PBW Online Tv

20/10/2026

19/10/2026

Manchester City akuti alandila kuchotsedwa kwa mapointi KWAKUKULU komwe "kutsimikizira kutsika mu ligi"

19/10/2026

NKHANI YACHISONI

Oyendesa Njinga ya moto wafa pa Nsewu wa Kanengo ku Lilongwe pa ngozi yomwe yachitika pamene amathawa apolisi.

Malemuwa ananyamula zigubu zisanu( za mulingo wa 20litres) zodzaza mafuta a galimoto ndipo apolisi anafuna kumuimisa kuti amufunse mmene apezera mafutawo komaso komwe amapita nawo, koma munthuyu sanaime,mmalo mwake anayamba kuthawa koma analephera kuongolera njinga yake bwino zomwe zinapangisa kuti njingayo imugwetse ndipo nkuyaka moto zomwe zapangisa kuti afere pamalo angozi pomwepo.

pakanali pano zambiri zokhudza ngoziyi sizinadziwike ndipo apolisi sanalankhulepo. Tikupasirani zotsatira kafukufuku akamalizika.

olemba: Redson Dani
PBW online tv-kanema yanu yanu

19/10/2026

Ngozi Yowopsa ku Kanengo

Malinga ndi mboni, anthu awiri omwe ankakwera njinga yamoto atanyamula zigubu za mafuta ankathamangitsidwa ndi galimoto ya apolisi ya mtundu wa Cruiser. Ngozi itachitika, mafuta anagwera pa exhaust ya njingayo, zomwe zinayambitsa moto.

Mmodzi wavulala ndipo watengedwa kupita kuchipatala, pamene mnzake wamwalira pomwepo atapsa ndi moto. Akuti galimoto ya apolisi sinayime ngozi itachitika, mwina poopa kukwiya kwa anthu omwe anaona zomwe zinachitikazo.

Zomwe zachitikazi zikufunika kutsimikiziridwa ndi apolisi.

18/10/2026

Mpikisano wa FDH Bank Premiership wayaka moto pomwe timu iliyonse ikuyesetsa kudzimenyera nkhondo pofuna kupeza mapointi atatu mu gawo lachiwiri la mpikisanowu.

Tikunena pano, timu ya FCB Nyasa Big Bullets yabwereranso pamwamba pa mpikisano wa FDH Bank Premiership pomwe yachotsa Mighty Wanderers yomwe yangokhalapo kwa maola 24 chabe kutsatira kugonjetsa timu ya Mafco FC ndi zigoli zotatu kwa chilowere masana a lero la Mulungu pa bwalo la Civo mu mzinda wa Lilongwe.

Bullets inapeza zigoli kudzera mwa Clever Kalambo yemwe anagoletsa pa mphindi ya 13 m'chigawo choyamba asamwetse Tsimba Tiyaye pa mphindi za 87 ndi 90+3 za m'chigawo chachiwiri kuti masewerowa athere mokomera Mapale ndi zigoli zitatu kwa duuu!!

M'masewero ena, Silver Strikers yagonjetsa Moyale Baracks 1-0 pa bwalo la Silver ndi chigoli chomwe anagoletsa Innocent Shema, Ekhaya yalepherana ndi Red Lions posagoletsa chigoli chilichonse pa bwalo la Zomba, pomwe zigoli ya Tonic Viyuyi komanso Webster Mzunga zapambanitsa Blue Eagles ndi zigoli zitatu kwa chilowere yomwe imasewera ndi Chitipa United pa bwalo la Nankhaka.

Zateremu, Bullets yatolera mapointsi 36 pa masewero 17 kusiyana ndi pointi imodzi ndi Mighty Wanderers, ndipo Blue Eagles yakhazikikabe pa nambala yachitatu ndi mapointi 34.

Masewero omaliza mtsiku la lero a sabata ya nambala 17, aliko madzulo ano nthawi ya 6 koloko pakati pa timu ya Masters Security FC yomwe ithambitsane ndi timu ya Karonga United pa bwalo la Bingu.

Wolemba: Rashid Mtumbati-Mwanza

17/10/2026

SHADRIC NAMALOMBA AYANKHULA ZA ZIPHUPHU: “ACB, MULI KUTI?”

A Shadric Namalomba ati ziphuphu ndi mlandu waukulu, ndipo aliyense amene ali ndi umboni ayenera kuupereka ku bungwe la Anti-Corruption Bureau (ACB) kuti lifufuze.

Iwo anatsindika kuti ntchito yofufuza milandu ndi ya mabungwe oyenerera, pomwe makhoti ndi amene amapanga zigamulo potsatira umboni.

PBW

17/10/2026

Bungwe la Muslim Initiative for Development laphunzitsa achinyamata ndi amayi a m'dera la mfumu yaikulu Chanthunya m’boma la Balaka za ntchito za migodi, kuwunika kuopsa kwa kusintha kwa nyengo komanso kuteteza chilengedwe pofuna kulimbikitsa ntchito za migodi zomwe sizikuwononga chilengedwe.

Maphunzirowa, omwe achitikira pasukulu ya pulayimale ya Mfulanjobvu akufuna kuthandiza anthu kudziwa kuopsa kwa kusintha kwa nyengo, kuzindikira kusintha kwa chilengedwe komanso kumvetsa mmene ntchito za migodi zimakhudzira miyoyo ya anthu m’madera awo.

Polankhula pamwambowu, mfumu yaikulu Chanthunya yalimbikitsa omwe akuphunzirawo kutenga nawo mbali mokwanira komanso kugwiritsa ntchito zomwe akuphunzirazo pothana ndi mavuto amene akukumana nawo m’madera awo.

Woyang’anira ntchito za bungweli, Biswas Ismael, anati maphunzirowa ndi mbali imodzi ya ntchito yolimbikitsa amayi ndi achinyamata omwe akukhala m’madera omwe akukhudzidwa ndi migodi.

Bungwe la Southern Africa Trust ndilo lathandizira maphunzirowa ndi cholinga cholimbikitsa chitetezo cha chilengedwe, kuthandiza anthu kuthana ndi mavuto obwera chifukwa cha kusintha kwa nyengo komanso kulimbikitsa kagwiritsidwe ntchito koyenera ka chuma cha m’chilengedwe pofuna kuonetsetsa kuti ntchito za migodi zikuthandiza chitukuko chokhazikika.

Wolemba: Rashid Mtumbati-Mwanza