16/04/2020
LEITUNGBUP PULPI NATNA THEOLOGY
(Theology of Covid 19 Pandemic)
Rev. Dr. S. Pau Khan En
K*m 2019 k*m beikuan a kipan Sengam Wuhan khuapi panin Coronavirus leitungbuppi hong zeelta hi. K*m 2019 k*m a kipan ahih lam theih nadingin Covid 19 zong kici-a, agam agam ah atul aza-in kisi ziahziah ahih manin leitungbuppi kilauthawng kidipkua tek hi. Hih bang face book ah a thu a kicingin at theih ding hilo ahih manin, hih kong thugente zong kicing het-het lo ding hita leh tawm kong at nuam veve hi. Hong piankhiatna leh a dal nading kithei nailo ahih manin hangtak-a genngam ding hi nailo hi. Athei pen ding cidamna zato lam (medical science) te hi-a, amau gen tungsiah i theih nading leh i genngam nading om lo hi. Amau hong gen bang um-in hongsawl bang uh man ding sep ding pen ihih theih lian pen ahi hi. Hih pulpi natna Pasian thulam panin en-in tawm ka gennuam veve a, a thulu dingin hoh Leitungbup Pulpi Natna Theology (Theology of Covid 19 - Pandemic) kongci depdap hi. Hih natna, Pasian thu theology lam panin koici muh ding cih a gennuam lua ka hi hi.
I. I BIAK PASIAN (The God We Worship)
I biak Pasian pen na khempeuh a bawl a piangsakpa leh acing akempa (Creator and Sustainer) ahi hi. Amah a bawlpa mah in na khempeuh, na vannuai cingin keemin uk hi. Piansak khempeuh (Creation), hun (time), leh khangtaangthute a uk T**a (the Lord of history) ahi hi. Tua piansaknate leh khanghun (history) zong Ama deihna (Will) bangin uk hi. Pasian deihna pen, Deih tawpna (Ultimate will), Ngaihsut deihna (Intentional will), a deihpakna (Circumstantial will), leh Damsak deihna (Remedial will) te ahi hi. Leitung thupiang khempeuh leh tulaitak-a leitungbup in i tuahkhak pulpi natna (pandemic) zong hih a tunga, a deihnate lak-ah khat teeiteei tawh kituak ding hi. Hoih lohna, siatna nangawn Ama deihna khat peuh ah kizang theih ahih manin Pasian in a etkhong leh a khahkhong hun om hi.
II. I LEITUNG MUH ZIA (World View)
Pasian leh Ama bawlsa na khempeuh i telsiam nadingin Leitung muh zia (world view - Weltanschauung) kisam hi, cih German theologian Immanuel Kant (1724 1804) in genngei a, kikipsak pah hi. Adam leh Eve in Pasian thu a manloh khit ciangin Eden huan nuam pen ciamsiatna thuakin hong kisongsawlawi ta hi. Munnuam kimlai munnuam lo, ki-el puakna leh natna satna namkim a omna leitung hong suakta hi. Tulaitak-a i thuak Coronavirus Covid - 19 zong Pasian ciamsiatna leitung ah a om thei ding mah hilel hi. Tu-a sang a lipkhap huai zaw pulnatna nangawn hong laan theih lai nading ciamsiatna (cursed) leitunga a teeng ihi hi. Buddha Gotama (623 BCE - 543 BCE) in '''Mihing a pianna pen gentheihna (dokkha) thuak dinga piang hi hang,'' naci hi. Ciamsiatna leitunga teeng ihih manin natna namkim zong a om theih a laan theihna leitung ahi hi. Genthuakna pen mawhna dan (penalty) bekbek zong hikhin pah lo hi. Hi bangin leitung muthei lehang, i gentuah nate i sangsiam zaw ding hi.
III. KHANG TAAGTHU (History)
Tutawm hilo-in mihingte khang taangthu sungah deih huai lo siatna tamveipi na tungngeizo hi.
1) CE 1346 - 1353 k*m sungin leitungah pulpi natna tungngeizo a, tua pen sihsia (Black Death, Latin - atramors) na kici-in, leitung mi awn 200 bang na na si uh hi.
2) 1665 - 166 k*m sungin London ah pulnatna na tungin mi 70,000 si hi.
3) K*m 1666 k*min London khuapi meikang hi.
4) K*m 541 - 542, Justinian pulpi tung hi.
5) K*m 1918 - 1920 sungin Spain bukkhuhpi (Spanish flu) tunga mi tampi si hi.
6) K*m 1941 - 1945 sungin 'Holocaust' kici German k*mpi Hi**er (Na**sm) in Jew minamte awn guk that hi.
7) K*m 2009 - 2010 Leitungbup vok natna (Swine flu) tunga, mi tampi in gimngah hi.
8) Leitung Galpi Masa (1914 - 1918) in mi awn 40 bang si-in Galpi Nihna (1939 - 1945) ah mi awn 85 bang si hi.
9) K*m 1950 - 53 Korea gal ah mi (awn 3) bangmah si hi. Ih genkhak loh gamsung gal, gampua gal tampi omlai ding hi. Kong gennop bulpi in, bang dinga Pasian in khang taangthu sunga mi hizah sihna enkhong mawk ahi hiam? Natna, satna, gilkial dangtakna leh gal kido a, mi tampi a sih zuahzuah laitak-in Pasian koi ah om mawk a, bang dingin hite enkhong mawk ahi hiam? Dotlai ding a hoih pen in, hite Pasian bek mah mawhsak ding ahi hiam? Mihingte in hih buainate ah bangzah vaipuak nei uh ahi hiam? Mihingte gitlohna leh buaina, haksatnate Pasian in hong et khong, hong awlmawh khol loh hun om thei lua zen ahi hi.
IV. MIHINGTE' SEPKHIALH HUN (Human Beings' Misdeeds)
Pasian in mihingte Ama lim Ama mel banga hong bawl ciangin sia leh pha khentel theihna leh teeltawm theihna'ng hamphatna (freedom of choice) anei ihi hi. Tua teeltawm theihna i zatkhialh ciangin agah pen ei mihingte tung mah ah hong tunga, ei leh ei-a ki tuisa kibuah ihi hi. Mihingte khang taangthu sunga i tuahkhak haksatna tampi pen ei leh ei tuisa i kibuah khak hun tam mahmah ding hi. Mihingten bel, Pasian ngawh zel, Satan ngawh zel-in ei i kipengsak den hi. I thuakding teng thuak a, i paat dikdek khit ciangin kipuah phat, kilep phatna beekin neih ding ahi hi. Tuaciang beek in Pasian i koh ding ahi hi (2 Khang. 7:14).
V. PASIAN VANGLIATNA KILANG (Manifestation of Gods Power)
Leitung pen siatna namkim a omna mun hi-a, tualai ah mi a i pian man a, i thuak khak te (natural disasters), gitlohna hanga i kituisa buahkhakna leh i thuak nadang khempeuh haksa sa-in patau-in dipkua a, lawhsapna (crisis), dongtuahna lian pen i tuah hun laitak pen Pasian vangliatna i telmuh nading hun hoih pen ahi hi. Mangkangte laigelh siam mipil C.S. Lewis (1898 - 1963) in ''Mihing tate lawhsapna, buaina leh mabinna hong tamin, mihing tate hong cimawh luat mahmah ciangin Pasian vangliatna leh lawhcinna hong kipan thei pan hi,'' cingeu hi.
VI. TUHUN A PULNATNA PAN I SIN DINGTE (Theological Lessons from Pandemic)
1) Apiang thusia lasia leh pulnatnate Pasian theihlohkal, lusukkal a, a piang hilo-in, Pasian phalna tawh apiang vive ahi hi (Late 121, 91).
2) Ciamsiatna leitung ah teeng ihih manin siatna i phutkhak ding mah ahi hi. Lunglau kei ni. Pasian in i thuakna hong mu gige hi.
3) K*mpite leh zato lamte hong sawlna bangin i kikep kawmin i lungsimtawng pan natna ngahte i nawlkhin kha peuhmah kei ding hi. I puasiah, i gimneih, i koihdak kha kei ding hi. Hih natna in mawhna daan hi zenzen lo hi. A damkik thei lua ahi hi. Tuabang mahin, hih pulnatna hangin neek ding dawn ding tasamte i en khong hetkei ding hi. I vaihawm theih bangin vaihawmin, neeksam taaksamte i panpih ding hi. Midangte dongtuahna pen ei adingin itna lah nading hun hoih pen ahi hi (Matt. 25:31-46). Pasian in tua dinga zong a na phal himai thei hi.
4) Pilvangin i kidawm dinga, ahi zongin i laukhengval het kei ding hi. Pasian in Ama tate a puak lah ding uh van hong suan ngeilo hi (1 Cor. 10:11-13). Hih leitungbup pulnatna in Pasian vangliatna a kilat hun, Amah a um mite in Amah a sutna a lahkhiat hun hoih pen ahi hi. K*mpite leh nautangte tawh kop-in midangte ading sepkhiat hun hita hen. Midangte ading sepna tawh Pasian ading teci pang ni. Hih in Covid - 19 in hong hilh Pasian thu (theology) ahi hi.
5) Leitung gamlian, gamhaute in a neihsa hauhna, liatna leh thauvui thautang ngen muangin, suangin, thugen uh hi. Pasian in a neu pen lungno (virus) tawh leitungbup buaisak ziau hi. Mihingte hong thuhilhna zia khelziau lel hi. A kiliansak, a kihausakte sukniam nadingin muhtham lo virus lungno zang hi.
6) Pasian tate, i kampau, i mukpau leh i gamtatte kidawmin i pil om ding hi. Laukhengval, dipkua gawp hetlo-in hong ompih Pasian muangin i khamuang ngam hithiat lel ding hi.
Rev. Dr. S. Pau Khan En
Pastor Emeritus
TBCY PAGE PAN KILA HI.
