’nu paw tiq lj buq an-e khova njng a’ip pjngkhjq a’khak seng ti.
Nhxppjk khova a’ip pjngkhjq a’khak ljceq nu-u vaw nu-u vaw ting a’tak ti. Hilaha uljha yawk kaqu ti. Nhe lj nu-u lj iyjngkhjq a’tawk-hxt lj ipawq a’cit tjm ting a’mjiq ti. Im mhawimaw pawq a’cit ljceq “Nu-u vo, nu-u vo” ting a’pang ti. Nhe a’pang ngjngkhjq ulaha yawk kaqu ti. (Yawng Si ibaw thonni pai yjm?) Yawng Si yjngkhjq a’kap ti. Jnni khova im nhova tawq tawqtiq a’ham lj a’yawk ljceq Yawng Si yaw niya lo ve ting a’panni ti.
Yawng Si a’ham cingpawq a’cit ljceq, “Nu-u ikhjkka jm?” ting a’hiq ti. A’ham lj, “Na’nu na’paw kon njng lju va a’cit,” “Mxlawm ma njng a’lobal leq. Pancitheq b**g a’kem a’lo veq,” ting a’tak ti. Jnni khova Yawng Si a’kap pjngkhjq a’hiuqbal ti. (Kai, tuva Yawng Si a’kap pjngkhjq a’hiuq ljceq ibaw a’thonni yeq jm?) Thoicawpui b**g ngjng a’ljkki ti. A’ljkki cawn ljceq ka’ip peq sang ting a’tak ljceq a’ip ti.
Ta’naq a’mjiq ljceq Yawng Si a’ta kyong ngakhjq a’kombal nhjq ti. Jnni kkhova Yawng Si ya a’ip pjngkhjq a’khakbal nhjq ti. Pa’njng a’ta jng i a’toq jm nanmhawtti? Awntho awn njng buq a’nhiqe ti. Pa’njng a’ta jng a’nhiqljkki ti. A’nhiqljkki cawn lj tui a’nhiqlhoq ti. (Pa’njng Yawng Si lj a’ta ibaw thonni yeq pai nhiq jm?”
Nu-u lj paw-u ikhova a’nhiqlobal leq jm ting lawm ma thingkho va a’nhiqcong ti. Ta’naq bawng a’mjiq ljceq cuva vawn ankjq lj anlo vjngkhjq Yawng Si lj a’mhuq ti. “Ta-u vaw, cuva nu-u lj paw-u a’nhiqlobal nhjq hotte,” ting Yawng Si lj a’ta a a’tak ti. Vawn kjq tiq b**g a’nhiqhel tjq anphaw ljceq a’nu lj a’paw hiyaq ti. A’nghaw khrawng b**g njng ti. Yawng Si a’lung a’sju ti. Ta’naq a’mjiq ljceq a’ham lj Yawng Si lj a’ta a’hawuvebal ti. Jnni khova Yawng Si lj uicaw nhoqthai a’yawk ti. Uicaw nhoqthai a’hot ljceq ( Kai, ibaw thonni yeq pai yjm?)
A’nu lj a’paw a’nhiqlobal nhjq ti. Yawng Si a’pyawyinawk ti. “Nu-u lj paw-u ithawnna nihyawq a’nhiqkra jm?” ting a’hiq ti. “Na’paw lj tuicim ma ngaw a’man. Kiceq tui ka’sui,” ting a’tak ti. “Pa’njng lju vakhjq pancitheq b**g nga a’kem ka’nhiqlo,” ting a’tak ti. A’nu lja’paw lj tui a’nhiqlhoq cawn ljceq toi, ngaw, pancitheq awn b**g ngjng buq nan-e ti. Yawng Si lj buq nghawqtek ong a’e ti. Buq a’e cawn ljceq a’nu lj khui a’nhuqpek lj a’ip ti. Khui ceq nitjq njng.

09/12/2025

Tui ikhjkka jm?

Krawnnjk khova Khjt takkjngkhjq mhutawcaw pjiyjk a’mjiq ti. A’krjuhel ting khrawng b**g lj annawyinawk ti. Nhe lj khrawng nga a’e b**g a’hiq seng ti. Nhe lj a’hiq pa’njng khrawng b**g ljha anphrepek ti.
Nhxppjk khova ip dxnnakhjq a’yang a’thju ljceq a’nu lj, “Nan-ip pjngkhjq nanthju nhjq pa’njng a’lu nanmhawiyi laq nan-haw nanthotti laq,” ting a’tak ti. Jnni khova Khjt lj a’nu va a’lumhawyi khova iyjng nanmhawiyi laq jm? Nan-haw ceq iyjng nanthotti yjm? Tui ceq ikhjkka jm,” ting a’hiq ti. (Kai, nang nhiqceq nanlu iyjng nanmhawiyi yjm? Nan-haw ceq iyjng nanthotti yjm?) A’nu lj na’lu na’mhawiyi yeq na’haw na’thotti yeq lawkka tui lxngcx dukka a’mjiq ting a’tak ti.
Khjt lj a’lu a’mhawiyi ye-eq ting lxngcx a’hotte ljceq lxngcx dukka tui mji yaq ti. “Nu-u vaw, tui mji yaq,” ting a’tak ti. A’nu lj a’me ya, “Tui lawkke mawve,” ting a’tak ti. Khjt lj a’me ya, “Me-u vaw, tui ikhjkka nanlawkke laq jm?” ting a’hiq ti. (A’me lj ibaw a’sawkki yeq ting nankhin njng?” A’me lj, “Kan na ka’lawk ke-eq,” ting a’tak ti.
Khjt lj a’lu a’mhawiyi a’haw a’thotti cawn ljceq buq a’e ti. Buq an-e khova kyakong ngjng an-e ti. Khjt lj a’paw va, “Paw-u vaw, kyakong ceq ikhjkka anmjiq tj?” ting a’hiq ti. A’paw lj kyakyong takkjngkhjq tui dukka anmjiq ting a’tak ti. “Baceq paw-u vaw, lxngcx dukkaceq kyakong mji yaq tukxppa. Mhu vaha. Khjt ljta kyakong ikhjkka anmjiq yjm ting mhawt taha,” ting a’tak ti. (Kai nangnhiqceq kyakong ikhjkka anmjiq yjm nanmhawtti?) Khjt paw lj, “Kyakong takkjngkhjq hawlong ngakhjq tui ya njng anmjiq,” ting a’tak ti.
Khjt lj kyakong awn njngkhjq samet a’epiq ti. “A…, a’thippi” ting a’vju lj a’kap ti. Pa’njng tui tui tui ting a’vju ti. Khjt ta lj tui a’lawkke pek ti. Khjt samet lj a’thippi ya a’mikkhri kxt a’thok ti. Khjt lj tui a’ok ting samet lj a’thippi yjngkhjq a’bjilawq ti. Khjt lj tui nawnaw a’hi i ting a’tak ti.

Laitu Hyju

20/03/2026

08/03/2026

02/03/2026

24/02/2026

05/02/2026

18/01/2026

05/01/2026

17/12/2025

12/12/2025

09/12/2025

Address

Website

Alerts

Shortcuts

Share

Category